اتعرضت لعملية نصب - في تصليح الكاوتش
امبارح اتعرضت لعملية نصب وسبحان الله كل رمضان لازم تحصل لي حاجة تحرق الدم
وانا واقف بالعربية في اشارة في شارع البحر الاعظم واحد ابن حلال قال لي خللي بالك الكاوتش نايم – قولت له شكرا الله يكرمك –وقفت عند اول واحد بتاع كاوتش وقولت له زود الكاوتش وانا راكب جوة العربية قال لي يا باشا العجلة نايمة خالص انول كده نزلت لاقيتها عادي قولت له زود وانا هبقى اشوفها بعدين قال لي حرام العجلة جديدة هكشف عليها من غير ما افكها رش عليها مية بصابون العجلة بقت تبقلل كتير المهم قال لي الخابور ب15 جنيه اركبه قولت له ماشي لفيت حولين العربية لاقيته ضرب في العجلة 17 خابور وبيضرب في العجلة التانية الباقي روحت قفشت فيه واتخانقت معاه وجه صاحب الورشة وقال لي هو اتفق معاك من الاول ادفع 400 جنيه – مع العلم ان ثمن الكاوتش الجديد 400 جنيه المهم كان قبل الفطار بنص ساعة دفعت زي الاهبل ومشيت وبعد ما طلعت الدائري قولت ايه الهبل اللي انا عملته ده روحت لفيت ورجعت لاقيت اييييييييييه لاقيت ابن الحلال اللي قال لي العجلة نايمة واقف في الكشك بياخد حسابه من صاحب المحل بصراحة ماقدرتش امسك نفسي صرخت عليه راح الواد جري روحت قافش في صاحب المحل وقولت اكلمه بالحسنى وقولت له ليه تقبل بالحرام ما تاخد 10 ولا 20 حلال واقول له اتقي الشهر الكريم اللي احنا فيه يا اخي المال الحرام كذا وكذا قعد يقاوح ويقول لي يعني انا مابعرفش ربنا قولت له اه وحرامي كمان قال لي طب انت دفعت بمزاجك ومالكش حاجة عندي وجاب لي 3 صنايعية عشان اخاف – المهم كان خلاص المغرب قرب يأذن فروحت وانا دمي محروق حتى بصلي التراويح وانا عمال اخطط اجيب حقي ازاي اثناء الصلاة للاسف وانا في الحاجات دي ببقى مجنون في الاخر قولت اتوكل على ربنا وهو هيجيب لي حقي بس انا مش هسيب حقي
انهارده الصبح وانا رايح الشغل عديت عليه لاقيت المحل فاضي والصنايعي نايم وحاطط جنوط اسبور برة روحت كاتب ورقة فيها رقمي وان انا صاحب العربية اللي انت نصبت عليه ونزلت جنطين اسبور من طقمين مختلفين وبصحي الواد عشان اديله الورقة لاقيت واحد جاي يجري وقال لي انت حرامي ولا ايه قولت له انت اللي حرامي وانا عاوز فلوسي وقسما بالله ما اسيب حقي انا ليا عنكم ثمن كاوتشين جداد غير الفلوس اللي دفعتها راحوا الصنايعية اللي كانوا موجودين امبارح جم وقالوا الباشا كان هنا امبارح واحنا هنكلم صاحب المحل ييجي دلوقتي قولت لهم كلموا الجن الازرق حقي هاخده
راح جاي اخو صاحب المحل وعشان انا سيبتها على الله الراجل سمع مني للاخر وقاتأسف لي وقال لي اللي انت عاوزه هعملهولك وانا هربي اخويا وراح رد لي الفلوس بتاعتي قولت له وثمن الكاوتشين الجداد قال لي طب انا ممكن ادفع ثمن كاوتش واحد قولت له طيب راح دفع لي 100 جنيه وقال لي هكلم حضرتك اديلك الباقي
- الخلاصة البلد دي لازم تكون فيها معاك سلطة او قوة عشان تعرف تاخد حقك
- سيبها على الله وحقك هيرجع
- ماتصلحش كاوتش غير عند حد ثقة (انا بصلح دايما عند واحد جنب البيت وواحد جنب الشغل محترمين – بس ساعة القدر بئا)
- ماتقولش على حد ابن حلال عشان قال لك الكاوتش نايم
- فكرة اني اهاجر واتعامل مع ناس محترمة كبرت اوي في دماغي
