تحذر من محور عرابى ونفق وكوبرى الحوادث

دلوقتى المفروض ان محور عرابى ده جديد وجميل فعلا وموفر معايا وقت تمام وانا ريح وجى من شغلى كل يوم بدل ما بستخدم محور 26 يدوبك عملوه من هنا وشهر تقريبا واكتشفوا انهم معملوش مواسير تصريف للميه فى النفق وعليه قعدوا يفحتوا فى الاسفلت اللى مابقلهوش شهر بعرض الطريق حوالى 8 خطوط وشكرا على كده ردموا اللى عملوه وماعملوش اعادة رصف !
النتيجة
الخطوط اللى بالعرض مع الوقت بتزيد فى العمق بتعها بسبب هبد العربيات فيها بطريقة غبية وفعلا هتاثر على عفشة العربية والناس الاول كانوا بيخدوا المطبات دى على السريع الجديد بقى ان اى حد غريب ومش عارف الموضوع ده بيخد اول مطب على السريع ويقف على الفرامل اول ميشوف التانى
النتيجة اللى وره بيلبس فيه لانه متعود يخد المطبات على سرعة
لحد دلوقتى رابع حادثة شوفتها انهارده فى نفس المكان فى اول النفق اتجه عرابى وبين تلات او اربع عربيات وانا كنت هلبس بنفس المنظر من يومين وده اللى خلانى اكتب الموضوع واحذر من غباء هيئة الطرق والكبارى
اما بنسبة للكوبرى
منحنى الكوبرى حد جدا وكله برضه بيخده على سرعة متوسطة
شفت عليه حادثتين موتوسيكل قريب واكتر من حادثة فى بداية تشغيل المحور

اتمنى انى اكون افدتكم وربنا يسترها علينا كلنا

فين محور عرابي ده؟

شكرا لحضرتك على التنبيه وربنا يسترها معنا جميعا
تحياتى

لسه النهارده واحد بموتوسيكل بيتفادى قطع من اللى فى الطريق وكان هيطلع على كبوت عربيتى لولا ربنا ستر ... فعلا الملف حاد جدا والطريق بقا مقرف

فعلا انا لما كان شغلى في المهندسين كنت بعدي عليه مرتين في الاسبوع وفعلا المشكلتين اللى قلت عليهم دول وخصوصا مشكلة النفق وكنت بحس ان فيه حاجة غلط وان سهل جدا حد يلبس وخصوصا في الملف بتاع النفق واللى يغيظك ان ممكن جدا تلاقى ميكروباص وﻻ توكتوك واقف في الملف ، يعنى قمة الخطورة كعادة اي طريق في مصر

بس برضه كنت باخد الملف بسرعة متوسطة مع الحذر عشاان محدش يلبس فيا من ورا ..

المشكلة انى كنت بتغاضى عن الكلام ده كله عشان الطريق كان جديد وجميل وبيوفر جدا جدا بعيد عن المحور وقرفه

في مشكلة كمان ان النزلة بتاعته في شارع عرابى بالليل ضلمة جدا والطريق بيضيق فجأة ودي ممكن تعمل حوادث لو محدش اخد باله منها واول مرة يمشى هناك


ربنا يسترها وشكرا للتحذير :)

فين محور عرابي
بيبتدي فين وينتهي فين

انا كل يوم بعدى عليه وباخذ البطىء بس برضوا بلبس بتاع مطبين حسبى الله ونعم الوكيل فى الاهمال

مشوفتش انت بقى لما عملوا الكبرى وبعدين افتكروا انهم معملوا فواصل فىا لكبرى فابتدوا يحطوا حواجز كل يوم كنت بشوف 3 او 4 عربيات لابسين فى بعض ولبسين فى الحواجز خصوصا بليل مفيش اى علامات

اقتباس:

---

المشاركة الأصلية كتبت بواسطة eng f3lix

فين محور عرابي ده؟

---

محور عرابى بيربط من الدائرى فى منطقة بشتيل الى شارع احمد عرابى فى المهندسين

وده شكل الكوبرى لما كان لسه جديد
http://www.ahram.org.eg/Media/News/2...931208-193.jpg

ودى صورة النفق وهو جديد برضه قبل مايبهدلوه
http://www.giza.gov.eg/mohamed/3raby2.gif

وعندك الجزء الي فوق النفق وجنب النفق ضيق بطريقة والله عربية نص نقل طيرت المرايا الشمال بتاعي كان ناقص اطلع فوق الرصيف عشان اتفادي العربية والغبي جاي بسرعة انا ببقي ماشي قلقان والله هناك من الحوادث
الناس دي تحس انهم مش بيفكروا المهم يعملوا طريق ويصرفوا فلوس وخلاص طيب اعملو حاجة صح

ربنا يكرمك عالتنبيه