اكسنت 2011 و جابت وش سلندر
السلام عليكم ورحمة الله و بركاتة
ياجماعة انا مش بفهم فى العربيات أوى فأفيدونى أفادكم الله
انا امبارح العربية وقف منى فجاة و مش عاوزة تدور ، ببص عليها لقيتها مفيهاش ميه ولا لمبة الحرارة نورت ولا زفت ، خدتها على ونش ووديتها التوكيل و بعد الفحص قالولى تعالى استلم العربية زى الفل غيرنالك البطارية!!!
بقول للمهندس ازاى بطارية دى فصلت منى وانا ماشى قالى حطيناها على جهاز وقال ان البطارية وحشة و متقلقش العربية دايرة دلوقتى. قولتلة قشطة رجاءا بس ابقى بصلى على يمين الماتور علشان معرق زيت و شوفلى اذا كان ده تعريق طبيعى ولا فى مشكلة. المهم اتصلى بيا بعدها ب خمس دقايق وقالى دى جايبة وش سلندر.
روحتلة بسألة على التكلفة بحسبها 2000 جنية مثلا طلعت لو معدتش ال 10000 يبقى كويس. المهم قولتله ينفع امشى بالعربية علشان اصلحها بره قالى اه بس براحة و متقرصش مشيت بيها كيلو بالظبط لقيت الموتور بينفخ هوا. كلمت الميكانيكى تقريبا كان هيشتمنى علشان حركتها بقوله قالولى ممكن امشى بس مقرصش قالى دول ولاد كلب بهايم. المهم رجعتها تانى علشان يشتغلو فيها.
اسف على الاطالة بس كان لازم احكى القصة علشان عندى عليها كذا سؤال:
- ازاى يحصل ده من غير لمبة الحرارة متنورش.
- اية مفروض رد فعلى قصاد التوكيل فى النقة الاولى و كمان فى حوار التشخيص الغلط للمشكلة و كمان فى حوار انى امشى على العربية وهيا جايبة وش سلندر.
- فى ناس قالولى اعملها عند ميكانيكى أو مركز صيانة بره هيغيرو الجوان و يخرطو وش السلندر و ترجع زى الفل و مش هتتكلف الا ربع اللى هتدفعة فى التوكيل. رأيكو اية؟
أفيدونا أفادكم الله و أسف كمان مرة على الاطالة و شكرا مقدما...
-