ضبط زوايا للنيو سيراتو!

**Dr.a.osman** · 22-06-2014 05:53 PM

السلام عليكم
استفسار كده بخصوص النيوسيراتو. أنا لسة مكملتش الألف الأولى بعربيتى .العربية عندى الدركسيون فيه تقل ناحية عن ناحية و بيبقى باين أوى لما بأعمل ال flex steer على الاسبورت مود و حاسس كمان ان العربية مش محكومة على الطريق و المناورة بيها مش قد كده مع العلم اني مستلم العربية كده و مخدتش بيها أى مطبات و العربية مبتحدفش. فى الغالب الموضوع ده متعلق بالزوايا بتاعة العربية. عشان كده كنت عايز أسألكم أحسن فرع توكيل بيضبط زوايا و ميطلعش عينى عشان أخوكم دقيق حبيتين.
شكرا

**Dr . Mohamed** · 22-06-2014 05:57 PM

حضرتك اتعودت على العربية
قصدى مشيت بيها كتير شوية
انا معنديش تحكم باور خالص و حسيت نفس الإحساس لكن تانى يوم اتعودت عليه و لقيته جميل جدا

**Ahmed redaa** · 22-06-2014 06:14 PM

ماتقلقش انت بس لسه ماتعودش على سواقتها - وبعدين خليها دايما على الcomfort mode مش هاتحس بتقل - طالما مش بتحدف ومفيش تصفير مع الفرامل او الدوران يبقى الزوايا فل

**Dr.a.osman** · 23-06-2014 12:14 AM

يعنى الموضوع تعود بس؟؟؟! أصل أحساس الدركسيون بتاعها غريب شويه. خصوصا لما بلف شمال بحس العربية كأنها بتترحل كلها مش بتلف بنعومة.

**Hany Saad** · 23-06-2014 09:38 AM

لو لا قدر الله العربية فيها مشكلة و ان شاء الله مش هيكون فيها و هتكون بس مسألة تعود هيبقى العيب من منظومة التوجيه زى علبة الدريكسيون او الاسكترا و لكن مش من الزوايا
زى ما الزميل الفاضل قال لحضرتك، طالما العربية مش بتحدف و لا بتصرخ فى الملفات و لا الدريكسيون مش متسنتر يبقى متلعبش فى زوايا العربية علشان متخلقش لنفسك مشكلة جديدة

الف مبروك العربية الجديدة

تحياتى