عربيتي عملت حادثة ومش عارف اصلحها فين

**samantaamy** · 15-10-2008 04:29 PM

انا عربيتي لانسر 2008الشكل القديم عملت حادثة وفيها تلفيات كتير
.الكابوت - سرابنتينا التكييف - ريدياتير - البطارية - القائم الشمال - الرفرف الشمال - المرايا الشمال - الفانوس الامامي الشمال - الاكصدام الامامي - الخبطة جت في وش التاكيهات والمسامير اتقطمت فمش عارف باز ولا لا -السقف - تقريبا جميع العدة الي في حوض العربية عايزة تتغير
حد يفدني يا جماعة لو صلحتها في التوكيل هتكلف كام ولو صلحتها برة اصلحها فين عشان تطلع زي الي في التوكيل
ارجو الرد في اسرع وقت عشان انا محتار

**mohamedway** · 15-10-2008 04:48 PM

معرفش فى التوكيل هتتكلف كام بالضبط بس مش هتقل عن 40000 جنيه بأى حال من الأحوال و لو مأمن عليها عليها التأمين هو اللى هيشيل التكلفه وطبعا التوكيل أفضل عشان قطع الغيار اللى هيركبها هتبقه أصليه بما فيها نوع الدهان و فى بره التوكيل صنايعيه محترفين ممكن يعملوها سمكره و دوكو كويس بس الأجزاء الميكانيكيه اللى باظت فى رأيى لازم تبقه أصلى.

**مصراوي جدا** · 15-10-2008 05:03 PM

اولا حمد لله على سلامتك انت واللي كانوا معاك اهم حاجه

هو حضرتك مأمن عليها ولا لأ ؟

**samantaamy** · 15-10-2008 05:19 PM

بشمهندس طارق لو حضرتك في الموضوع بتاعي يا ريت تفيديني

**samantaamy** · 15-10-2008 05:51 PM

وكمان يا استاذ طارق العربية كويتي ملهاش وكيل

**Adham** · 15-10-2008 06:01 PM

اولا حدماً لله على سلامتك انت دة المهم

بص ياسيدي الفاضل, سمكري متخصص بتاع حوادث تأمين و مضمون و كمان مش مغلواني و شغلة نضيف زي شغل التوكيلات (هوة اساسا بياخد منها شغل) انزل طريق السويس و بعد بنزينة شل اللي اول الطريق خد يمين في شمال و بعد 200 متر تلاقي ورشتة على شمالك اسمة شحتة
انا اعرفة من اكتر من 12 سنة و مجربية في حوادث عربيات بناخدها منة فابريقة بعد الزراجين و الاستعدال اللازم
و بعد مايخلصها قوللة يوديها لعزت اللي كان شغال مع هاني القاضي دة بتاع دوكو فرن نضيف جدا جدا

و شحتة حايدلك او حايجيبلك اي قطع غيار استيراد او جديد تلزم العربية عربيتة شايعه و حاجتها متوفرة و هوة حافظها ماتقلقش

ربنا معاك