الموضوع: انطباعي عن سيراتو 2015

بعد حيره مابين شراء المستعمل باسعاره المبالغ فيها وبين شراء الزيرو ,,توكلت علي الله واشتريت سيراتو 2015 خليجي
انا قبل ما اشتريها جربتها لان واحد صاحبي كان معاه الهاي لاين منها وشجعني ان اجيبها
المميزات بدون ترتيب:
1- موديل 2015 واحنا لسه في شهر 6
2- شكل جديد وكويس وقدامه حوالي 4 سنين عقبال ما يتغير
3- ثبات محترم جدا جدا وخاصه لما تخلي الباور علي الاسبورت مود بجد ثباتها مختلف عن باقي الكوري
4- عفشتها كويسه لاهيا ناشفه زي الشيب اللي فات والا هيا طريه زي الالنترا 2007 ( النترا مراجيح) وبالرغم من ان التعليق الخلفي برده دنجل بس مش بيهبد في المطبات زي الالنترا 2014 يمكن لاختلاف السوست والمساعدين...من الاخر العفشه كويسه ومرضيه .
5- الفرامل ممتازه واستجابها سريعه وماهما تكون علي سرعه وتضغط فرامل بتحس ان العربيه بتقف بكل سلاسه ولا تزحف ولا تعوم منك ولا تحس انك هاتتكب علي التابلوه
6- الباور كويس جدا لانهم حطوا 3 انماط قياده وده علشان يرضي كل الازواق ( عن نفسي باحب الكمفورت موود) وفي الطوالي ( نورمال مود)
7- الهاندلينج فيها كويس ..انا لغايه دلوقت ما اتحطتش في مواقف صعبه بعربيتي بس مبدئيا تحس انك متحكم في العربيه كويس
8- عزل الصوت كويس
9- الخامات الداخليه انا شايفها معقوله ...لا هيا حلوه قوي ولا هيا وحشه...بس حاجه زي بلاستيك الابواب الداخليه كنت بافضل انه يبقي جلد..وشكل التابلوه متوسط ( بالنسبه ليا لان الحكايه دي ازواق) انما في المجمل كويسه
10- الفتيس الست سرعات سلس وبيخلي صوت الماتور ناعم وبيقلل في استهلاك البنزين بس اللي بيحب الشد يبقي الفتيس الاربع سرعات افضل لان مدي الغيار بتاعه اوسع..ده مش عيب والفتيس سلس وكويس
11- الماتور صوته هادي ومع الشد صوته بيعلي بس مش مزعج..ماجربتش لسه rpm6
استجابه الماتور كويسه وثابته يعني مثلا لو قارنتها بالالنترا 2007 هاتلاقي الالنترا طلعتها اسرع شويه بس بتموت بعد سرعه 60 لغايه ما توصل 90..انما السيراتو ماتحسش ان فيه نقله في الفتيغ مموته العربيه ويعتبر تسارعها كويس
12- الكماليات...كتيييييير ودي حاجه تتحسب للسيراتو واللي هايشتري هاي لاين مااعتقدش انها هايبقي ناقصها حاجه
13- الاضاءه الخارجيه معقوله ..بس انا هاغير النور الاصفر علشان ماباحبهوش


العيوب:

1- عزل الحراره بتاع التكييف السخن وحش..وانا كنت كاتب موضوع عنه اول ما استلمت العربيه لان مواسير التكييف السخن جنب رجليك ومعزوله عزل ضعيف ..واول ما ركبت العربيه وطلعت بيها علي طريق سريع كنت باحس بحراره طالعه من عند الدواسات....
المفاجاه...انا بقالي يومين باسوق العربيه مسافات وباطلع طرق سريعه وسبحان الله سبحان الله موضوع السخونه اختفي تماما وانا مش عارف السبب ايه...يمكن علشان اختلاف درجات الحراره ...الله اعلم.. يبس انا ناوي كده كده اعزلها والموضوع ده مش بيتكلف اكتر من 200 جنيه لان جزء صغير بس اللي محتاج العزل..ولينا زميل عزلها في التوكيل ب 300 جنيه وبيشكر فيه

المجمل العربيه كويسه (علي الاقل بالنسبه ليا) وربنا يكفينا شرها وشر الطرق وشر عيوب الصناعه ومايحوجنا لتوكيل ولا صنايعي ابدا :))))

المشاركة الأصلية كتبت بواسطة ahmedz310

الف مليون مبروك وربنا يديك خيرها و يكفيك شرها و يبعد عنك وعنها العين
ماقولتلناش جبتها منين وبكام ومواصفتها ايه بالظبط ?

الله يبارك فيك
جبتها يوم 17/6 ..من اسبوع
من جابر عبد الشهيد في روكسي بيشتغل في السعودي والكويتي والعماني فقط
كماليتها:
طاره مالتي
بلوتوث
مثبت سرعه مع كروز كنترول
كمبيوتر رحلات وفيه وظايف تانيه زي التحكم في غلق الابواب وفصل ااضاءه والاشارات الجانبيه....
تحكم في الباور الكهربا ( استاندرد في كل الفئات)
زجاج ملون ( مكتوب في شهاده البانات ومثبوت علي الرخصه)
دلايات
جنط 16
خاصيه فولو مي
فوانيس شبوره
كرسي السائق 3 اتجاهات ( يدوي)
تكييف عادي مش تاتش
الكبوت معزول حراريا ...بس ظهر الشنطه من الداخل مش متبطنه زي الكبوت
immobilizer
abs
single airbag
لو افتكرت حاجه تانيه هاضيفها
العربيه ب 157
اوتو سمير ريان 159 وطبعا بتفاصل معاه
جابر عبد الشهيد اخره بعد مفاصله نزل 250 جنيه :( والدفع كان كاااش