الموضوع: مصر مش أمى ... مصر مراة ابويا !

مصر يعنى الناس اللى عاشت فى مصر وعايشة فى مصر وهتعيش فى مصر , ولما اتكلم على مصر يبقى بتكلم على شعب مصر مش عن انثى مجردة ترتدى علم فى مخيلة الشعراء . شعب مصر يا اساتذة مش غلبان وطيب وقلبه كبير والشركسى ابو بندقية مبهدله ومطلع عينه وهو غلبان هيعمل ايه ! شعب مصر هو الناس اللى بتشتكى منهم , هو الصيع والأفاقين والنصابين اللى بتقابلهم فى شغلك وجامعتك وعمارتك ومعرض العربيات اللى هتشترى منه العربية والجامع اللى بتصلى فيه وبنك الدم اللى بتتبرع فيه بدمك والمصلحة الحكومية والسيرك اللى اسمه الشارع , شعب مصر هو اللى بيتفرج على البنات وهى بتتبهدل وتتعاكس وعلى ست كبيرة بتضرب وراجل شيبة شعره مشفعتلوش ان عيل يهزأه فى مترو , شعب مصر هو اللى كان فى فيصل بيتفرج على الهانم اللى سبت الذات الآلهية فى الخناقة الشهيرة , شعب مصر هو اللى بوظلك عربيتك بالفن المسمارى وكسرلك مساحة الليون وطلع البيت عشان يخطف واحدة , شعب مصر هو جارك الذى لاتأمن بوائقه وصديقك الذى لاتأمن غدره والجالس فى الطريق الذى لاتأمن شره , هو زميلك فى الغربة اللى بيضرب فيك الاسفين التمام وينزلك فى نص السنة عشان يقعد مكانك , شعب مصر هو الصنايعى اللى بياخد اكتر من حقه وميدكش شغل بنص الفلوس ويحلف بأغلظ الأيمان انه لمن الصادقين , شعب مصر هم السنجل ماذرز الكتييير واللى بايعين نفسهم بالرخيص . هو اللى انكر ان فيه يوم آخر بافعاله وضيع اخرته عشان ورث اخواته يبرطع فيه , هو اللى بيشتهى امرأة اخوه وجاره وصديقه , هو القروى اللئيم اللى يبيعك ويشتريك وانت واقف زى الباشا وياكل من وراك احلى عيش , هو المتوسطين اللى بيتكبروا على بعض فى كل مناسبة وغير مناسبة عشان يعوضوا مخزون الوضاعة والدونية المتأصل فى الذات المصرية , هو كل واحد لسة قافل قناة فضائية خارجة ورايح يتوضا عشان يؤدى فرض ربنا , هو اللى بيشهد عليك انك ضربت الراجل اللى لقيته مرمى عالطريق من غير مايكون شاف حاجة , هو اللى بياخد اللطمة ويناولها للى بعد منه عشان اللى بعد منه يناولها للى بعده المهم ميباتش بيها وهى واجعاه , هو اللى مصدعنا انا باجرى عالعيال بربيهم وهو نايم وسايب العيال تتربى فى الشارع .
مفيش حد غلبان الا ولاد الناس اللى اهاليهم ربوهم صح فى زمن غلط ودول اللى شعب مصر مسميهم كروديات وعبط وزباين سقع !

كل شعب يستحق تماما الحكومة التى تليق به (وينستون تشرشل)

المشاركة الأصلية كتبت بواسطة kodak_gti

مصر ملهاش ذنب
الغلطة فى النظام الحاكم لمصر مش من البلد

حسبي الله ونعم الوكيل

سواء مصر أمي او مرات أبويا فا الله يرحمها و يحسن إليها في جميع الأحوال (أنظر التوقيع) ، و يقدرنا ننفد بجلدنا من الناس اللي بتتخانق عالورث سواء حكومة أو شعب ، بصراحة انا مقتنع إن البلد دي ماتت خلاص و لن تقوم لها قومة و محدش يقولي كلام وردي و إبدأ بنفسك و مش عارف إيه .. اللي مخلي الواحد مش عارف يعيش في البلد دي أصلا إنه بدأ بنفسه و ماشي صح و كأن دي غلطته .

الحياة اليومية و النزول من البيت في مصر بالنسبة لي بقي نوع من الإنتحار الإضطراري .

المشاركة الأصلية كتبت بواسطة fiatto

البلد هى ناس البلد وسكانها مش حيطانها وشوارعها , ولما الناس دى تبقى قاسية على بعض وتقطع العقد الاجتماعى اللى بينهم وكل المواطن على المواطن بقى حلال دمه وماله وعرضه يبقى الغلط فى الناس , الصبح ابتدينا بخبر نجاة العضو موتورايزر من حادثة هزلية بفضل ربنا ومن كام يوم بنتكلم فى التحرش والنفسنة والأذى لعربيات الناس والسرقة اللى وصلت لحد خطف الناس من بيوتهم وعربياتهم زى ماجاء على لسان بعض الاعضاء , والناس اللى عوزة تهاجر واللى مش عاوز يرجع , وشباب زى الفل فى المنتدى عجز بدرى .
كل ده بيخلينى اسأل نفسى هو انتى ليه يامصر مبتسمعنيش انا واللى زيى , ليه كلمة البلطجى والنفاية والحرامى من ولادك هى اللى مسموعة ؟
يبقى انتى اكيد امهم بس وهم لايقين عليكى كويس , واخيرا اكتشفت الحقيقة انك مش امى ... انتى مراة ابويا !

مش مهم حد يشارك او يعلق
ده موضوع بينى وبينها

والسبب فى ده كله ايه ؟؟؟
ايه السبب ان البلطجى وتاجر المخدرات والمرتشى و....و....الخ ليهم سلطة فى البلد
وبيعملو الغلط عينى عينك
مين السبب فى موضوع التحرش اللى بتتكلمو عليه
مين السبب انك تبقة قاعد فى بلدك وييجى عليك السائح مهما كان جنسيته ويعاملك اوسخ معاملة ....
مين السبب انك لما تسافر اى دولة تتعامل بأوسخ معاملة بردوووو
مين ومين ومين بس هنقول ايه ونعمل ايه ؟؟
لــنا اللــــه

موضوع مميز
بس يجب الاشاره انا هذا عنوان كتاب ربما كان الاشهر قي معرض الكتاب الماضي
شكرا

المشاركة الأصلية كتبت بواسطة MoToRiZeR

سواء مصر أمي او مرات أبويا فا الله يرحمها و يحسن إليها في جميع الأحوال (أنظر التوقيع) ، و يقدرنا ننفد بجلدنا من الناس اللي بتتخانق عالورث سواء حكومة أو شعب ، بصراحة انا مقتنع إن البلد دي ماتت خلاص و لن تقوم لها قومة و محدش يقولي كلام وردي و إبدأ بنفسك و مش عارف إيه .. اللي مخلي الواحد مش عارف يعيش في البلد دي أصلا إنه بدأ بنفسه و ماشي صح و كأن دي غلطته .
الحياة اليومية و النزول من البيت في مصر بالنسبة لي بقي نوع من الإنتحار الإضطراري .

10/10 ياموتورايزر
وعلى فكرة موضوعك بتاع الصبح والحادثة بتاعتك هو اللى خلانى جبت آخرى وعملت الموضوع ده , لانى حسيت انى مكانك وممكن اموت فى لحظة بسبب حيوان مهمل غير مكترث وانك هتبقى مجرد رقم فى سجل ناس كتير ميتة ولا حد هيحس بيك
وليه ده كله يابلد

وماتقولش مصر هيه امي
امك راقدة جوه

ماتقولش هتاخد ايه من مصر
قوول هاتدي ايه لمصر

شكلك مخنوق بزيادة يا صاحبي - بس عندك حق

البلد فعلا باظت من زمان - الواحد خلاص فقد الامل فيها وفي اصلاحها

المشكلة ان الواحد لما كان عايش بره كان بيقول امتى ارجع بلدي حبيبتي - اللى كنت في يوم من الايام بودعها بالدموع في المطار واصبر نفسي واقول كلها كام شهر وارجعلك تاني يا حبيبتي

البلد اللى يوم ما اتعرض عليا اني اسافر واشتغل بره بفلوس كتيرة - قلت ليه اتغرب وبيتي موجود
البلد دي اولى بالمجهود والكفاح

وعلى رأي الاعلان بس متعدل:
البلد اللى حيلتي باظت باظت باظت

وكفاية كده