أنا مش من هواة المنتديات او ما شابهها لكن انا سجلت فى المنتدى عشان احذر الناس من واحدة من أسوء السيارات الموجودة فى مصر و القصة بالتفصيل:
الخلاصة عشان اللى مكسل يقرأ حذر اى حد تعرفوا معاه او عايز يشترى تويوتا افانزا انها واحدة من أسوء السيارات فى السوق و أسوء سيارة شالت علامة تويوتا على الاطلاق كتصميم و ثبات و امان (وسائل الامان كلها لا تعمل عندما تحتجها و اقرأ تفاصيل الحادث لو مش مصدق) و طبعا الوكيل ليه فى المكسب بس ساعة الخسارة بيبيعك
اشترى والدى سيارة تويوتا افانزا موديل 2007 رغم مخاوفنا من ان شكل العربية بيقول انها مش هتبقى ثابتة على الطريق لكن قلنا ازاى شركة تويوتا هتنزل عربية مش متصممة صح ومتجربة
المهم من اول ماشتريناها و بانت على حقيقتها العربية اخرها 90 لو عايز تحافظ على حياتك 100 انت لازم تكون مركز اوى بقى مع الطريق و ربنا يستر اكتر من كده ماوعدكش انك ترجع بيتك سليم
مش عايز حد يجى يقولى انا جربتها و جابت كذا و كذا هقولو انا قفلت عدادها على طريق الغردقة اصل اى عربية هتدوسلها بنزين هتجرى لكن العربية بالمعنى الحرفى للكلمة كانت طايرة عن الارض اى شوية هوا بيرموها من اول لاخر حارة فالاحسن تسمع نصحتى لو معاك العربية دى بيعها او امشى 90
و لما بحثت فى الموضوع لقيت ان
العربية دى اصلا من "تصميم" و "تصنيع" شركة دايهاتسو و اشترت شركة تويوتا السيارة لتنزل باسمها فى بعض البلدان بينما تنزل أسواق أخرى باسم دايهاتسو ويبدو أن تويوتا لم تبزل الجهد الكافى لفحص إذا كان التصميم يليق باسمها أو لا و ده لينك للكلام ده من على ويكيبيديا Toyota Avanza - Wikipedia, the free encyclopedia
و على فكرة الشكل الجديد نفس الكلام بالظبط و ماعدلوش اى حاجة غير الشكل الخارجى فقط لكن كل العيوب اللى فى تصميم العفشة مازالت موجودة زى "Ride rate" , "Ride height", "Roll rate", "Center of Gravity" , " Track width" و للتبسيط دى العوامل الاساسية لقياس مواصفات اى عفشة يعرفها جيدا المهندسين و المتخصصين
نيجى بقى للمهم و الهدف من الموضوع اصلا و هو الحادثة كنا ماشيين عل طريق المنصورة الزراعى شوية بلطجية جريوا ورانا بعربية نصف نقل و حاولوا يثبتونا و ياخدوا العربية شادينا جامد و مش عارفيين يسبقونا خالص عشان يوقفونا راح خابطنا من الجنب (زى الافلام كده) على الاساس بقى ان العربية تهدى و احنا نخاف منه و نقف لكن ده لو عربية ثابتة على الارض اللى حصل معانا بقى غير كده خالص العربية عامت و فقدنا السيطرة عليها تماما و الفرامل ال ABS ماشتغلش مع اننا على رمل و كان شغال قبلها عادى و بالشفا كده
ووصف الحدث كالتالى اولا العربية دخلت بمقدمتها فى حجر خرسانى كبير على جانب الطريق و اتقلبت بعدها على الجنبين و فى الاخر لبست فى نخلة فى الجنب اليمين و دى اللى وقفتها
أهم حاجة و ألف حمد و شكر لك يا رب ان كل اللى جواها طلعوا سلام تماما الا من بعض الخدوش و الكدمات البسيطة بلطف ربنا اولا و بسبب حزام الامان ثانيا :_Alshmokh22[1]:
نيجى للعربية بقى ايوه بالظبط كده زى مانتا قولت توتال لوس (total loss) العربية اتدمرت تماما كجسم خارجى من كل الجهات لكن المقصورة فضلت محافظة على اكتر من 75% من شكلها باستثناء الجزء اللى دخلت فية النخلة اصل النخلة اتحفرت جوة جسم العربية من قوة الاصطدام
و نبدأ بقى التعليقات على الحادث:
اولا فشل فى عمل انظمة الفرامل ABS
ثانيا و الاهم عدم فتح ايا من الوسائد الهوائية
ثالثا انقلاب السيارة بكل سهولة رغم اصطدامها من الامام و ده يدل انها غير امنة ابدا على الطرق و بالمناسبة كانت هاتتقلب بينا قبل كده اكتر من مره لكن ربك ستر
ومن هنا بدأنا نطالب بحقنا
اولا نخاطب التوكيل فى خط الشكاوى يرد يقلى سيب بياناتك و هنرد عليك و لا مجيب مرة تانية يقلى لازم تجبهلنا التوكيل عشان نفحصها و نقلك ايه المشكلة احاول افهمه انها مدمرة تماما و لو ونش راح يشيلها هاتدمر اكتر و انا اعايز افحصها على حالتها كده مافيش فايدة المهم ماكنش قدامى غير انى اسمع كلامه و اوديها التوكيل لكن قبل ماروح سألت ناس معارف كتير فى توكيلات قالولى عمرك ماهتاخد منه مليم بل بالعكس ممكن لو وديتها يقلك سبها هانفحصها و يبوظ فيها اى حاجة تضيع حقك القانونى فرفضت انى اوديها و لجئت لجهاز حماية المستهلك اللى قالى من الاخر و على بلاطة كده طالما العربية بره الضمان مالناش فيه روحوا العبوا مع بعض فى المحاكم بقى لكن الراجل اللى رد عليا كان محترم جدا الصراحة و قال لو متمسك بحقك و ضامن ان انت ليك حق فعلا روح اعمل كشف فى كلية الهندسة و ارفع قضية و ده الطريق اللى انا كنت عايزه الصراحة لكن والدى رفض و قال نحاول مع التوكيل كمان محاولة
و راح المكتب الرئيسى و طلب مقابلة المدير العام لكن السكرتيرة رفضت ابويا قالها هاقبلو يعنى هاقبلو او افضحكوا و افرج الدنيا على النصب بتاعكوا (بصوت عالى) و كان فيه ناس شكلهم مهمين اوى موجودين المهم الحاجة دى جابت ورا على طول و اديتوا ميعاد قالتلوا بس مش النهاردة عشان عنده اجتماعات فراحلوا فى الميعاد الراجل قابلوا و سمع الشكوى و كلم مدير مركز صيانة تبعهم اسمه محمود شمس و بلغوا يطلع مهندس من عنده يشوف العربية فى مكانها و يبلغوا النتيجة
المهندس كان اسمه أحمد بشير راح عند العربية و كشف عليها بالجهاز و لم يجد اى اخطاء فى نظام الامان او اى شىء كان عايز يتصلح و كل حاجة شغالة و انا واقف جنبه و باصص فى الجهاز و شايف ان الجهاز لم يجد اى error فمعرفش يحور وقالى كل حاجة سليمة فى نظام الامان قلتله طيب ايه اللى حصل بقى فهمنى فراح و اعد يلف حاوالين العربية و يصورها من كل ناحية و مش لاقى اى حجة يقولهالى راح قالى اصل الخبطة دى مش كافية انها تفتح الايرباج قلتولوا لا ده كلام مش مظبوط اولا انا مهندس ميكانيكا وافهم كويس فى السيارات فلو سمحت قول كلام معقول قال هو بجد ده السبب لو الخبطة كانت جامدة كان الشاسيه اتعوج قولتلوا تعالى اواريك الشاسيه المعووج شافه قالى بس بسيط يعنى و كمان لو جامدة كان الموتور اتكسر قلتلوا نعم هو لازم الموتور يدغدغ ولا يدخل على حجر اللى سايق عشان الايبراج يفتح يقلى اصل العربية شكلها اتقلبت الاول قبل الخبطةاللى قدام قلتلوا العربية مخبوطة من قدام الاول بشهادة الناس اللى كانت جوه العربية و بشهادة الشهود على الحادثة اللى منعرفهمش وشهدوا فى المحضر فاعد يفكر فى حجة رابعة و بعد شوية قالى اصل الخبطة متركزة قدام من تحت الشاسيه فالحساسات محستش بيها قلتله ازاى يعنى اذا كان الاكصدام و الصدر و الكبود مخبوطين و كمان الكتالوج بيقول بالنص:"يمكن لأكياس الهوائية SRS ان تنتفخ إذا تعرضت المنطقة السفلية لسيارتك لصدمة قوية" فزهق منى و قالى هى دى الاسباب اللى عندى و الحادثة ماكنتش كافية انها تفتح الايرباج من الاخر الرسالة اللى هو جاى عشان يبلغها بس بطريقة غير مباشرة عن طريق انه يتحجج بأى حجة تطلع التوكيل من القصة عشان يبقى ملهمش دعوة طبعا والدى اتعصب جدا و قالوا خلاص متشكرين يا بشمهندس واضح ان الناس لازم تموت الاول عشان الايرباج يفتح متشكرين لسيادتك و انا هاعرف اجيب حقى ازاى
لجأنا لاخر حل و هو قضية بقى رحنا قبلنا محامى طلع ماعندهمش اى فكرة عن السيارات و لا وسائل الامان و لا اى حاجة و بدل منشرحلوا القضية قعدنا نشرحلوا يعنى ايه اصلا ايرباج بس خرجنا من عندو فاقدين الامل و قرر والدى انه يستعوضها عند ربنا و باعها
ارجو من كل الناس تحذير معارفها من العربية دى و نشر الكلام ده على الفيس بوك يمكن تنقذ حياة واحد كان هايشتريها لانها فعلا بدون مبالغة سيارة للموت السريع و طبعا عشان تحذروا الناس من وكيل تويوتا فى مصر اللى مش فارق معاهم حياة الناس ولا عملوا اى رد فعل و حاولت اراسل توكيل تويوتا فى امريكا عشان اشتكيهم و احكيلهم المشكلة لكن هما عارفين اللى فيها ان حياة المواطن عندنا رخيصة اوى فردوا قالولى راسل التوكيل فى بلدك لكن ده لو عندهم كانت ممكن توصل انه يستدعى كل الموديل ده و يفحصه و يعوض المتضرر لكن هناك بقى مش هنا
و ياريت حد يقولى ازاى ارفع صور الحادثة من الكمبيوتر عشان كل ما اعمل ارفاق ملف يقولى "جارى عمل صيانة ... برجاء عمل اعادة تحميل للصفحة"
ولزم التحذير لاكون اخر ضحايا هذه السيارة لا تنسوا النشر و الدعاء لنا ربنا يعوضنا :_Alshmokh22[1]:
وفى النهاية الحمد لله على كل حال