السلام عليكم :)

وجمعة مباركة ان شاء الله

امممم الايام الاخيرة دى ناس كتيير اشتكت وعملت مواضيع من ان ليهم جيران عندهم كلاب حراسة مزعجين او كلاب بتسبب رعب للسكان او هجوم كلب على طفلة ( ربنا يشفيها)

انا ماعنديش اى مشكلة مع الناس الى فوق دى بس المشكلة ان ناس كتييير من الاعضاء لما ردو على الموضوع اقترحو تسميم الكلب والى اقترح ضربة بالنار وحاجات زى كدة !!!!


اولا من الناحية الانسانية دة كلب وروح واصحابة بيكونو متعلقين بية جدا جدا جدا

ثانيا من الناحية الدينية دة حرام ( تقدر ترجع للمراجع وتااكد من الكلام دة )

ثالثا من الناحية المدنية او الجنائية غالبا الكلاب دى بتكون مترخصة من مديرية الطب البيطرى وواخدة تطعيمات وليها رخصة ورقمها موجود فى السجلات يعنى لو انت اذيت الكلب من حق صاحبة يروح يعمل محضر ضدك وبتتخذ الاجرائات ضدك وبتبقى جناية


بس احنا لية ندخل نفسنا فى الكلام دة كلة ؟؟؟؟

ما تكلم صاحب الكلب بطريقة احسن وتنصحة يعنى لو الكلب بيعمل ازعاج ب الليل ومش بيخليك تنام

ممكن تقول لصاحبة يشتريلة اطواق مانعة للنباح ودى موجودة فى كل مكان ويلبسهالة باليل بس

لو الكلب بينزل يتمشى مع صاحبة فى الشارع وانت خايف منة ممكن تطلب من صاحبة يلبسة كمامة فى الاوقات دى

ولو قلقان من انة يعدى اى حد ف الاحسن انك تسالة هو اخد التطعيم السنوى بتاعة ولا لا ؟

او تطلب منة انة يدرب الكلب الشراسة ب الامر يعنى يهجم لما صاحبة يديلة الامر


انا شخصيا عندى كلب حاليا وكان عندى اكتر من كلب قبل كدة ومربيهم فى عمارة خاصة ولما كان حد من الجيران بيشتكى من حاجة كنت بانفذهالة لانهم احترمونى ( مع انة الكلاب مترخصة وداخل العمارة عندى ومش ممكن يعرفوا يسموها او يدخلولها ) بس دة من باب احترام الجار مش اكتر

ف لو انت عندك مشكلة من كلب جارك اتكلم معاة او ابعتلى رسالة وقولى سبب المشكلة اية وانا اقولك على الحل وتبلغة لصاحب الكلب وان شاء الله الموضوع يكون احسن وتبقى نظرة المجتمع للكلاب على انها حيوانات الليفة ومصاحبة للاطفال مش وحوش جعانة

واسف لو طولت عليكم