السلام عليكم يا اعضاء نايل موتوز الكرام
انا معايا كيا كارينز ٢٠١٤ اتوماتيك وكان وحجزت صيانة الالف فرع روكسى ورحت امبارح حسب ميعاد الحجز بتاعى وكانت مفاجأة بالنسبالى انهم ادونى ميعاد الساعة ٩ ونص بعد الفطار !!!
قولت بركة يا جامع ورحت فى ميعادى .. روحت لاقيت مكان الوكيل غريب شوية لان فى بنزينة التعاون مغطية علية لان البنزينة قدامة ما علينا .. مدخل الصيانة ضيق بتفضل قاعد فعربيتك لحد ميجى الفنى يسمع منك شكوتك من العربية او نوع الصيانة :-) . وحلنى بقى لحد ميجى دورك لانه فنى واحد بس .. بعد كدة .. قعد يكتب فورقة انى هعمل صيانة الالف .. وامضى ياباشا .. قولتلة أمضى على أية هو مش المفروض تقولى فالصيانة دى هتعمل اية للعربية ؟؟؟ قالى هنغير زيت وتربيط عفشة وهنضف الماتور بالهوا وهنغير فلتر زيت .. طبعا انا سبتة الاول يكتب التكلفة لاقيتة بيكتب ٣٨٠ .. قولتلة عايز اعمل رجلاش للفرامل لان فرامل اليد كانت عايزة تتشد سنة .. وزودلى مية القربة والمساحات و زودلى هوا العجل ..لاقيته مزودش حاجة فالفاتورة .. قولت تمام .. هتسلم العربية امتى يبنى .؟؟؟؟. قالى ١٠ ونص ... طبعا احنا شعب يدى مواعيد مضروبة للصبح .. كنت هناك فالتوكيل ٩ وربع استلم العربية منى الساعة ١٠ .. وقالى هتستلمها ١٠ ونص ومستلمتهاش الا ١١ وتلت !! اومال لو كنت رايح لاقدر الله على حاجة كبيرة !!! ماعلينا .. نادو علية عشان ادفع .. ببص فى بيان التصليحات الاقى مكتوب وردة ب ١٦ جنية وطبة زيت بحاجة وعشرين جنية !!!! روحت للبية الفنى بقولة اية دة !!! هما البهوات كسروا الطبة وبيدفعونى تمنها ؟؟ قالى لا يا باشا وازاى الكلام دة وشغل ال٧ ورقات دة .. راح قعد يلف لفتين وقالى دة امر شغل غلط جة فامر شغل حضرتك !!!! طبعا انا مطمنتش قولتلوا طيب ممكن اشوف اسم صاحب امر الشغل الى دخل فامر الشغل بتاعى .. لاقيتة فعلا بتاع واحد تانى ..
الدروس المستفاده :
اولا : روح قبل ميعاد الحجز بنص ساعة على الاقل .
ثانيا: راجع كشف الصيانة بتاعك اول متستلمة وشوف تكلفة كل حاجة ..
ثالثا: لازم تكون فاهم كل حاجة فعربيتك وواخد فكرة عن الميكانيكة بتاعتها .. عشان محدش يستغفلك ..
فى حاجات بقى انا مستغربها بعد الصيانة .. ودى محتاج حد حصل معاه نفس الموقف :-
العربية حسسها بقت عفشتها ناشفة اوى .
ثانيا : الكمبيوتر بتاع العربية بقى بيقرأ ان العربية بتحرق ٨ لتر كل ١٠٠ كيلو ..، كانت قبل الصيانة بتقرأ ٧ ونص لتر فى ١٠٠ كيلو !!!!! مش عارف دة عادى ولا لا ؟؟؟؟
ثالثا: اداء العربية كسحب اتحسن كتير بعد الصيانة ..
المفضلات