منجة لايطاليا - اروح ولا لأ؟

**S.h.a.h.e.r** · 30-06-2014 01:52 PM

السلام عليكم وكل سنه وانتم طيبين
انا خريج كليه هندسه وتقديري جيد جدا وقاعد سنه ونص من غير شغل لان تخصصي مش مطلوب (بترول) مع اني والله قدمت في شغل كتير جداااااا لكن ربنا عاوز كدا
كنت بقدم علي النت علي حاجات كتير ومنح
الحمد لله جالي خطاب امبارح بقبول في منحة لايطاليا
كل دا حلو - بس المشكله في الاتي:
1 - الماجستير دا مش تبع تخصصي اوي - هو اه هندسه بس حاجه اسمها ادراة المخاطر في المشاريع الهندسيه
2 - الجامعه ترتيبها مش عالي اوي رغم انها في ايطاليا لكنها من اقدم جامعات العالم
3 - دا الاهم: المنحة لا تغطي مصاريف السكن والمعيشه ومعرفش الفيزا هتسمح بالعمل او لا
4 - مبعرفش اكلم ايطالي ههههه
والله انا محتار وناوي اصلي استخارة لكن محتار جدا وقولت ااخد رايكم يمكن حد في حضراتكم عنده راي ما و في النهاية الامر شوري بينكم
شكرا جزيلا مقدما علي ردودكم

**amr011111** · 30-06-2014 01:54 PM

المشكله فى مصاريف المعيشه والسكن هل هتقدر توفرهم ولا لاء
والحاجه التانيه هل ينفع بعد ما تاخد الماجستير تشتغل فى ايطاليا بيه ولا لاء

**S.h.a.h.e.r** · 30-06-2014 02:00 PM

والله مكسوف اطلب من ابويا فلوس بس هو هيديني هيعمل ايه يعني
ومش عارف اذا كان هيسمحولي اشتغل ب الماجستير في ايطاليا ولا لا
بس واحد زميلي بيقولي ان هيبقي معايا فيزا اتحاد اوروبي واقدر اقدم بعد كدا في اي مكان
بس مش متاكد من اي حاجه

**AlGazar2** · 30-06-2014 02:56 PM

اخلع

**S.h.a.h.e.r** · 30-06-2014 04:48 PM

اخلع من ايه بالظبط مصر ولا ايطاليا

**Secret-Man** · 30-06-2014 04:54 PM

اى حد بيخرج من البلد ديه ربنا بيكرمه هههههههه

صلى استخاره وتوكل على الله وشور اصحاب الخبره وزمايلك الناجحين وربنا يكتبلك الخير باذن الله

**wawamoha** · 30-06-2014 06:35 PM

اولا كل قوانين اوروبا بتسمح للطلبه انهم يشتغلم 14 - 20 سع اسبوعيا لتوفير المصاريف
غالبا بيكون كانتين الجامعه ....كده يعني

يعني اشطه من الاخر هاتجيبلك ال 1000 يورو مصاريفك بتاع الاقامه و الاكل

دي حاجه محتاجه تفكير ..رايي دي هديه ربنا بعتهالك توكل عل الله

**Mohab.Nabil** · 30-06-2014 07:18 PM

المشاركة الأصلية كتبت بواسطة wawamoha

اولا كل قوانين اوروبا بتسمح للطلبه انهم يشتغلم 14 - 20 سع اسبوعيا لتوفير المصاريف
غالبا بيكون كانتين الجامعه ....كده يعني

يعني اشطه من الاخر هاتجيبلك ال 1000 يورو مصاريفك بتاع الاقامه و الاكل

دي حاجه محتاجه تفكير ..رايي دي هديه ربنا بعتهالك توكل عل الله

الموضوع مش سهل كده

صحيح ان القوانين بتسمح بالشغل بس هو ميعرفش ايطالى خالص يعنى اى شغل بسيط حتى لو فى كانتين الجامعة هيبقى اول متطلباته انه يعرف يتكلم ايطالى عشان يعرف يتعامل مع الناس خصوصا ان الشغل مش كتير اوى و الناس اللى عايزه تشتغل كتير فطبيعى هيفضلوا واحد بيتكلم ايطالى عليه

لازم تبقى مسافر و عامل حسابك انك تقدر توفر الالف يورو اللى هو 10 الاف جنيه من مصر هنا و الله ربنا كرمك بشغل يبقى تمام بس لو لا تبقى تقدر تعيش يعنى متروحش و انت عارف انك مش هتقدر تغطى مصاريف الحياة من مصر و الا صدقنى هتتعب هناك جدا و هتتبهدل بهدلة كبيرة

**ahmed salah90** · 30-06-2014 07:23 PM

لو فيه مكسب ليك روح غير كده بلاش

الحته الهزار ( الواحد يطلع بره البلد ديه احسن مائه مره و لو ينفع تاخد اخوك اللي هو انا يبقى هتروح الجنه انشاء الله )

**omar101970** · 30-06-2014 07:59 PM

الهيد كوارتر بتاع شركتى فى ايطاليا ورحتها كتير.
من خلال زيارتى لأيطاليا فعلا اللغه الأيطاليه هناك مهمه جدا ومعظم الناس مش بتتكلم انجليش
يعنى انا لما روحت سويسرا ومع ان لغتهم مش انجليش ما تعبتش كل الناس بتتكلم انجليش فيرى بيرفيكت.
لكن فى ايطاليا حتعانى شويه لكن طبعا فى مجتمع الجامعه الطلبه والدكاتره بيتكلمو انجليش كويس
بالأضافه ان الأقتصاد فى ايطاليا مش كويس اوى وبالتالى فرص الشغل مش سهله.
زى ما انتا بتقول ان موضوع الماستر فى اداره المخاطر او الريسك ماندجمنت فبردو موضوع سفرك فيه ريسك.
بس ممكن تتحسب وتتزبط وربنا يوفقك يا باشمهندس.