الموضوع: تجربة إطارات 205 لنوبيرا

السلام عليكم

غيرت الإطارات والجنوط لنوبيرا والنتيجة كانت كويسة أوى عشان كدة عايز أقولكم عليها

العربية نوبيرا 2008 مانيوال ، كانت عاملة 8 الاف وقت التركيب ودلوقتى 12 الف يعنى تجربة 4 الاف كم بالمقاس الجديد

المقاس الأصلى : 65/185/14 جنوط حديد
المقاس الجديد : 50/205/15 كاوتش كورى ، جنوط تايوانى

المقاس الجديد زود إرتفاع العربية 11 مم ، يعنى 1 سم تقريبا ، وزود عرض كل عجلة 2 سم

الملاحظات : الثبات طبعا أهم نقطة ، بالمقاس الأصلى الثبات كان كويس لحد سرعة 120 كم/س ، بعد كدة كان بيقل بشكل كبير ، دلوقتى الثبات أصبح جيد جداً حتى سرعة 160 كم/س

الملفات والغرز تقريباً لحد 140 كم/س من غير ما الملف يفتح منك

ميزة تانية كانت مفاجأة بالنسبة ليا ، لما بتعدى فوق العواكس الفوسفورية اللى معمولة بعرض الطريق عشان تهدئة السرعة (عين القط) ، الإحساس بالتنطيط بين العواكس إختلف جداً جداً ، لأن الكاوتش العريض بيبقا تقريباً متشال دايماً على أى من العواكس ، ومش بينزل ويطلع فى الفراغ اللى بين عاكسين جنب بعض ، فبتبقا العربية فى مستوى واحد مش بتتنطط غير بسيط

الفرامل طبعاً بقت أحسن ، بس ده بيبان عند الفرامل الشديدة بس ، إنما الفرامل العادية نفس الأداء ، طبعاً العجل مش بيقفش بسهولة لأن الإحتكاك بينه وبين الأسفلت بقا أكبر

العيب الوحيد إن الباور تقل شوية والعربية واقفة ، بيظهر عند ركن العربية أو لما تطلع من عربية واقفة قدامك ، إنما لسة باور يعنى إنما أتقل من الأول ، على السرعات بقا العكس ، بتحسه محكوم أوى مش بيلعب

طبعا عشان الكاوتش بقا أعلى ، دلوقتى السرعة اللى على عداد العربية بتكون أقل من الحقيقى ، تقريبا حوالى 3 أو 4 كم/س فى ال 100 كم/س ، يعنى لو ماشى على 100 يبقا السرعة الفعلية 103 مثلا ، لو 150 تبقا على 155 تقريبا ، المهم إن الإرتفاع الزيادة (11 مم) مأثرش على ثبات العربية وده اللى كنت خايف منه فى الأول ، الزيادة فى العرض هى اللى أثرت أكتر بكتير ولغت تأثير الإرتفاع

بالنسبة لضغط الهوا جربت كذا مقاس من ال 28 لل 40 ، ودلوقتى أكتر مقاس مريحنى 32 لللأمامى و 30 للخلفى

التكلفة كانت 4000 جنيه للجنوط والكاوتش مع بعض ، وبعت الجوديير اللى فيها بالجنوط بـ 800 لنفس الراجل يبقا الفرق 3200

أسيبكم مع الصور يا رب تكون واضحة ، وعذراً للإطالة

الف مبووووووووووووك يا سامح باشا على الجنوط , و لو على تقل الباور أهي تمارين رست وكلو فايدة