توكيل كيا و أكذوبة الضمان!
حقيقة لم أكن أتوقع أن يكون هذا التوكيل بمثل هذا السوء فى التعامل مع العملاء، وفعلاُ خلونى أقول يا ريتنى جبتها خليجى.
بالرغم من بساطة المشاكل التى حدثت معى ولكن تعامل التوكيل يؤكد لى أنهم يتهربون بشتى الطرق من عمل أى شىء داخل الضمان.
يعنى بيتلككوا علشان يزهقوك و هو أسلوب فعال و يستخدمة معظم الوكلاء الغير محترمين و بيجيب نتائج إيجابية مع الناس اللى زى حالاتى.
الموضوع بدأ بزرار الزجاج الامامى معلق على طول كل ما أدور العربية الإزاز ينزل لوحده قولتلهم عليه فى صيانة الخمسين ألف قالولى لا لازم تستنى و هنعمل أوردر و و و ....
وللأمانة كلمونى بعد أسبوعين و قالولى تعالى غير الوحدة، طلبت أروح يوم السبت قالولى لأ يوم السبت بتاع الصيانات "الحاجات اللى بتجيب فلوس من غير ما يشتغلوا"
اما الحاجات اللى ببلاش دى لازم تاخد أجازه من الشغل و تروحلهم المهم روحت بعد فترة كبيرة كان ميعاد صيانة ال60 الف قالولى حد تانى خدها و هنحجزلك واحدة تانبة عشان انا إتاخرت
قولتلهم ماشى عملت صيانة ال60 الف وقلت للمهندس الباور بقى تقيل أوى الفترة اللى فاتت قالى غير الكاوتش!.
عدى شهر محدش كلمنى كلمتهم على الرقم المختصر ... أى كلام و هنتابع و إزاى و بعد كده ولا حد أهتم.
من أسبوع سمعت صوت خبط فى العربية من قدام والبور بقى أتقل أكتر من الاول كشفت عليها بره فرع القطامية قالولى الميزان عايز يتغير ده بكام قالولى 600 جنيه قولتلهم الضمان ..
قالولى روح أبورواش أو القطاميه. مع ان الفرع ده معتمد بس هو شغال فى الحاجات اللى بتجيب فلوس بس! أهو يزهقوك و خلاص..
النهارده بقى رحت فرع القطامية أشوف أخر التوكيل ده إيه، المهندس دور العربية الإزاز نزل لواحده قالى إيه ده قلتوا بقالى شهرين مستنى الوحدة وانتوا ولا أى إهتمام،
بس المهم أنا مش دى مشكلتى انا عايزك تشوف الصوت اللى أقدام ده أيه.. حرك الطارة قالى ميزان و كأنه عيب معروف فى العربية... قولتلوا الضمان ... قالى ده بره الضمان ....
قلت له انتوا عالم نصابه و فين المدير، جابلى المدير أسمه أشرف عاد نفس الكلام دى بره الضمان ولما إحتديت فى الكلام و قلت له أنكم بتتلككوا علشان متعملوش أى حاجة فى الضمان
و وحده الإزاز دى أنا متأكد انى لو طلبت تغييرها بفلوس هتتطلع فى نفس اليوم، قالى انا ممكن أغيرك وحدة الإزاز النهارده و الميزان تدفع تمنه ... نوع من المساومة القذرة التى لا تتم إلا داخل توكيل غير محترم...
طيب لما هو ممكن تتغير دلوقتى ماكلمتونيش ليه!... رفضت عمل أى شى داخل هذا التوكيل و مشيت و
كلمت خدمة العملاء عملت شكوى و هابعت إيميل لكيا كوريا أقولهم فيه ان التوكيل ده هو سبب السوق السوداء للكيا فى مصر لان الضمان لا قيمه له و ان هذا الوكيل غير جاد و غير محترم فى التعامل مع العملاء.
نصيحه هات الخليجى فلوس أقل و أوبشن أعلى، لان موضوع الوكيل و الضمان كذبه كبيره!!
العربية كيا سيراتوا 2011 إستلام شهر 10