تقرير صيانة 10000 لوجان اوتوماتيك مع شوية اسئلة
السلام عليكم
كل سنة وانتم بخير - وتقبل الله منا ومنكم صالح الاعمال
انا عربيتي لوجان اوتوماتيك 2014 الشكل القديم
رحت فرع العبور يوم الثلاثاء الماضي عشان صيانة ال 10000
وكانت عندي شكوى من كام حاجة:
1- تعليق وتهييس من الباركنج سنسور
2- تصفير مع الفرامل
3- صوت المحرك العالي
وده تقرير الزيارة:
- انا كان موعد حجزي الساعة 9 صباحاً وكنت عندهم الساعة 9 الا ربع واسمي اتنادي الساعة 10 - والدنيا كانت زحمة جداً
- لما قلت للمهندس اللى استلم مني العربية على الشكاوى كتب بس اول مشكلتين وطنش الثالثة وقاللى ان اللوجان معروف ان صوت الموتور عالى وهيفضل كده ومحدش عالجه قبل كده خالص (فهل ده صحيح؟)
- استلمت العربية على الساعة 3 بحجة انهم فكوا السنسور وركبوه تاني عشان كان ملمس في الضفيرة ودا اللى كان عامل التعليق والتهييس والمهندس قاللى لو علق تاني اروح لهم علطول عشان يغيروه خلال الاسبوع ده
- تكلفة الصيانة كانت 637 بالضريبة عشان العربية اخدت 5 لتر زيت (فهل صحيح ان العربية تاخد 5 لتر كاملين؟)
- نيجي بقي للمشكلة - تصفير الفرامل - المهندس قاللي ان التيل في الاوتوماتيك بيتغير عند 5000 او 10000 بس اعتماداً على استخدامي للفرامل - ففكوه وركبوه تاني بعد تنظيفه - وبعد ما خرجت من عندهم وراجع على المعادي من الدائري حاسس بتقل في سحب العربية ومش عايزة تزيد عن 120 قلت اصبر واجرب بكرة - تاني يوم وانا راجع من الشغل وداخل على الشارع عندي واشم ريحة شياط جامدة جدااااا والاقي العجلتين الخلفيتين بيدخنوا من ورا رحت راكن واتأكدت انه التيل الخلفي - مشيت على مهل لحد البيت واتصلت على خدمة العملاء وبهدلتهم بالذوق والادب وقاللى ان اقرب مركز خدمة معتمد في الرحاب او جسر السويس او غمرة او الهرم وانا ساكن في صقر قريش المعادي - قلت له مش هينفع امشي بالعربية كده وقفلنا اني اكلمهم تاني يوم عشان يحولني على مدير ورشة العبور ويشوف المشكلة...
في نفس اليوم كلمت ناس اصحابي اجمعوا على ان التوكيل لما ركب التيل الخلفي قرص عليه جامد وخلاه يمسك في الكاوتش ويتقل العربية - فقالي اوديها على اقرب ميكانيكي رينو ويهوي الواير بتاع فرامل اليد -فاخدت العربية ورحت لورشة عادل رينو اللى على الاوتوستراد وظبط العملية في نص ساعة ب 20 جنيه والعربية من بعدها زي الفل وسافرت بيها الفيوم مرتين الحمد لله من غير مشاكل...
امبارح توكيل العبور كلمني وقاللى انى اروحلهم بالعربية لو لسه فيها مشكلة عشان يشوفوها وطبعاً مجبتش سيرة اني صلحتها خلاص...
سؤالي هنا بقى ومعلش طولت عليكم:
- اروح للتوكيل ولا انفض؟ وازاى احدد اذا كان التيل الامامي والخلفي والطنابير محتاجين يتغيروا ولا لأ؟ ولو هاغيرهم اغيرهم في التوكيل ولا بره؟ وايه احسن الانواع؟
مشكورين يا رجالة
وكل سنة وانتم طيبين
والله الموفق