هيا دي كمان فيها مخالفة؟؟؟

**Dr\Mohamed** · 16-06-2014 07:38 PM

يا جماعة أنا عربيتي عليها ورقة على الزجاج الأمامي ناحية اليمين ملزوقة من الداخل مطبوع عليها الماركة والموديل والسنة وتاريخ وصول السفينة بيها لمصر يعني الورقة إللي بتبقى على العربية وهيا جديدة وبصراحة أنا مشلتهاش

بس لقيت واحد بيقول على المنتدى إن الإستيكارات ممنوعة علشان بتحجب الرؤية فهل دي كمان نفس المشكلة ممكن حد يوقفني علشان كده؟؟؟

**Mohamed_Ayman** · 16-06-2014 08:49 PM

هو ممكن يقول لك تشيلها ، بس معتقدش لدرجة مخالفة ، إلا لو الموضوع تلكيك

**walidzakzok** · 16-06-2014 10:58 PM

اي حاجة تعوق الرؤية مخالفة

وممكن تتاخد عليها مخالفات طول مانت ماشي ومش دريان

**J A G U A R** · 17-06-2014 12:25 AM

فى الايام دى ممكن

**ahmedelrayan** · 17-06-2014 11:51 AM

يا جماعة انا حاسس شوية كدة انهم هيحددوا نوع الموسيقى اللى نسمعها فى العربية واللى يسمع موسيقى غيرها ياخد مخالفة هو فى ايه

**mody112** · 17-06-2014 12:05 PM

بتحجب الرؤية بالنسبة لمين بالظبط للى سايق العربية ولا لامين الشرطة عشان مش هيشوف اللى جوه العربية ؟
طبعا هما ميهمهش اللى سايق العربية يشوف ولا ميشوفش المهم هما اللى يشوفو كل حاجة جوه العربية .
وبعدين هى اخر حاجة سمعناها انهم منعوا الملصقات الدينية فقط على السيارات فطالما الملصق بتاعك مش دينى متخفش

**walidzakzok** · 17-06-2014 02:01 PM

السبحة او العروسة الصغيرة تحت مراية الصالون تعتبر مخالفة خلي بالك

**Dr\Mohamed** · 17-06-2014 02:13 PM

على فكرة يا جماعة اللاصقة دي عندي على الزجاج الأمامي في الجنب اليمين فوق يعني فعلا بتحجب رؤية السماء وممكن لو طيارة نازلة من السماء من فوق وجاية من اليمين بدون كلاكس ممكن فعلا مشوفهاش وأخبطها ...... ربنا يهدي