الموضوع: أعطال إنجكشن البيجو روا

أعطال إنجكشن البيجو روا
الموضوع كتبته فى صفحة المحركات حبيت اجيبه بيجو علشان أهل البيجو

حبيت أكتب الموضوع علشان اللى عنده مشاكل فى الإنجكشن
أول حاجة يعملها يروح يضبط كمبيوتر العربية على الجهاز "كمبيوتر عليه تعريف كمبيوتر العربية"

العربية معايا من 2007 ما كنش فيها حاجة السنة اللى فاتت فجأة و بدون أى مقدمات و أنا على سرعة عالية 100كم
العربية تفصل تماما و لما أضغط بنزين تشتغل تفصل زى ما أكون مشغل كونتاكت من غير ما أدور المارش !!!؟؟؟!!!
ده كارثة طبعا لإنى بأكون على طرق سريعة المهم أول حاجة عملتها تنظيف دورة الوقود بالمنظف stp
و بعدين جالى كهربائى متخصص نضفنا البوابات العربية بعد تنضيف البوابات بقت تمام لمدة إسبوع
رجعت تانى بعد كده
روحت لميكانيكى قالى حساس الكرنك غيرته
مشيت العربية يومين كويس و التالت رجعت زى الاول
روحت لحد تانى قالى حساس الكامه إشتريته و غيرته
مشيت شوية و بعدين رجعت
كل ده و أنا بأدفع و بأقول رب يكرم و ترجع زى الأول
العربية لسه عامله 50000 كم لإنى ما باستعملهاش كتير

أخيرا
روحت صيانة بيجو القطامية
الناس محترمة بشكل يرجعنى لزمن فات على مصر
من مدير الصيانة المهندس المهذب وائل إلى الفنيين المحترفيين
حتى الأستاذة المهذبة السكرتيرة و هى المسئولة عن إستلام القيمة المالية
و تسليمى فاتورة الصيانة و إيصال الدفع
ناس بجد رائعيين
الأستاذة ردت علي و أنا فى الطريق و حولتنى للمهندس وائل ليصف لى كيف أصل لهم
الراجل المحترم وقف بره هنجر الصيانه فى الشارع مستنينى و أنا معاه على التليفون
و الحمدلله حدد المشكلة اللى مدوخانى بقيلها سنة و شهرين
طلعت حسب التقرير فى الفاتورة

1 ضبط براميترز السيارة على الجهاز
2 تنظيف الاستيبر موتور

لصيانة بيجو أحمد عمارة القطامية جزيل الشكر
للمهندس وائل و لرجاله و للأستاذة نفيين السكرتيرة ووافر الشكر و التقدير و الإحترام