الموضوع: عفواً : أيه أحسن سم كلاب موجود في السوق ؟

المشاركة الأصلية كتبت بواسطة y a r i s

عشوائية وبس ... خليني ساكت يا احمد بيه. خليني ساكت
ده الواحد قلبوا فيه مرار من جوووووووووووه .... ده احنا يوماتي. بيعدوا علينا اشكال مايعلم بيها غير ربنا ... كان في عربية مثلاً هونداي فضي. الي هيا. I 20 مفيمه بالكامل حتى البرفريز الامامي بتوقف قدام البيت عندي وتبقى شغاله وقافل الشبابيك ومشغل التكييف ... فانا قلت وانا مالي يمكن حد من المباحث بيراقب حد او مستني مسيرة وفي النهاية بعد شهور وايام. اكتشف البنت. بنت جرنا المحترم المصونة الي ساكنين هناك اخر الشارع صاحبها بيوصلها فبيوقف يريح قدام بيتنا ساعه ساعتين كده .

وخد عندك بقه على المورستااااان الي انا عايش فيه .... من اول المنتخب القومي بتاع الحارة الي بيتشكل بعد الساعه ١ بالليل ويلعبوا كورة بالليل. لحد جارنا الناحية التانية الي عمرتوا في وش عمارتنا مأجر شقتوا. لشوية عيال في الجامعة. ويلعبوا دومنة. وعشرة طاولة في البلكونة حتى مطلع الفجرررر وعلى هيء. وميء وقه قههه طووووول الليل. وياريت حاجة تدحك. اهو الواحد وهو في سريروا يسمع نكته مثلاً. إلا كلها. ... واحد يقول لصاحبوو فاكر لمن كنا في الجامعة هاهاهاهاهاهاه. فاكر لمن البت قالتلك امشي من هنا. (( هاهاهاههاهاههاهاهاهاه )). فاكر لمن ابوها شافك. هاهاههاهاها واحنا طبعاً نايمين. في ؤوض نومنا وسمعين كل الهبل ده ... وعمال اقول في سري في عرض النبي. يارب رحمتك وعفوك نفسي أنام .

والتاني بقه. يرد عليه. طيب فاكر انتا لمن خدنا العربية. هاهاهاهاهاااااااااا ... فاكر لمن الظابط وقفك. هااااا هااااا هاااااا ... وعلى كده طوووووول الليل !

والصبح بقه على. وش الصبح يجيلك. ٢٠ واد بيبع انابيب. وتك تك تك .... وعلى خمسين عربية روبابكيااااا .... على سبعين نص نقل محمل. بطييييييييخ وكل واحد معلق ميكرفون. اكبر من ميكرفون الجامع في اكتر من واحد. جايب نص نقل ومعلق ميكرفون وبيبع كناااااااافة. .... كنافة يا عالم يا نااااااااااااااااااس !!! ده ايه الهبل الي بقينا فيه ده !

وعيل تيت ابن تييت بيعدي الساعه ١٢ باليلل. بين العماير وبين الفيللل وينده ويقول. الدورة المشووووووووي. ايوه الدورة ... يعني انا مش فاهم لاي درجة وصلنا فيها

علماً المنطقة الي واخد فيها انا هوس هوس وراقية
بس كااااااااانت دلوقتي بقت عربخانه

وكل ما ربنا يكرمنا بليل هااااادي ونقول اخيراً هنااااااام ونرتاح من غير دوشة ونستمتع بهدوء الليل. يطلعلك الكلب ده. ويفضل. يهووو هووووو طول الليل. على اي قطة ماشية في الشارع يعني بصراحة الوضع صعب صعب. واعصاب الواحد تعبت الحقيقة .

ويعني اذا الواحد مكنش يرتاح في بيتوا. هيرتاح فين !!! وكل ده واضف على ذلك. الموتسيكلات الي بتعدي باليل وشكمنها مخروم. قال يعني عملي نفسوا (( هارلي. ... او موتسيكل سباق )). ولا التكاتيك. الي كل واحد مركبلي سمعات بعرض الكورسي الخلفي وبازوكة تهز الارض هززز ومحبكش يعلي الصوت غير الساعه ١ او اتنين بالليل ... طبعاً كل ده ورئيس الجهاز مش حاسس بيناااااا. والمحافظة في الطراوة خالص .

حتى يوم الخميس والجمعة والسبت الي هما المفروض اجازة وتقول ياااااااااااه اخيراً هنرتاح وننام شوية بتلاقي فرح الشاطر حسن والاميرة مرجانة طول الليل. وحتى مطلع الفجر دي جي. وسمعات. تسمع اكتوبر كلهااااا واغلب الناس بقو يسكوا الشبابيك. ويشغلوا التكيفات. حتى لو الجو حلو بس معذورين عاوزين يناموا عاوزين يرتاحوا. ... ومش بس كده بعد الفرح. بقه. يجي خمسين او ستين شمروووووخه. من البومب الي بينور السمااااااااا. ويصحي امة لا اله الا الله الواحد حتى لو نام واقفل الشباك وشغل التكيف يسمع صوت الانفجرات من هنا يقوم مفزوع ويقول يا ساتر يا رب ده ضرب ناااااار ده ولا شماريخ ويطلع يبص يلاقي السما بتنور. الساعه تلاته الفجر شماريخ !!!

يعني أديني عقلك.... لذلك الكلب الي في الحته ده هو القشة الي قسمة ظهر البعير. الليلة الوحيدة الي ربنا يرحمنا فيها يجي الافندي يفضل طول الليل يهو هوو بغباء. ده غير هجوموا على المصللين بالذات صلاة الفجر بيعتبر اي واحد راح يصلي فهو حرامي ... في اكتر من ان الواد ابن التيت كان بيلعب استغماية هو وصحابوا. فدخل الجامع فالكلب دخل وراه وطبعاً حصلت مشكلة والامام و المشرفين على المسجد طبعاً هتكلم مين جماعه بوابين وغفر ... يعني برضوا الاخوه هنا بيقولوا خدوا في عربيتك سربوا. ... المشكلة الكلب شرس جداً وغير كدة قذر وكلو براغيت وقراض عربيت مين الي هركبوا فيها دي :) ... اعمل ايه دبروني

رغم مءسويه الموقف بس طريقتك موتتنى من الضحك
فكرتنى كنت فى دبى و كنت ماجر سياره و نزلت اشترى سجاير من بقاله فا ركنت فى موقف واحد من عماره انا معرفق لقيت دوريه شرطه جايه و مش فاكر خالفونى ١٥٠٠ درهم تقريبا علشان وقفت مكان واحد بيركن هنا هههههههه
مصر دى ملهاش حل

الحل بجد انك تنقل من المكان ده لكومبوند او ميني كومبوند في اكتوبر ولا بوابين ولا بائعة متجولين ولا ولا اللي يعيبه بس الصيانة ومصاريف الصيانة وفروقها اللي ممكن تكون صحيح او تكون مبالغ فيها...انا ارشح لحضرتك بما انك في اكتوبر ميني كومبوند بيتا جاردنز بينك وبين م الرماية 10 كم وهو في طريق مصر فيوم الصحراوي

انا لسه جاي من شقتي التانية فعمارتي ف قطة والدة ومعاها قطة واحدة وانا كل مااروح شقتي اجيب ليها لبن مخصوص عشان تشرب
المهم روحت النهاردة وجايبلها كيس لبن ورايحلها مخصوص ولقيت مفاجأة ان القطة الام ميتة وبنتها نايمة جنبها
حزنت جدا جدا فلقيت البواب نازل فبقوله مين موت القطة دي قالي دي قرفانى ياباشا عمالة تهبش ف كياس الزبالة اللي بيطلعها السكان وتاكل منها وتوقعها فالارض فقومت جايب سم وموتها
وهو قالي من هنا وانا عليت صوتى فالعمارة وحلفت انه ولا مليم هياخده منى وهقطع عيشه من العمارة زى ماحرم قطة صغيرة بترضع من مامتها
عشان القطة بتهبش ف اكياس الزبالة يموتها يا سلام ع قوة الانسان عندما يفترى ع الاضعف منه بس والله ف الاقوى من الانسان وكلنا هنتحاسب ع افعالنا
هو لو طفل ف الشارع كل يوم وبيلعب كورة وكل يوم يشوط الكورة ف الناس ويضايقهم بيها هل هتروح تموته عشان الناس وعشانك ؟! ولا هتروح تكلم ابوه ولو مش اقتنع تمشيه ؟!