محتاج رأيكم يا جماعه: تأجير السيارات هل مشروع مربح ارجو الافاده لو سمحتوا

**karimbow1** · 21-06-2014 03:35 PM

السلام عليكم ورحمة الله وبركاته
كنت عايز أخد رأيكم يا جماعه في مشروع تأجير السيارات هل هو مربح ولا لا وايه الأنواع المفضله في التأجير للشركات ولو أجرت فيرنا أو لانوس جديده ممكن يتأجروا بكم في الشهر

يا ريت يا جماعه اللي يعرف يقولي عشان الموضوع ده مهم قوي

**Merooxx** · 21-06-2014 05:33 PM

متابع جدا بس يارب حد يرد

**shiko85** · 21-06-2014 07:40 PM

المشاركة الأصلية كتبت بواسطة karimbow1

السلام عليكم ورحمة الله وبركاته
وعليكم السلام ورحمة الله وبركاته
كنت عايز أخد رأيكم يا جماعه في مشروع تأجير السيارات هل هو مربح ولا لا ؟
الموضوع مربح بس لازم تتقى ربنا
انا بقولك كده لانى شوفت اللى ابتدى بعربيه واحده و بقى عنده فوق الـ 20 و خسر ده كله بعد كده و اللى كمل بما يرضى الله و ما شاء الله دلوقتى ربنا اكرمه جدا
وايه الأنواع المفضله في التأجير للشركات
ده راجع لكل شركه على حسب نوع الشركه
فالملاكى اكتر عربيات مطلوبه كورولا - النترا - لانسر و فيه مرسيدس - بى ام بس مش كتير
و العربيات الــ 4*4 و البيك اب

**omar101970** · 22-06-2014 10:37 AM

شوف يا باشا للأسف ما فيش سيستم صح للموضوع دا فى مصر
شوف انا باشتغل برا فى الخليج وطبيعه شغلى متنقل
يعنى كل يوم فى بلد وفى مكان بألى على الحال دا سبع سنين
ودايما بأجر عربيات اروح اى مكتب ايجار واخد العربيه وفى نفس اللحظه يتسجل على السيستم انى اللى سايق العربيه وطبعا متحمل اى مخالفات تحصل طول فتره الأيجار.
طيب تعالى شوف فى مصر يقولك لازم تمضى على ايصالات امانه على بياض وكلام عبيط كدا.
طيب لقدر الله لو حصل حادثه للعربيه.
هنا انا بأجر فول انشورانس يعنى لو حصل اى حاجه باعمل محضر فى الشرطه وارجع العربيه لشركه الأيجار وشركه التامين بتشيل كل حاجه.
طيب فى مصر بتقى مصيبه وولو التكلفه عشره الاف يقول صاحب شركه الايجار انا عاوز 30 الف 15 تكلفه اصلاح و15 تمن عطلتها.
انا الحمد لله عندى عربيه فى مصر ولكن عمرى ما حافكر انى أأجر عربيه فى مصر.
أنا مش اصدى اخوفك بس انا شايف ان فى المشكله ان مافيش سيستم وسايبين الناس تاكل فى بعض.

**eng/ahmed_go** · 22-06-2014 11:30 AM

شوف يا باشا الموضوع هنا في مصر مش سهل لازم يكون عندك دايرة علاقات قويه مع الداخليه والتامين ..... لانك هتقابل اشكال ضاله كتير
غير كده معظم شركات الايجار بتكسب بالنصب والاحتيال يعني يديك العربيه و يدعي انك تخبطها لان لو خبطه هتكلفه 100 هياخد منك الف

**friendship7897** · 22-06-2014 12:01 PM

لازم تظبط شركة أولاً
وحسب الشركة ممكن تقرر العربية تكون أيه ؟
يعني غالباً شركات البترول اللي بتستأجر سيارات بالسائق
ودي لمصلحة عربيتك إن أنت تكون اللي بتسوقها
وبتكون غالباً لتوصيل مهندسين للعمل والعودة بهم
والعربيات المفضلة التويوتا أو اللانسر أو الإلنترا
وربنا يوفقك