-
حكايتى مع سيراتو 2015
[justify]انا من الأعضاء المتفرجين فى الغالب لكن بصراحة انا اتعلمت حاجات كتيييير جدا منكم فقررت النهاردة انى اشارك محبى السيراتو تجربتى ...
طبعاً عارفين الحيرة القاتلة قبل ما تشترى عربية زيرو انا كان هدفى فئة 160 الف فبالتالى كنت بقارن بين ( النترا , الفلونس , السيراتو ) مع احترامى للألنترا ومالكيها لكنها كانت خارج الحسبان بالنسبة للفلونس عربية محترمة جداً لكن انا كنت ميال للسيراتو
توكلت على الله وقررت أجيب الفئة EX FO وكيل اللون Titanium... سعرها طبقاً للوكيل 162.500 نزلت على سمير ريان اتفق معايا على 163 وكوبونات خصم على الصيانة بقيمة 500جم من مركز صيانة السبع ...
وأخيراً استلمت المزة بتاعتى :Copy of m-s5: بداية أنطباعى عنها جميل من أول الفرش الداخلى وتطعيمات الجلد فى الكراسى فعلاً صالون محترم تعليق كل من ركب العربية معايا كان على مساحة الأرجل فى الكنبة الخلفية بالمقارنة بـ الفلونس , الألنترا , الأسترا .. السيراتو تكسب
سافرت بالعربية السويس علشان أرخص فى الطريق بعد ما تعدى 120 كم صوت الكاوتش للأسف عالى وأعتقد أن نوعية الكاوتش السبب وحسيت أن العفشة ناشفة شوية لكن بعد ما رخصت فضيت الهواء ومليتها نيتروجين على 32 حسيت بفرق ملحوظ .
بعد ما رجعت القاهرة غيرت لمبات الفوانيس الأمامية للمبات philips xtreme vision ودواسات Sparco قلت لازم أدلعها
نتكلم عن أداء ... أداء الموتور مميز وطبعأ دة معروف عن مواتير الكيا تسارع ممتاز عربية جاهزة معاك ...
الفرامل .. أول بداية تجربة حقيقة للفرامل كانت على طريق القاهرة – السويس الساعة 4.30 م السرعة 180كم الأسفلت متعرج من العربيات النقل .. المهم داخل باخد غرزة بين عربيتين نقل أتفاجئت أن العربية الأمامية فرملت ومفيش حل قدامى غير أنى أدوس فرامل بكل قوة ... رغم أنى قلبى جامد فى السواقة لكن بصراحة خفت .. العربية ماشاء الله فرامل قوية و ABS أشتغل ولا حسيت بـ over steering ولا تعوييم ولا أى حاجة .. الحمد الله ربنا ستر
نتكلم عن النقطة المهمة وناس كتيير أتكلمت فيها ( الثبات ) العربية ثباتها كويس لكن المشكلة فى نظام التعليق الخلفى torsion beam من عيوبه أنك تحس بتنطيط مع مطبات الهوا ودى حقيقة لكن فيه فرق بين تنطيط العربية وعدم ثبات العربية ..محترفين السواقة هيفهمونى ..
عموماً لو حد قلك السيراتو مش ثابتة أتفرج على صورة عداد عربيتى على طريق القاهرة – الأسكندرية يوم 22-6-2014على 200 كم وعلى فكره أنا كنت ماسك الموبايل بأيد والتانية على الدركسيون :wink10: .
http://nileup.com/up/uploads/nilemotors_14034272921.jpg
http://nileup.com/up/uploads/nilemotors_14034272922.jpg
ودى كانت حكايتى مع 1400كم مشيناهم انا والسيراتو ..
[/justify]
-
ربنا يباركلك فيها ويكفيك شرها
بس حاول تسيطر على نفسك شويه وبلاش جري كتير لان واضح انك جراي
أنا عارف ان العربيه مغريه بس والسرعه حلوه مفيش كلام بس سلامتك اهم :Copy of m-s5:
-
للاسف ختمت موضوعك بقمة الاستهتار و عدم المسئولية.
يريت حضرتك متكررش الصور دى تانى لانها ممكن تكلفك حياتك و حياة ناس تانية ملهلش ذنب و لا نفسها تشوف صورة 200 km و لا حتى تركب سيراتو
يريت يبقى عندنا مسئولية اكتر من كدة.
-
الف مبروك العربية و ربنا يحفظك
اوعي تتغر بالعربية واتمني ان الجري دة يكون للتجربة بس لا غير مش عادة يعني
ما شاء الله
-
الف مبروك وبلاش التهور كدا مع انا عارف سعات متقدرش تمسك نفسك بتحصل معاية شخصيا و تلاقى نفسك زى المجنون على البنزين بس حاول تسيطر على نفسك
-
ماشاء الله عليك وعلى العربيه بس ياريت متجريش خصوصا مع احترامى انك مش ركب المانى بمجرد متقولها اوقفى هتوقف بمجرد احساسك انك عايز تهدى وماشاء الله على السيراتو بجد عربيه تحفه ربنا يحميهالك ويديك خيرها ويكفيك شرها
-
الف شكر على تعليقاتكم الجميلة .... أستاذى الفاضل الصورة كانت لتوضيح نقطة معينة فى موضوعى ( ثبات السيارة ) , قبل الوصول 200 كم كنت حسبت الحالة الفنية للطريق والحالة الفنية للعربية والحالة المرورية وعوامل كتييييير لو فاضى ممكن أوضحهالك .. فبرجاء عدم أتهامى بالأستهتار وعدم المسئولية والطريقة الهجومية فى أسداء النصيحة من مجرد صورة .. أقرأ عن الـ logical jumb صدقنى هتفيدك كتيير فى رؤيتك للأمور
-
عربيه ممتازه ما شاء الله و مبروووك
وبالنسبه للسرعه معظمنا بيقفل عدادات و بننصح بعض منعملش كده !
ايه التناقض دا ! انا عن نفسي طول ما انا مسافر ع طول الطريق من 160 - 185 وساعات 195 وربك ستار
اصل دا تعود و ياما شوفت حوادث عربيات مطحونه بس نعمل ايه
-
مبروك ....و من غير زعل بلاش سرعه احنا خايفين عليك والله ليس الا.
-
ربنا يباركلك فيها
و يديك خيرها و يكفيك شرها
ربنا يستر طريقك ,,, أنا أعلى سرعة جبتها حتى الآن 90
Content Relevant URLs by
vBSEO 3.6.0 PL2