الموضوع: سكودا أوكتافيا a7....دراسة

المشاركة الأصلية كتبت بواسطة amabdelsalam

الصراحة البداية كانت انني عاوز اشتري عربية فى حدود 200-220 وكانت العربية الكيا سبورتاج شادة انتباهي، ابتديت ادور فى المعارض لغاية ما وصلت لمعرض محترم ذو سمعة كويسة، وسألته، فقالي حرام عليك تدفع المبلغ ده فى عربية كوري، فى حين ممكن تدخل فى حاجة ألماني. وكانت واقفة عنده عربية أوكتافيا a7، بصراحة العربية خطفتني من أول نظرة، الفخامة عالية جداً، وأخر شياكة، والكماليات جيدة جداً جداً وابتديت اسأل عن العربية أكتر.
مبدئياً العربية تحفة تحفة، وكنت أول مرة اعرف موضوع الموتور التربو، لما بحثت فى الموضوع، لقيت ان الموتور ده فعلاً جبار، ولكني قابلت شوية نقط عاوزة تفسيرات
أولاً: فيه كلام ان الفتيس ال dsg ده بيعمل مشاكل وده ظهر مع العربيات الفولكس بالذات
ثانياً: العربية الأوكتافيا 1400 ابتدت تقل من السوق والموديل الجديد اللى نازل هيكون بمكنة 1600 وفتيس مختلف غير ال dsg
ثالثاً: العربية الأوكتافيا 1400 محتاجة بنزين 95 وان بنزين 92 مش كويس معاها.
رابعاً: اللى بيأكد المشاكل دي بعض من مسئولي مبيعات شركة أرتوك اللى هي الوكيل وبيرشحوا العربية ال1600 لتلافي ده
بدأت ابحث اكتر فى الموضوع وكانت النتائج كالإتي:
أولاً: بالنسبة لمشكلة الفتيس dsg
معايا زميل فى الشغل اشترى عربية باسات 2014 بنفس الموتور ونفس الفتيس الdsg والزميل ده من النوع اللى بيدرس كل حاجة كويس قبل ما يشتري (زيي كده) ، المهم: ايه يا سيدي موضوع الفتيس ده..قالي بص: الفتيس الdsg ده فعلاً فعلاً كان فيه مشكلة فى عقل الفتيس فى موديلات فولكس 2009-2011 ولكن المشكلة دي اتحلت بداية من موديلات 2012 والفتيس الdsg الجديد مافيهوش المشكلة دي. اللى قاله الكلام ده هو مسئول فى مركز صيانة فولكس.
وبسؤال مسئول المبيعات من أرتوك فى معرض القطامية، أكد لي المعلومة دي، وقاللي اننا مغيرناش أي فتيس فى المشكلة ده فى عربيات سكودا، وان موضوع الفتيس ده منتشر لغاية دلوقتي على اثر السمعة اللى اخدها من موديلات 2009-2011 للعربيات الفولكس وان فيه ناس عملت مشاكل وغيرت فتيس ورجعت عربيات، فأثر السمعة مستمر.
ثانياً: بالنسبة للعربيات سكودا 2015، بناء على السمعة اللى اخدها الفتيس dsg مع عربيات فولكس، ده ادى الى انخفاض المبيعات على الرغم من حل المشكلة فى الموديلات الجديدة، وده خلاهم يفكروا ينزلوا موديل مافيهوش الفتيس ده. وعلشان كده، غيروا موتور العربية علشان يبقى 1600 بدلاً من 1400 تربو علشان يتماشى مع الفتيس الجديد.
ولكن هنا نقطة توقف مهمة، تعالوا ننظر الى الموتورين:
الموتور tsi 1400 سي سي تربو بقوة 140 حصان وعزم 250 نيوتن
الموتور mpi 1600 سي سي بدون تربو بقوة 110 حصان وعزم 155 نيوتن
الموتور الأول من الأخر موتور جبار...وحش...هيخلى العربية ليها احساس مختلف عن الموتور الثاني..واللى اكد الكلام المواقف الأتية:
1- لما عرفت موضوع الموتور والبنزين والموديلات وكلام مسئولي ارتوك..اتصلت بالمعرض وقولتله الغي الحجز وشرحت له اللى حصل، بصراحة الراجل مجادلش معايا نهائي، قالى مادام ارتوك هم اللى قالوا كده خلاص، بس بعد اذنك انا هعمل اتصالات علشان افهم ايه اموضوع. بعد شوية اتصل بيه تاني، وقالي: بعد اذن حضرتك، معانا على الخط الأستاذ أحمد محرز مدير عام شركة ارتوك شخصياً وعاوز يتكلم مع حضرتك، الراجل كلمني، وقالى ان البياع اللى قاللى الكلام ده بياع غبي وهيمشي فوراً، العربية ال1400 عربية جبارة وادائها فوق الوصف، وانه شخصياً معاه العربية دي عامل بيها 76 الف كيلو بدون أي مشاكل، وان كل الموضوع ان البياع بيحاول يسوق لنفسه علشان يبيع العربية الجديدة اللى عنده (علشان دلوقتي معندوش 1400) وان العربية ال1400 هتنزل اول السنة جديدة تاني للموديلات الهاي لاين، وكل ده علشان موضوع المبيعات، وقالي ان العربية مضمونة بضماتن ارتوك لمدة سنتين بدون اي حد لعدد الكيلومترات. بصراحة، بحثت فى الكلام اللى بيقوله، لاقيت ان فعلاً برة نازل اوكتافيا a7 1400 بس هاي لاين، ولقيت كل الكلام اللى على الأنترنت بيقول ان العربية 1400 عربية جبارة جبارة
2- لم اكتفي بكلام مدير ارتوك، نزلت فرع القطامية وقابلت مسئول المبيعات، وحكيت الحكاية، قالي:
• أولاً العربية ال1400 عربية جبارة جبارة، هي قليلة دلوقتي بس هتنزل تاني للموديلات الهاي لاين وان موضوع ال1600 ده نتيجة تراجع المبيعات علشان سمعة الفتيس الdsg من موديلات الفولكس ال2009-2011 نفس كلام زميلي) وبالتالى كل الموضوع موضوع سمعة ليس أكثر
• ثانياُ: العربية فى الضمان، يعني اي حاجة فى خلال السنتين وبدون حد اقصي للكيلومترات مضمونه تماماً
ثالثاً: موضوع البنزين 92
اثناء المكالمة مع مدير شركة ارتوك وكذلك فرع القطامية، سألت عن موضوع البنزين، فكانت الأجابة ان العربية شغالة زي الفل مافيش مشاكل، ولو فتحت غطاء البنزين هتلاقي مكتوب عليه 92-98 يعني البنزين 92 مافيهوش مشكلة، ولكن فيه نقطة، العربية 1400 دي 140 حصان (القدرة القصوى)، وعلشان توصل ليها، محتاج بنزين 95، ولكن فى حالة استخدام بنزين 92، القدرة هتوصل الى حوالى 135 حصان، و هنا: أولاً: انا مش هفضل طاير بالعربية ليل ونهار..ثانياً: لو احتجت اطير واجيب ال140 حصان، هحط بنزين 95
رحت المعرض، وفتحت غطاء البنزين لقيت كلام المدير مظبوط ومكتوب فعلاً 92-98، وبالتالي مافيش مشكلة
ملحوظة: عربية صاحبي الباسات مكتوب تحت غطاء البنزين 95..يعني لو حط اقل من 95، فعلاً ممكن يخرج من الضمان !!! ودي كانت صدمة ليه لما شاف الرقم
رابعاً: موضوع مسئولي المبيعات اللى بيروجوا للعربية 1600...الموضوع ببساطة، انهم عاوزين يبيعوا، ومافيش أكتر من كده، العربية اللى تحت ايديهم علشان يبيعوها هى ال1600، وبالتالي بيروجوا ليها، ولكن لو سألتهم سؤال بسيط زي: هو الموتور ال1600 هيقدر يشيل العربية ويدي الأداء المناسب... (وده السؤال اللى انا سألته لمسئول مبيعات) وكان الرد الصاعق: الأداء معقول بس ممكن فى الطلعة ميبقاش أوي...أوف..وكل ده علشان سمعة فتيس بتاع عربية موديل تاني وكمان موديل قديم، وهم بغبائهم ميعرفوش انهم بيضربوا فى عربية من نفس البراند بتاعهم..هم عاوزين يبيعوا وبس، وده كلام المدير الى اتصل بيه
المهم: توكلت على الله، واشتريت واستلمت العربية 1400 تربو الحمد لله النهاردة...
التعليق الأول: اللهم صلي على النبي..ماشاء الله لا قوة الا بالله...عربية وحش، سحب رهيب، موتور جبار، سهولة فى القيادة، وقمة الروعة والشياكة....
الملخص: لو سمحت...لو سمحت...لو سمحت...بلاش ننساق وراء الأشاعات...احنا الخسرانين
وان شاء الله اكتب ريفيو مع الألف كيلو

الف الف مبروك ربنا يباركلك فيها ويكفيك شرها .. وانا اتفق معاك جدا فى كلامك .. وبحييك على قرارك فى شراء العربيه التربو .. لانها بجد تحفه ماشاء الله ..خصوصا ان حضرتك اشتريت عربيه سكودا الجديده كليا زى ما بيقولوا عليها بره .. ومش مجرد شكل اتغير بس .. لأ دا موتور وفتيس عبقرى بيعطوا آداء عظيم ونازلين على المستوى الدولى .. مش اروح اجيب شكل جديد بموتور وفتيس قديم بيقولوا بينزل لروسيا مخصوص علشان خاطر ابيع وخلاص.. وبعدين موضوع تغيير الفتيس والموتور دا معروف من الاول علشان البيع والكلام دا من ناس مقربين قى المبيعات والتوكيل مش بسبب عيب فى العربيه التربولاقدر الله .. وفى موضوع على المنتدى بيقول ان فيه مشكله فى عربيه 1600 وسبحان الله جايه فى الفتيس وربنا يحل المشكله لصاحبها اللهم آمين ..

الومتور ال1400 تربو في رأيي الشخصي أفضل 100 مرة من 1800 مش تربو ... ألف مبروك و ربنا يديك خيرها و يكفيك شرها و تكتبلنا ريفيو محترم زي حضرتك

الف الف مبرووووك. اختيار ممتاز. ربنا يباركلك فيها

الف مبرووك

الف مبروك

اولا ربنا يوفقك للاختيار السليم
وانا شايف ان كل شخص هو الاقدر علي تحديد متطلباتة
يعني اللي بيحب التكنولوجي العالية والشد والجري اكيد هيروح للموتور 1400 وال dsg
واللي قلقان من حوارات الفتيس وعايز عربية شكل فخم ومتانة ومش فارقة معاة التسارع هيروح لل 1600
يعني خلاصة الكلام كل واحد ادري بمتطلباتة