الموضوع: ملحوظات اول قياده ل نيو سيرتو

المشاركة الأصلية كتبت بواسطة hisham_epe

الحمد لله استلمت نيو سيراتو EX FO من اسبوعين, امبارح كانت اول قيادة طويله, القاهرة -اسكندريه عن طريق العلمين و العوده اسكندرية-القاهرة من الطريق الصحراوى اللى فيه تقريبا اكتر من 25كم مدقات قبل بوابات اسكندريه , كنت عايز اخلص ال 1000 كم الاولى و لاحظت الاتى, يا ريت اللى معاه العربيه يقول رأيه, و لكم الشكر:
1- العربيه جميله و ممتعه فى القيادة, ثابته و ماسكه نفسها على الطريق.
2- دواسة البنزين تقيله شويه فى الحركه من الثبات, يعنى على الطريق بعد اى مطب لما بدوس بنزين بحس ان الدواسه تقيله شويه , انا كعب رجلى بيبقى على الارض و المشط على الدواسه و لما رجلى كلها بتبقى على الدواسه ال RPM بيعلى و صوت الماتور بيعلى و العربيه بتفط , حاسس انى مش عارف اسوق, عايز اعرف استخدام الدواسه الصح.

الدواسه دي امرها سهل في صيانه الالف يبقوا يظبطوها اما بالنسبه للاستجابه هيا فيها تاخير بسيط جدا وهايظبط مع الوقت لان الكمبيوتر والفتيس باخدوا طبع سواقتك

3- فيه صوت طقطقه مع الفرمل لو العربيه نازله عى منزل و الطريق واقف, يعنى لما بمشى شويه و اقف شويه بيبقى المشى بالفرامل , فى الحاله ديه بسمع صوت طقطقة.

الطقطقه دي لو هيا زي طقطقه الاحتكاك لما تمسك فرامل وتسيب فده طبيعي علشان تطبيع التيل وهايختفي لما الفرامل تطبع

4-بعد ما مشيت فى طريق اسكندريه- القاهرة اللى مليان حصى و طوب , قلت ارفع العربيه و اشوف لو فيه حاجه مش طبيعيه, الحمد لله, مفيش حاجه , بس لاقيت ان مفيش تصفيح للموتور, وكمان لاقيت فيه صدى فى جزء من الكوبلن و بالتحديد الجزء اللى جنب كوتشة الكوبلن اللى فى النص, هل ده طبيعى و لا اقوللهم عليه فى صيانة ال 1000 .

صدي الكوبلن كنت باشوفه زمان في معظم العربيات المستعمله وبتبقي موديل سنتين فاتوا مثلا ومااعتقدش انه مؤثر... بس قولهم عليه في الصيانه

5-ناس كتير من ملاك العربيه قالوا ان عفشتها ناعمه, بس الحقيقه العفشه ناشفة شويه, انا بحس بأى تغير فى جودة الطريق, يعنى العربية ديه تعتبر اختبار كويس لجودة الاسفلت, فما بالكم بالمدقات, الكاوتش كنت ظابطه ع 32, هل العفشه بتنعم بعد الصيانه .

العفشه ناشفه شويه انما مش مدمره زي بتاع الشيب اللي فات ولا حتي زي الالنترا الجديده... ومع الوقت السوست والمساعدين بيريحوا شويه
6- حطيت وصلة USB فى ال USB port عشان اشحن الموبايل, هل ده افضل ولا اجيب شاحن سيارة و اركبه ف الولاعة.
مااعرفش افيدك فيها
7- شغلت مثبت السرعه ال cruise لما بزود السرعه بال (+) و ال (-) الRPM بيعلى ل 2 مره واحده و ينزل .
ماتشغلش المثبت في التليين لمسافه طويله لان الصح انك ماتثبتش علي سرعه واحده لمسافه طويله
لو دوست + بيسقط نقله وده الميكانزم في العربيه والمفاجأه انك لو فضلت دايس عليه 3 ثواني هايسقط نقلتين
ولو انت مثبت السرعه بالفعل وطالع مطلع هاتلاقيها سقطت نقله لواحدها
كل ده طبيعي
ربنا يكفيك شرها ويباركلك فيها

و شكرا جزيلا للى نصح بشراء العربيه

موضوع الصدا ده بسيط وغير مؤثر ....اي حد يروح بنزينه ويتفرج علي العربيات من تحت (العربيات الجديده) هايلاقي الصدا بتاع الكوبلن ده عادي
بس قولهم عليه في التوكيل من باب التلكيك
الواحد من كتر ما بيسمع عن التوكيل استنتج ان المهندسين وظيفتهم انهم يطمنوا الزبون ويهمشوا شكوته مش وظيفتهم تصليح واقناع العميل