بص ياباشا..
أغلب الكلام اللي حضرتك قريته (بنسبة 95%) بيتكلم عن f3 وهي فعلاً الأكثر انتشاراً، وهي اللي عملت سمعة لشركة byd الصينية في مصر، والسبب حاجات كتيرة؛ منها الاعتمادية، أسعار قطع غيار وتوفرها بسهولة مع إمكانية تركيب قطع غيار كورولا بالنسبة للعفشة والصالون ولانسر بالنسبة للموتور، كمان كمالياتها أعلى من مثيلاتها في نفس الفئة السعرية، كمان انتشارها كتاكسي خلى الصنايعية يتعاملوا معاها ويفهموا في صيانتها، وأسباب أخرى كتير خلاصتها إن مالك السيارة بيحس إنه راكب ياباني بسعر صيني..
العربية F3 نزل فيها موتورين:
- لانسر بومة 1600: وده لحد 2014.. ومتجرب وممتاز وقطع غياره موجودة ورخيصة ومعروف للصنايعية وهو من أسباب شعبيتها لعشق المصريين للانسر.
- موتور بي واي دي 1500: واشتهر بإنه موتور هوندا سيتي ويقال إنه كان بيركب على هوندا سيتي 2005 (مش متأكد من صحة المعلومة) ولكن هذا الموتور هو اللي في الـ g3 من ساعة ما نزلت (معلومة من التوكيل) وهو اللي بينزل دلوقتي في موديلات 2015 من الـ f3 حصرياً وكان قد بدأ تركيبه على f3 من 2013
بالنسبة للـ 1600 المنيوال والـ 1500 المنيوال الكماليات واحدة تقريباً (بتكلم عن التقفيل المصري طبعاً)
بالنسبة للـ 1600 أوتوماتيك ففيها فتحة سقف وطارة مالتي فنكشن وباركنج سنسورز مش موجودين في الـ 1500، وطبعاً إذا لقيتها دلوقتي هتبقى تخزين عند تجار وهتلاقي عليها أوفر برايس جبار يوصل سعرها لـ 105 ألف بسبب إعتمادية الموتور 1600 المتجرب بقاله 8 سنين.. في مقابل سعر 85 ألف للـ1500 بسبب إن الموتور لسة منتشرش زي أخوه..
طب هل ده يعيب الـ 1500؟
الإجابة لأ.. مسألة وقت ونعرف مدى اعتماديته؛ ومتنساش إنه نازل منه فتيس ستيبترونيك (يعني أوتوماتيك ومانيوال في نفس الوقت) ودي ميزة مش موجودة في الـ 1600 على الأقل حتى الآن.
لكن بوجه عام شركة بي واي دي شركة محترمة، وليها سمعتها في الصين وليها أبحاث قوية في مجال تكنولوجيا السيارات الكهربائية؛ لدرجة إن مرسيدس عاملة معاها شراكة في هذا المجال..
الخلاصة: عاوز تشتري؛ دور كويس على مميزات وعيوب العربية اللي تنوي عليها، وإن كنت أرى إنك هتلاقي بسهولة أراء ملاك ومستخدمي للـ F3 في مقابل ندرة للـ G3
المفضلات