تغيير طرمبه المياه وسيرفو الفرامل والمارش

**adhmmaamon** · 13-06-2014 09:38 AM

طرمبه الميه بقى لها فتره بتشاور عقلها (صوت خشونه وتنفيس وكمان ضعيفه على السلانسيه ) ..
كمان سيرفو الفرامل منفس وبيبرجل العربيه ومخلى الطنابير تسخن وشغلانه ..
كمان المارش صوته عالى جدا وكنت من فتره غيرتله ترس البندكس علشان كان بيفوت ..

بعد الاستخاره والتوكل على الله .. ذهبت الى السبتيه وسألت على السيرفو بالماستر العمومى وكمان المارش السريع والاسعار كانت بتتراوح مابين 350 الى 400 بالنسبه للسيرفو بالماستر و350 للمارش ..
رحت راجع على الوكاله وتذكرت زميلنا الاخ محمد منسى لما قال ان فيه واحد كويس هناك وبالفعل ذهبت اليه (قلتله انا من طرف محمد منسى ) وبصراحه الشاب اسلام كان فى منتهى اللطف وحسن المعامله وبالذات لما عرف انى من طرف المنسى ..

جبت السيرفو بالماستر (بسم الله ماشاء الله حاجه ولا الزيرو ) ب300 وكمان المارش ب300 جنيه .. ونزلت عند السيد صلاح جبت طرمبه مياه (بيقولو تركى ) خامه محمله ب230 جنيه وجبت علبتين زيت dot-4 ب30 جنيه ..

تم تغيير الطرمبه عند الميكانيكى واكتشافنا ان القاعد اللى كانت راكبه فى الطرمبه القديمه كانت مقطوعه (الطرمبه الجديده بتيجى بالقاعده بتاعتها ) وتم تركيب السيرفو الجديد بدون الماستر (اللى عندى كان كويس ) وتم تغيير زيت الفرامل كله واخد الهوا كمان فكيت طقم الدواسات ( بنزين ودبرياج وفرامل ) وكانت دواسه البنزين فيها بوش جامد ( بتروح يمين وشمال ) وديتها للخراط عملها جلبه وتم اعاده تركيبها مره اخرى ...

المارش بقى ان شاء الله انا اللى هاركبه (البيه الكهربائى عايز 35جنيه فك وتركيب ) ..

الحمد لله .. النتيجه مرضيه جدا وجارى التجربه .

**حسن محمود احمد** · 13-06-2014 10:20 AM

شغل عالي ماشاء الله هو ده الكلام الصح والف مبروك عليك

**Ahm662** · 13-06-2014 06:49 PM

ماشاء الله..........ربنا يبارك لحضرتك فيهم

**EngAhmedSayed** · 13-06-2014 10:44 PM

شكرا على نقل التجربة
بس حضرتك بتقول حاجتيين عكس بعض و هى السيرفو و الماستر
كنت بتقول انى السيرفو بيعمل صوت فووووووش لما بتيجى تدوس على دواسة الفرامل
و كان بيبرجل الموتور دى حقيقة اما يخلى الطنابير بتسخن
لا لالالالالالالالا
العطل دة بيبقى ناتج من الماستر العمومى او باستم الفتح و الغلق او انسداد فى وصلات زيت الباكل
فكان من الافضل تركيب السيرفو بالماستر
و انتا عند اسلام فى الوكالة
مسألتش ليه عنده على سيرفو بالماستر كنت هتاخد حاجة اوريجنال
انا كنت شارى من عنده سيرفو بالماستر اصلى بتاع بلده
و قعد معايا سنة من غير ما شتكى منه لحد ما تم بيع عربيتى
و كانت المشكلة موتور مبرجل و صوت فووووووووووش و التيل بيقفش على الطنابير
الرجاء مراجعة الماستر
وربك المستعان

**adhmmaamon** · 14-06-2014 05:53 AM

المشاركة الأصلية كتبت بواسطة engahmedsayed

شكرا على نقل التجربة
بس حضرتك بتقول حاجتيين عكس بعض و هى السيرفو و الماستر
كنت بتقول انى السيرفو بيعمل صوت فووووووش لما بتيجى تدوس على دواسة الفرامل
و كان بيبرجل الموتور دى حقيقة اما يخلى الطنابير بتسخن
لا لالالالالالالالا
العطل دة بيبقى ناتج من الماستر العمومى او باستم الفتح و الغلق او انسداد فى وصلات زيت الباكل
فكان من الافضل تركيب السيرفو بالماستر
و انتا عند اسلام فى الوكالة
مسألتش ليه عنده على سيرفو بالماستر كنت هتاخد حاجة اوريجنال
انا كنت شارى من عنده سيرفو بالماستر اصلى بتاع بلده
و قعد معايا سنة من غير ما شتكى منه لحد ما تم بيع عربيتى
و كانت المشكلة موتور مبرجل و صوت فووووووووووش و التيل بيقفش على الطنابير
الرجاء مراجعة الماستر
وربك المستعان

انا فعلا اشتريت سيرفو بالماستر .. وعارف ان المشكلتين عكس بعض يعنى التنفيس وبرجله الموتور من السيرفو وسخونه الجنوط ممكن (بس مش اكيد) تكون من الماستر . بس اهو دا اللى حصل .

الميكانيكى شكر فى الماستر الجديد وفى نفس الوقت قال ان الماستر اللى عندى كويس وبعد تغيير الزيت واخد الهوا ..الحمد لله الدنيا بقت تمام .

**adhmmaamon** · 14-06-2014 05:59 AM

المشاركة الأصلية كتبت بواسطة حسن محمود احمد

الاخ adhmmaamon اشتري فعلا سيرفو بالماستر وبيقول حاجة ولا الزيرو ولكنه فضل تركيب السيرفو فقط لانه وجد الماستر اللي عنده كويس

شكرا ليك يا استاذ حسن .. هوه ده فعلا اللى حصل .
انا على فكره متابع مواضيعك عن المارش والف مبروك عليك المارش الجديد ..
انا ركبت المارش بتاعى امبارح والموضوع الحمد لله كان سهل جدا ..اهم حاجه فصل البطاريه اثناء التركيب .. ورغم ان الموضوع مجرد فك وتركيب الا ان البيه الكهربائى كان عايز مصنعيه 35 جنيه ؟؟؟؟ مش عارف ليه .. رحت البيت وجبت مفتاح 16 وفكيت القديم وركبت الجديد .. وكله تمام والحمد لله .

**حسن محمود احمد** · 14-06-2014 06:20 PM

الف مبروك علي المارش كمان وانا ان شاء الله سوف اقوم بتركيب المارش بس افضي لاني باعمل كل شيئ في العربية بنفسي ولله الحمد حتي الكهربائي بعد مجرب لي المارش لم يقول لي هات العربية واركبهولك لا قال لي كويس روح قفله