قفلة كهرباء في ذراع النور تتسبب بحريقة لولا لطف الله في السيارة هل هذا طبيعي ؟؟

السلام عليكم

انا عندي سيارة شيفورليه اوبترا 2007 اوتوماتيك , السيارة فجاة وانا ماشي لقيت النور العالي علق حاولت ارجعه واخبطه لعله يزبط .. لقيته علق خالص .. وبعديها شميت ريحة شياط جامده وقفت العربية لقيته لسه منور والريحة زادت جدا وطلع معاها دخان من عند ذراع النور .. طفيت العربية وشلت المفتاح وفجأة لقيت النار مسكت في الذراع بتاع النور وولع وكان هيولع في العربيه كلها لولا لطف الله اني قدرت الحقها بسرعة قبل ما تنتشر .. فعايز افهم .. هل ده طبيعي؟! في عربية يحصل فيها قفلة تولع نار بالمنظر ده؟؟ انا حاولت طبعا افصل البطارية معرفتش عشان كانت محتاجة مفتاح وانا مكانش معايا .. ياريت المتخصصين يفيدونا ...

ودي صورة الدركسيون..
http://s13.postimg.org/psf5j3v7r/20140615_231316.jpg
http://s13.postimg.org/813j4nft3/20140615_223230.jpg

لا حول ولا قوة الا بالله قدر الله وما شاء فعل الحمد لله انك لم تصب باذى ولم تحترق السياره كلها ولحقت الموضوع الحمد لله على سلامتك كمان مره هي طبعا مفزعه وتزعل بس معلش قضاء اخف من قضاء حاول تعرف السبب وتراجع التوكيل طبعا السياره مش فى الضمان يمطن الاخوه ينفعوك براى تحياتى والف سلامه

قدر الله وما شاء فعل وحمد لله على سلامتك هو حضرتك كنت مركب زينون وبعدين اللى انا مستغربه ان اى حاجة فى العربية يحصل فيها قفلة المفروض الفيوز يضرب على طول بس الحمد لله والله المستعان

قدر الله وما شاء فعل الحمدلله . المهم انت مركب زينون او لمض اعلى من الاستاندر من غير متركب كات اوت؟؟؟؟

قدر الله وما شاء فعل وألف سلامة عليك وربنا يخلف عليك
ممكن يكون حصل تأكل في السلوك ولمست في بعض مع وجود بعض الزيوت او الشحوم على اجزاء التوجيه الميكانيكية أدت للاشتعال ومنها للأجزاء البلاستيكية
دا مجرد تحليل شخصي
المهم ان حضرتك بخير

يا ساتر يا رب
الحمدلله انك سليم وكله يتصلح بسيطه بإذن الله

الف سلامة ممكن يكون ماس كهربى او قفلة فى دراع النور

الحمد الله قدر الله ماشاء فعل ده مش طبيعى شكلك محسود

ممكن ذى ما الاخوة قالوا ... و ممكن اسبراى ملمع التابلوة للاسف بيعمل كدة

أكيد حضرتك مركب لمض أعلي من غير كتاوت و هي اللي سيحت الدراع .. صح ؟

الحمد لله انها جت سليمة
عندنا اوبترا مانيوال في الشغل عملت نفس المشكلة بس السواق لحقها وفك البطارية قبل الدخان ما يتحول لنار وتم تغيير دراع النور
ربنا يسترها علينا جميعا

أتذكر من سنتين جار ليا معاه لانوس 2008 و نفس السيناريو حصل معاه و كان راشش سبراى قبلها بيومين و ملمع الدراع و التابلوه و الكهربائى شخص الموضوع بأن الملمع بالمواد اللى فيه أتسرب و عمل اللخبطه ديه.

happened to me - I changed the light arm

car lanos 2008, but thank Allah no fire only smoke

بس ده عيب خطير فى العربية المفروض ان الضفيره على فيوزات وكتاوت نور اى قفله تضرب فيوز وده عيب فى التصنيع للعربية واضح انهم مش حاسبين امبير الفيوزات دى كويس وحتى لو مركب لمبات اعلى الحمل كله على كتاوت النور مش الدراع انصحك ماتسبش حقك فى الموضوع الخطير ده وارفع قضية على التوكيل واطلب تعويض عالى وده علشان الملايين اللى اشتروا نفس الموديل التوكيل يراجع العيب ده وبراحتك !!!

اقتباس:

---

المشاركة الأصلية كتبت بواسطة aw2100

بس ده عيب خطير فى العربية المفروض ان الضفيره على فيوزات وكتاوت نور اى قفله تضرب فيوز وده عيب فى التصنيع للعربية واضح انهم مش حاسبين امبير الفيوزات دى كويس وحتى لو مركب لمبات اعلى الحمل كله على كتاوت النور مش الدراع انصحك ماتسبش حقك فى الموضوع الخطير ده وارفع قضية على التوكيل واطلب تعويض عالى وده علشان الملايين اللى اشتروا نفس الموديل التوكيل يراجع العيب ده وبراحتك !!!

---

بس صدقني ف اي عربية مهما كان نوعها و عن تجربة
لو مركب لمض عاليه من غير كتاوت المفتاح بيتحرق و يسيح و انتا و حظك يا تلحقه يا يولع ف العربية
مهما كان النوع او الموديل
الموضوع مش موضوع فيوزات علي ما اعقتد هو الكهربا الزياده بتحمل ع الدراع و تسخنه فا يسيح

اقتباس:

---

المشاركة الأصلية كتبت بواسطة eng.salama93

بس صدقني ف اي عربية مهما كان نوعها و عن تجربة
لو مركب لمض عاليه من غير كتاوت المفتاح بيتحرق و يسيح و انتا و حظك يا تلحقه يا يولع ف العربية
مهما كان النوع او الموديل
الموضوع مش موضوع فيوزات علي ما اعقتد هو الكهربا الزياده بتحمل ع الدراع و تسخنه فا يسيح

---

مفتاح النور لازم يركب على كتاوت فى اى عربية محترمة علشان المفاتيح عموما عبارة عن ريش ضعيفة لاتتحمل امبير عالى ودراع الأشارات والمساحات الكل لازم كتاوت لازم
ولازم فيوزات على كل التوصيلات لمفاتيح العربية ده عنصر امان لازم فى اى عربية محترمة ولو مش موجود تبقى مصيبة زيي ماحصل فى الشيفرولية ديي !!!

الف شكر على اهتمامكم جميعاً .. ردا على الاسئلة اللى الاخوة طرحوها فانا فعلا والله مش مركب زينون ولا اي اضافات ,في النور خالص ,, والسيارة متلمعتش بملمع التابلوه ده من مدة طويلة .. بس انا حاسس اني بستخدم الدراع النور العالي كتير بلليل (لاني مكنتش اعرف اني لما اعكس اتجاهه بيثبت النور العالي وانا كنت بفضل ماسكه كتير ... فممكن يكون ده اللى حرقه بس مش للدرجادي برضو !!

اقتباس:

---

المشاركة الأصلية كتبت بواسطة محمد الزيني

الف شكر على اهتمامكم جميعاً .. ردا على الاسئلة اللى الاخوة طرحوها فانا فعلا والله مش مركب زينون ولا اي اضافات ,في النور خالص ,, والسيارة متلمعتش بملمع التابلوه ده من مدة طويلة .. بس انا حاسس اني بستخدم الدراع النور العالي كتير بلليل (لاني مكنتش اعرف اني لما اعكس اتجاهه بيثبت النور العالي وانا كنت بفضل ماسكه كتير ... فممكن يكون ده اللى حرقه بس مش للدرجادي برضو !!

---

عادى انت ممكن تستخدم النور العالى لمدة طويلة امال لزمته ايه انك تشغله مدة قصيرة علشان ما يتحرقش ؟؟؟!!!! و الاهم ان كل السويتشات فى العربيات المحترمة بتبقى سالب زى دراع النور و الحمل كله على الكتاوت الموجب او الفيوزات علشان لو فيه قفلة زى اللى حصلت الفيوز يضرب او الكتاوت يضرب انما زى العربية ديه الدراع هو اللى واخد موجب هو اللى يسيح ديه مشكلة و مصيبة و خطا قاتل فى كهربا العربية و متسيبش حقك لان المصيبة ديه ممكن تحصل مع حد تانى و الحمد لله ربنا ستر معاك لان واحد تانى ممكن لا

لا حول ولا قوة الا بالله
ربنا يعوضك خير

باشا سؤال انتا كان في مشكلة عندك في الدراع وانتا مشغل نور التبلوة وبتيجي تقلب نور تلقي نور التبلوة فصل تقنة ملمس وتخبط علي الدراع تاني يشتغل .
المشكلة دي عندي ورحت لكهربائي فك الدراع ويمين شمال قالي مافيهوش حاجة انتا بيتهيقلك
ربنا يستر لي ان كهربا الاوبترا مش عجباني