السلام عليكم
عايز طرق التخلص من العصبية اثناء قيادة السيارة
عرض للطباعة
السلام عليكم
عايز طرق التخلص من العصبية اثناء قيادة السيارة
اول حاجه تقفل الزجاج تماماً وتشغل تكيفك عشان تعزل نفسك عن الدوشة الكتير اللي بره العربيه
تاني حاجه بلاش تشغل اغاني صاخبه وعاليه عشان النوعية دي من الاغاني بتشد الاعصاب وبتبقى من الاخر على تكه يعني اي حاجه هتستفزك في الشارع هتنفجر على طول ممكن تشغل قران او موسيقى او اغاني هاديه او تسمع برنامج على الراديو
تالت حاجه سرعتك تبقى على متوسط الـ 90 او 100 على اقصى تقدير ودي طبعاً بتختلف على حسب انت ماشي فين يعني جوه البلد غير على الصحراوي مثلاً المهم متمشيش بسرعه تخليك عندك ولا سنه توتر لازم تمشي على سرعه تتماشي مع الطريق بحيث انك تحس انك متمكن تماماً من العربيه ومطمن
طبعاً بعد كل ده هتلاقي ناس مستفزه كتير حواليك تخلي الواحد يطلع عن شعوره لما تقابل حد من دول حاول تفكر نفسك ان النرفزه مش هتعمل حاجه وان تجاهل الشخصيات دي هي افضل حل
طبعاً قبل ما تركب العربيه حاول تكون اصلاً هادي ومش مشدود من الاساس لانك لو ركبت العربيه وانت عصبي اصلاً لازم هينعكس ده على سواقتك
حاجه اخيره بقى حاول تنزل بدري قبل مشوارك بفتره مناسبه عشان تبقى ماشي براحتك ومش مستعجل وميبقاش الوقت عامل ضغط نفسي عليك
تمام يا غالى بالنسبة للتكيف العربية مفيهاش تكيف ومقدرش اقفل الزجاج فى الجو ده كدة اموت من الحر
تانى حاجة انا بشغل قرآن بس مش اغانى
ثالثا : انا سواق ميكروباص يعنى العربية مش بتاعت مشاوير وبس دى شغالة على خط معين
حاولت اكتير اتجاهل اللى بيعصبنى والكلاكسات المقرفة لكن مفيش فايدة
نصيحة بقى منى عاشرتها بنفسى هدى نفسك وأنت سايق لان حصل موقف مع صاحب أعرفة وكنت معاة هو وولدتة وكنا ماشيين على الاتو ستراد قرب عباس العقاد وفجاة جة واحد سوق مكروباص وزنك علينا جامد وأنت أدرى بيهم مننا ولما صحبى بيقولة مش تحاسب بكل أدب وزوق أنت كدة هتموتنا راح الافندى أستغل الادب وسب لصاحبى وأمة الى قعدة جانبة ومشى ولا اكن فى حاجة راح صاحبة بمنتهى السرعة زنق علية ونزل جابة من أفاة وبالطبنجة على دماغة ونزل الركاب الى محدش أتعاطف معاة أبدا ولان صاحبى ضابط شرطة وهو شتمة بأمة الى كانت معانا السوق دة قعد متكتف فى الكامين الى على الدائرى 3أيام سلوة الضباط والامنة والعساكر .
المهم الادب والاحترام مفيش أحسن منة حتى لو بتتنرفز عود نفسك أن مش كل الناس بتعرف تسوق وأنت مش دائما على صح وممكن تقع فى أيد واحد تقولة كلمة يسببلك مشكلة ولا يمد ايدة عليك او يكون صاحب سلطة يفترى أنت وأحنا فى غنا عن ذلك كلة فربنا يسترها معك ومعنا
كبر مخك من كل الحواليك و متخدش كل حاجة على اعصابك و الى يكلاكس يكلكس و الى يتشقلب يتشقلب و الى يولع يولع
ذكر الله... اشغل نفسك وانت سايق بالتسبيح والحمد والذكر... حاتلاقى نفسك لو حد ضايقك وانت سايق حاتتكسف تقطع الذكر عشان تشتم حد ... وحاول تشغل قرأن مرتل وانت سايق وتركز فيه
ما هو اللي انا كاتبه ده كلها حلول حاول تشوف ايه المناسب منها لظروفك ونفذه
وطالما بتشغل قرآن حاول تركز معاه اكتر ما هو مش ممكن هتبقى مركز مع القرآن وتشتم حد مثلاً مهما اتنرفزت احترامك لكلام ربنا للي شغال هيمنعك تغلط
انا عارف الموضوع مش سهل بس بالتعود هتلاقي الموضوع بقى احسن
وربنا معاك
بطل تسوق !
دى اخر حاجة تسال عنها فالسواقة