عفواً : أيه أحسن سم كلاب موجود في السوق ؟
مساء الخير ... عليكم يا شباب
معليش انا اسف على سؤالي ده ... بس كنت بسئل عن ايه احسن دوى سم كلاب موجود في السوق. ... عاوز سم يكون. سرو باتع. وميخليش الكلب يموت وهو بيتألم .
ومع اني مربي كلاب. وبحب الكلاب جداً. ... بس اعمل ايه للضرورة احكام ... عيل تيييييت. ابن بواب جمبينا. شاف كلب بلدي. فقال يربيه ولمن كان بيشوفونا ازاي احنا كنا بندي دروس شراسة. لكلاب الحراسة الاصلية . فالافندي كان بيقلدنا بيقلدنا في كل شيء لدرجة اني شفتوا رابط الكلب من رقبتوا بسلبة. وراكب توك توك وبيجري بيه وبيجري الكلب وراه. ... ميعرفش ان امكانيات الكلب البلدي تختلف تماماً عن كلاب الحراسة ... حتى الغذى بتاع كلب الحراسة. هياكل واكل جاف التاني بياكلو من الزبالة بيبعتوا كده لجردل الزبالة ويقلوا روح ألعب وكل ... المهم الكلب ده بيعترض طريق المصليين خاصة. الي رايحين صلاة الفجر. ولانوا كلب غبي. فمبيفرقش بين. سكان الحي وبين الاغراب ويفضل يهجم علي رايح والي جي .... صوت نباح الكلب ذات نفسوا من الاصوات المستفزة جداً ويفضل طووووول الليل مينيمناش من هوهوتوا طووول الليل .
الكلب ده من الاخر. كلب غبي وبلدي ... والي رباه اغبى منوا. ده انا مره وانا رايح الحق المغرب في الجامع. لقيت العيال عمالين. يلعبوا مع الكلب. ومسكين حاجة كده. وبيرموها في بوق الكلب. فالكلب يعضها. وبعدين يشيلوها من بوقوا تاني. المهم قلت يمكن. لعبة. في ايديهم ولا حاجة. لكن. لمن قربت لقيتهم ماسكينة قطة صغيرة نونه. من ديلها. وبيأكلوها للكلب ... طبعاً اتجننت انا من المنظر ده. فشخطط فيهم. لقيت العيال بمنتهى البرائة والخبث الي في الدنيا بيقولوا مش انا ياعموا الكلب هو الي بيعض القطة وعاوز يا كولها طبعاً بعد ايه القطة ماتت. يا عيني متأثرة بجراحها. بمعنى الكلمة ... المهم انا عاوز اخلص من الكلب ده باي طريقة لان بقت الحياة مستحيلة مع وجود هذا الكلب. فياريت. لو حد عندوا طريقة. يدليني عليها يعمل معروف. ... وشكراً
@@@@@@
وتحياتي
عاوز انام , لا للدوشة , ازعاج المدن , ٦ اكتوبر
اقتباس:
المشاركة الأصلية كتبت بواسطة احمد المصرى
اشترى الكلب من الولد ومشيه وخلاص بدل السم ووجع القلب دا
بس انت نبهتنى لحاجه مصيبه ان اكتوبر اصبحت عشوائيات بجد والمستوى فيها بيقل كل سنه عن الاخرى انا اصبحت على مشكله مع جارى واول لما دخلت لقيت موضوعك قلت دى مشكله بلد ولا ايه
عشوائية وبس ... خليني ساكت يا احمد بيه. خليني ساكت
ده الواحد قلبوا فيه مرار من جوووووووووووه .... ده احنا يوماتي. بيعدوا علينا اشكال مايعلم بيها غير ربنا ... كان في عربية مثلاً هونداي فضي. الي هيا. I 20 مفيمه بالكامل حتى البرفريز الامامي بتوقف قدام البيت عندي وتبقى شغاله وقافل الشبابيك ومشغل التكييف ... فانا قلت وانا مالي يمكن حد من المباحث بيراقب حد او مستني مسيرة وفي النهاية بعد شهور وايام. اكتشف البنت. بنت جرنا المحترم المصونة الي ساكنين هناك اخر الشارع صاحبها بيوصلها فبيوقف يريح قدام بيتنا ساعه ساعتين كده .
وخد عندك بقه على المورستااااان الي انا عايش فيه .... من اول المنتخب القومي بتاع الحارة الي بيتشكل بعد الساعه ١ بالليل ويلعبوا كورة بالليل. لحد جارنا الناحية التانية الي عمرتوا في وش عمارتنا مأجر شقتوا. لشوية عيال في الجامعة. ويلعبوا دومنة. وعشرة طاولة في البلكونة حتى مطلع الفجرررر وعلى هيء. وميء وقه قههه طووووول الليل. وياريت حاجة تدحك. اهو الواحد وهو في سريروا يسمع نكته مثلاً. إلا كلها. ... واحد يقول لصاحبوو فاكر لمن كنا في الجامعة هاهاهاهاهاهاه. فاكر لمن البت قالتلك امشي من هنا. (( هاهاهاههاهاههاهاهاهاه )). فاكر لمن ابوها شافك. هاهاههاهاها واحنا طبعاً نايمين. في ؤوض نومنا وسمعين كل الهبل ده ... وعمال اقول في سري في عرض النبي. يارب رحمتك وعفوك نفسي أنام .
والتاني بقه. يرد عليه. طيب فاكر انتا لمن خدنا العربية. هاهاهاهاهاااااااااا ... فاكر لمن الظابط وقفك. هااااا هااااا هاااااا ... وعلى كده طوووووول الليل !
والصبح بقه على. وش الصبح يجيلك. ٢٠ واد بيبع انابيب. وتك تك تك .... وعلى خمسين عربية روبابكيااااا .... على سبعين نص نقل محمل. بطييييييييخ وكل واحد معلق ميكرفون. اكبر من ميكرفون الجامع في اكتر من واحد. جايب نص نقل ومعلق ميكرفون وبيبع كناااااااافة. .... كنافة يا عالم يا نااااااااااااااااااس !!! ده ايه الهبل الي بقينا فيه ده !
وعيل تيت ابن تييت بيعدي الساعه ١٢ باليلل. بين العماير وبين الفيللل وينده ويقول. الدورة المشووووووووي. ايوه الدورة ... يعني انا مش فاهم لاي درجة وصلنا فيها
علماً المنطقة الي واخد فيها انا هوس هوس وراقية
بس كااااااااانت دلوقتي بقت عربخانه
وكل ما ربنا يكرمنا بليل هااااادي ونقول اخيراً هنااااااام ونرتاح من غير دوشة ونستمتع بهدوء الليل. يطلعلك الكلب ده. ويفضل. يهووو هووووو طول الليل. على اي قطة ماشية في الشارع يعني بصراحة الوضع صعب صعب. واعصاب الواحد تعبت الحقيقة .
ويعني اذا الواحد مكنش يرتاح في بيتوا. هيرتاح فين !!! وكل ده واضف على ذلك. الموتسيكلات الي بتعدي باليل وشكمنها مخروم. قال يعني عملي نفسوا (( هارلي. ... او موتسيكل سباق )). ولا التكاتيك. الي كل واحد مركبلي سمعات بعرض الكورسي الخلفي وبازوكة تهز الارض هززز ومحبكش يعلي الصوت غير الساعه ١ او اتنين بالليل ... طبعاً كل ده ورئيس الجهاز مش حاسس بيناااااا. والمحافظة في الطراوة خالص .
حتى يوم الخميس والجمعة والسبت الي هما المفروض اجازة وتقول ياااااااااااه اخيراً هنرتاح وننام شوية بتلاقي فرح الشاطر حسن والاميرة مرجانة طول الليل. وحتى مطلع الفجر دي جي. وسمعات. تسمع اكتوبر كلهااااا واغلب الناس بقو يسكوا الشبابيك. ويشغلوا التكيفات. حتى لو الجو حلو بس معذورين عاوزين يناموا عاوزين يرتاحوا. ... ومش بس كده بعد الفرح. بقه. يجي خمسين او ستين شمروووووخه. من البومب الي بينور السمااااااااا. ويصحي امة لا اله الا الله الواحد حتى لو نام واقفل الشباك وشغل التكيف يسمع صوت الانفجرات من هنا يقوم مفزوع ويقول يا ساتر يا رب ده ضرب ناااااار ده ولا شماريخ ويطلع يبص يلاقي السما بتنور. الساعه تلاته الفجر شماريخ !!!
يعني أديني عقلك.... لذلك الكلب الي في الحته ده هو القشة الي قسمة ظهر البعير. الليلة الوحيدة الي ربنا يرحمنا فيها يجي الافندي يفضل طول الليل يهو هوو بغباء. ده غير هجوموا على المصللين بالذات صلاة الفجر بيعتبر اي واحد راح يصلي فهو حرامي ... في اكتر من ان الواد ابن التيت كان بيلعب استغماية هو وصحابوا. فدخل الجامع فالكلب دخل وراه وطبعاً حصلت مشكلة والامام و المشرفين على المسجد طبعاً هتكلم مين جماعه بوابين وغفر ... يعني برضوا الاخوه هنا بيقولوا خدوا في عربيتك سربوا. ... المشكلة الكلب شرس جداً وغير كدة قذر وكلو براغيت وقراض عربيت مين الي هركبوا فيها دي :) ... اعمل ايه دبروني
