بعد رحلة بحث طويلة و حيرة بين اختيارات كتير ...ركبت كروز و اقتنعت بيها و معايا دلوقتي بقالها 1000 كيلو
عارف طبعا ان دي فترة قليله عشان اقيم العربية ... بس هنقول تقييم مبدئي يعني

الشكل الخارجي
ماشاء الله العربية شكلها فخم و جميل "عارف انها ازواق طبعا" و معايا اللون الابيض و عاجبني اكتر لانه نادر فيها و مش منتشر

الاداء
قريت هنا ان سحبها بطئ و بتاع بس انا شايف انها بتشد كويس و بتجري جدا و قليل لما تحس بسرعتك الا لو بصيت ع العداد هتتفاجئ بنفسك و طبعا الرادارات اشتغلت تاني

الارتفاع عن الارض كويس برده و خصوصا ان كان معايا رينو اسكالا كانت بتحك في الطوب اللي ع الارض

الداخل
التابلوه عملي و شيك و وضعيه السواقه مريحه
الكنبة اللي ورا اتقال انها ضيقه ... برده في رأيي انها معقولة .. مش واسعه جدا و مش ضيقه نهائيا
و الكرسي بيعلي و يوطي عشان تظبط رجلك زي ما بتحب ... انا معليه علي الاخر
الدريكسيون تليسكوب و ده برده بيريح لو عايز ترجع الكرسي لورا ع الاخر هتشد الدريكسيون عليك


عيوبها لحد دلوقتي معايا
مفيهاش USB و مكان التخزين اللي في الباب صغير و الموبايل بيقع منه ....هههههه بسيطه طبعا بس كنت متعود علي غير كده في عربيتي القديمه

خايف من حاجتين و ياريت اللي معاهم العربية يطمنوني
استهلاك البنزين ""لان العربية تقيلة و خايف يكون ده هيسحب لتر او اتنين زياده عن المتوسط بتاع 1600""
السخونية في الحر الجامد ده " لان دورة التبريد اوربي و اعذروني لان الاسكودا كانت مكفرة سيئاتي بسبب الموضوع ده "

في المجمل
أول 1000 كانوا ممتعين و يارب العربية تكمل علي كده
بااااااااااركولي