شراء bmw فى السعودية ومشاكل قطع الغيار والصيانة وإعادة البيع

**mostafaomran** · 20-06-2014 02:33 AM

السلام عليكم ورحمة الله وبركاته

انا جديد فى السعودية (الرياض) ومقبل بإذن الله على شراء سيارة قريباً، وفكرت فى BMW مستعملة ولكنى وجدت أن اسعارها فى بعض الاحيان رخصية بشكل مقلق، وسمعتها الرائجة هنا على ما يبدو سيئة هى وأغلب الأوروبى من حيث أسعار قطع الغيار والصيانة وسعر إعادة البيع وسهولته.

ولأنى أعرف أن كثيراً من الأفكار الشائعة قد لا يكون صحيحاً، فحبيت أسأل هنا فى المنتدى لو حد ليه تجربة مع BMW فى السعودية فيما يخص هذه النقاط؟!

هذا الرباط هو فقط مثال واحد على سيارات اخرى كثيرة مثلها:
BMW 523 (2007), 45,000 SR

Excellent condition BMW 523 For Sale - بي ام دبليو سيارات في الرياض الرياض | دوبيزل السعودية

برجاء النصيحة والتفصيل فيها قدر الإمكان.
أيضاً بكام يتوقع بيع نفس هذه السيارة بعد إستخدمها لمدة سنة بشكل جيد؟

وشكراً مقدماً

**Adnfalcon** · 20-06-2014 02:39 AM

الاوروبي مش رائج زي الياباني فدول الخليج عامه لتفوق تكيف الياباني غالبا و رخص قطع الغيار وبالتالي توافرها .. العربيه دي تمنها كده أقل من 85 ألف بالمصري
اضرب الرقم ده في 3 او 4 لو حبيت تشتري واحده زيها هنا

**minicooper20** · 20-06-2014 03:05 AM

هى سعرها هنا كده لاكنى لا انصحك بيها مستعمله
لان السعودين مهملين فى الصيانه بشكل كبير
و العربيه دى بتصرف و هنا المصنعيات و قطع الغيار نار
روح لسياره زى الكرولا او الكامرى و او السوناتا
من الاخر حاجه تريح دماغك
انتا جاى فتره و ماشى و خلى البى ام لى مصر
كلامى عن تجربه مريره فعلا

**borio1704** · 20-06-2014 03:33 AM

عايز تركب مستعمل في السعودية خليك في الياباني والكوري

الأوروبي هنا سمعته سيئة جدا ومفيش حد بيركبه مستعمل غير المصريين.. وكلهم بيرجعوا يغيروا للياباني والكوري بعد كده.

خلي بالك.. أقل مصنعية هنا 100 ريال وانت طالع.. وكمان قطع غيار البي إم مولعة لوحدها

لو عايز ممكن تجيب مستعمل بنفس مستوى الأسعار.. ممكن تجيب كامري 2009 .. سوناتا 2010.. إلنترا 2012

التويوتا هنا رقم 1.. وقطع غيارها ومراكز الصيانة في كل مكان... وأسعار المستعمل منها أعلى من غيرها ومش بتنزل بسهولة ﻷنها غالبا ما بتعطلش.. وبالتالي مش محتاج تروح لصنايعية كل شوية وهتوفر مصاريف الصيانة المهولة هنا.

**Batman372** · 20-06-2014 02:49 PM

الفكره ان العربيات الاستعمال فى الخليج خصوصا البى ام و المرسيدس سعرها مغرى جدا يعنى بى ام حديث بما يعادل 85 الف !!! يا بلاش ... دى فى مصر مش اقل من 190 الف و حتكون افضل كثيرا كحاله نظرا لحاله الشوارع النظيفه ..
يعنى هو الكسبان ... و التفكير انها فرصه و مش تتعوض ...

انصحك انك تروح تكشف فى التوكيل جيد جدا ... و لو الحاله ممتازه و مش محتاجه اى مصاريف ... حاول تكسر شويه فى سعرها و اتكل على الله ... حتى لو تكاليف صيانتها عاليه ... دى بى ام و مش حتعطل كل يوم :)
فى المقابل حتستمتع بيها جدا ...

غير كده لو عايز العملى و اقل تكلفه يبقى كما الاخوة نصحوك خليك فى اليابانى ... عيب الكورى فى الخليج ان سعر اعاده بيعه واقع و يخسرك كتير ...

تحياتى ...

**ahmediz2000** · 21-06-2014 02:17 PM

البي ام والمرسيدس والاوربي عموما سعره رخيص في المستعمل مشكلتهم في الصيانة وقطع الغيار .. بس عموما نصيحة من واحد مجرب اشتري مستعمل من الوكالة او علي الاقل اكشف في الوكالة نفسها ما تكشفش في مراكز الصيانة تعبانين وبيمشوا البيعة .. وما تشتريش من الحراج كله نصب وانعدام ضمير

**HISHAM80** · 21-06-2014 06:16 PM

نصيحه عن تجربه يتشتري موديل حديث معداش عليه 5 سنين فئه خمسه على الأقل لأن بيكون عليها ضمان وصيانه مجانيه 5 سنين غير كده بلاش ألا لو عندك خبره كويسه في العربيات لأن معظم الورش نصابين وملهمش في تصليح العربيات أو الوكاله طبعا اسعارهم غاليه بس جوده الشغل مضمونه عيبهم الوحيد الزحمه خصوصا في الرياض غير كده العربيات دي تحفه بس لما تكون مزبوطه معظم العربيات المستعمله في السعوديه مبتمسكش سعر يعني لو نزل موديل جديد تخسر 20000 على الأقل يعني من الأخر تشتري حديث حاله ممتازه تكون من المالك الأول غير كده بلاش

**HISHAM80** · 21-06-2014 06:22 PM

المشاركة الأصلية كتبت بواسطة batman372

الفكره ان العربيات الاستعمال فى الخليج خصوصا البى ام و المرسيدس سعرها مغرى جدا يعنى بى ام حديث بما يعادل 85 الف !!! يا بلاش ... دى فى مصر مش اقل من 190 الف و حتكون افضل كثيرا كحاله نظرا لحاله الشوارع النظيفه ..
يعنى هو الكسبان ... و التفكير انها فرصه و مش تتعوض ...

انصحك انك تروح تكشف فى التوكيل جيد جدا ... و لو الحاله ممتازه و مش محتاجه اى مصاريف ... حاول تكسر شويه فى سعرها و اتكل على الله ... حتى لو تكاليف صيانتها عاليه ... دى بى ام و مش حتعطل كل يوم :)
فى المقابل حتستمتع بيها جدا ...

غير كده لو عايز العملى و اقل تكلفه يبقى كما الاخوة نصحوك خليك فى اليابانى ... عيب الكورى فى الخليج ان سعر اعاده بيعه واقع و يخسرك كتير ...

تحياتى ...

كلام حضرتك مظبوط العربيات الحديث حالتها ممتازه وطبعا سعرها لقطه بالنسبه لمصر f10 من 95000 ريال عيبها الوحيد أن سعرها بنزل في السنه الواحده من 15000-20000 الكوري في السعودي مطلوب وماسك سعر لأن قطع العيار متوفره