الموضوع: تغيير حساس كرنك النترا 2010 بالتفصيل الممل

بسم الله الرحمن الرحيم
ولو انى حسيت كالعاده بعدم التفاعل فى الموضوع اللى فات – لكن مش خساره فيكم موضوع النهارده
النهارده هانغير حساس الكرنك لعربيه النترا 2010
وكالمعتاد
اى شغل حضرتك هاتعمله – هاتعمله على مسئوليتك الشخصيه – انا غير مسئول نهائيا فى حالة وجود اى معلومه خاطئه فى الموضوع بتاعى
نبدء على بركة الله
الشغل فى عربيه النترا 2010 (الموتور الجديد)
الاعراض اللى خلتنى اغير الحساس– العربيه بتبرجل بدون اى سبب – لما باجى اهدى لمبة التشيك اوقات كانت بتنور والعربيه بتبطل منى وعلشان تدور لازم كنت احاول ادورها 3 أو 4 مرات ------ وفى النهايه حطيت العربيه على الاسكانر وطلعت المشكله فعلا فى حساس الكرنك أو crankshaft sensor
تم شراء السنسور من التوفيقيه ب 200 جنيه
نبدأ بسم الله الرحمن الرحيم – والمره ديه مفيش داعى لفصل البطاريه
علشان نشتغل لازم ترفع العربيه ويا سلام لو عرفت ترفع الجزء الامامى كله هاتسهل على نفسك كتيييييييير
نام تحت العربيه هاتلاقى السنسور مكانه فى وسط العربيه من تحت جنب فلتر الزيت على طول
هانبدأ بأننا نوسع لنفسنا شويه ونفك الكارتيره اللى تحت الموتور
001

بعد كده هاتفك المسمار بتاع السنسور وتهز السنسور بالراحه شمال ويمين لغاية لما يطلع فى ايدك – وهاتلاقى شوية زيت وقعوا - عادى – وعارف ان الصوره ديه مش موضحه اوى لكن الصور اللى جايه هاتفهمك كل حاجه
002

بعد كده اطلع من فوق من حوض العربيه هاتلاقى السنسور واقع وهاتعرف مكان الفيشه بتاعته فين – بدل السنسور القديم بالجديد وخلى بالك ان الفيشه بتاعت السنسور بتبقى متعلقه على جزء حديد صغير علشان متتحركش
ديه صورة الفيشه بالسنسور القديم
003

وديه صوره بالسنسور الجديد
004 + 005

ارجع انزل تحت العربيه تانى وركب السنسور الجديد فى جسم الموتور بالمسمار بتاعه – وديه صور واضحه للسنسور بعد تركيبه علشان تعرف مكان السنسور صح
006 + 007

جرب تدور العربيه ممكن تبرجل معاك لحظه فى الاول – لكن بعد كده هاتظبط ان شاء الله
ارجع ركب الكارتيره بتاعتك

مبروك عليك تسارع نسبيا كويس – اختفاء مشكلة التبطيل - هدوء نسبى فى صوت الموتور

وطبعا انتوا عارفين ان مفيش حاجه ببلاش فى الدنيا ديه
اذا كنت استفدت بأى حاجه من الشغل اللى انا عملته ده – أسألك الدعاء لوالدى بالرحمه ولوالدتى بالشفاء ---- طبعا عايز تفتكرنى انا وعيالى بأى حاجه اهو كله فى ميزان حساناتك