السلام عليكم ورحمه الله وبركاته
كل سنة وانتو طيبين بمناسبة شهر رمضان الكريم ، أعاده الله علينا بالخير وبالبركات إن شاء الله ...

كنت فى حيرة كبيرة جداً من كام سنة علشان أشتري عربية ، و فى الأخر رسيت على رينو ميجان موديل 2005-2007 وفضلت اقرء عنها كتير فى المنتدى هنا من مواضيع قديمة جداً لحد أجدد المواضيع وكنت خلاص ناوي اشتريها بعد ما عرفت ايه هى مميزاتها وعيوبها ، وكمان عرفت اسعار قطع غيارها وعرفت هجيبها منين ... بس للأسف مجبتهاش علشان حصل ظرف مادي مخلنيش ادفع أكتر من 35 - 40 فى عربية .. وبدءت هنا الحيرة ترجع تاني ، تجيب ايه يا عم سامر .. تجيب ايه ؟ ودورت كتييييييييييييييير جداً واقارن بين دى ودى لحد ما رسيت على الاكسارا -- وهى موديل 2001 .. 1600 سي سي لون نبيتي ، مانيوال + تكييف + كاسيت سي دى و يو اس بي + سنتر + زجاج امامي كهربا + مرايات كهربا ) -- علشان : ملقتش عربية اوربي كويسة فى رينج السعر دة ،، وكمان انا ماليش فى الكوري والياباني وكمان عارف ان السيتروين عمتاً و الاكسارا خاصةً اعتماديتها عالية والحمد لله ودة عن تجربة 4 شهور من امتلاكها ( يعني معطلتش منى ولا عملت حركة ندالة فى الطريق غير مرة واحده ،، وهبقى احكي عنها فى موضوع تاني ) .. وكمان قطع غيارها فى الحنين ( بس مش أوى ) .. تقفيلها ممتاز جداً تسارعها مرضي جداً جداً .. كماليات كويسة الحمد لله .. عربية حمالة قاسية .. و واسعة إلى حد ما من جواه .. وكمان استهلاك البنزين كويس إلى حد ما برضو ( فى مرة قولت هخلص البنزين اللى فيها وبعدين اروح افولها و اصفر العداد و اشوف هتعمل كام كيلو لحد ما تفضى وافولها تاني ، المهم عملت كدة فعلاً ولما جيت افولها تاني مرة العربية كانت عامله تقريباً 460 كيلو .. ولقيت فيها بتاع 12 لتر كمان بنزين مع العلم ان التنك بتاعها 55 لتر تقريباً فأنا مش عارف الاستهلاك كدة كويس او لاء مع إنى مش بمشي بيها فى طرق سريعه وسفر وكدة يعني جواه البلد كلها ... يعيب العربية فقط أنها واطية جداً .. يعني الكنبة اللى ورا لو حملت فيها شخصين ، خد أى مطب وانت متطمن انك هتحك فيه .. و إن شاء الله هعمل بيها تقرير قريب

نخش فى موضوعنا اللى انا عاوز اتكلم فيه .. وهو انى عاوز اظبط العربية شوية بقا .. يعني اجيبلها طقمين سماعات للابواب ( 4 سماعات يعني ) وعاوز اعرف اجيب انهى نوع و الاسعار ايه ومنين ( انا مركب 4 سماعات فى الطابلوه الخلفي ) دة غير كمان ان فى 2 تويتر فى الطابلوه الامامي .. يعني تقريباً العربية فيها 10 سماعات فاضل بس اركب سماعات الابواب الاربعه ...

وكمان عاوز اجيبلها 2 فوج لايت وياريت لو فى حد عنده فوانيس امامية وخلفية معدله اجيبها منين وبكام .. و اعمل فرش للعربية ( علشان اللى موجود فيها فبريكا بس عاوز احافظ عليه قبل ما يتهان اكتر ) .. و كمان عاوز اجيب طقم طاسات ليها ، او لو هجيب جنوط اسبور ... و كمان مسند يد أمامي .... دة غير انى عاوز اغير اللمبات بتاع النور الامامي علشان عاوز ضوء اقوي من اللى راكب فيها ,,,, عاوز اعرف كل الكلام دة بكام ومنين وايه هى الماركات اللى اجيبها بالنسبة للحاجات اللى فيها ماركات زى اللمبات و الجنوط والسماعات ..

ياريت لو حد يقدر يفيدنا فى الكلام دة أكون شاكر ليه جداً جداً ..

الموضوع اللى جاى إن شاء الله هيكون تقرير عن العربية بالصور + بعض المشاكل اللى قابلتها وايه اللى عرفت احله ( بالاسعار ) وايه اللى معرفتش احله ...