الموضوع: التيوتا كرولا 2014 ثابته ؟؟؟

المشاركة الأصلية كتبت بواسطة minicooper20

اصل الثبات نسبى
انا مثلا راى لا مش ثابته و بقلق من فى الملفات جدااا و لو فى فاصل فى كوبرى مكسر بتنط من ورا
فى ناس تانيه مكتفيه باثبات الفيها و شيفها فاءقه الثبات فا هو نسبى
تحياتى

هو حضرتك مالك لكورولا 2014 ؟ ده سؤال بجد مش تهكم صدقني .

اصل اختبار فواصل الكوبرى في الملفات ده اساسي بالنسبة لي و بحكم بيه جدا علي ثبات العربية و ياما عملته في معظم كباري مصر و النتيجة كانت مرضية جدا .

و الاقوي من كدة اني عملته بالعربية قبل التعديل و بعد التعديل و شارحه بالتفصيل في تقاريري و بأكد انه النط ده مش موجود خالص و اتمني حضرتك لو معاك العربية تيجي في مقابلة القسم و نجربها
انا في رأي الثبات مش حاجة نسبية هي حاجة ملموسة وواضحة و تحسها في مواقف معينة ، يعني مشفتش 2 اختلفو علي ثبات الاسترا او الالنترا مثلا . ده راي و كامل الاحترام لرايك

المشاركة الأصلية كتبت بواسطة minicooper20

تحياتى لشخصك الكريم يا باشا
اولا مش لازم اكون مالك للعربيه شان احكم على الثبات اه لو قصدك انى اكون شفتلها مواقف و كده و هى ملكى فا خدت وقت شان احكم
لاكن اه انا معتبرش مالك هى عربيه الشغل و لانى عربيًتى كانت فى حادث فا استلمتها و هى ماشيه اهى حوالى ٢٠ الف
فى السعوديه
انا كنت قلت العربيه مقلقه فى الملفات العنيفه اه انا بقلق منها
لانى جربتها و خذلتنى
عادى يا باشا على قد فلوسها
و مش تجربه واحده اكتر من تجربه
تانى حاجه انا حوار فواصل الكبار،ى ده هو من اقوى اختباراتى لاى عربيه سيدان و دى فشلت فيه معيا و نطت من وراء
عاادى يا باشا
عربيه من وراء على دونجل و setup عفشه مهروس ١٠٠ سنه قبل كده اه هما اليابان متقننين فيه عن الكورين من ناحيه طريقه توزيع الوزن على المحور
لاكن هو هو فى الاخر يعنى ى صدقنى هى اى عربيه من ورا كده لازم تعمل كده مش كرولا بس
انا بقارنها باثبات بفءتها هى احسن من الانترا و اقل من السفك
انا راى ان الثبات نسبى
بالنسبه لحاله العربيه و العربيع النتا كنت راكبها قبل كده و حاله الطريق
و الا مكنش رجاله هيونداى بيدافعو عن ثبات الانترا النا بشوفها مرجيحه و مكنش حضرتك شكرت فى الثبات النا بقول عليه
متوسط
عايز تحرب النط
اركب العربيه لواحدك و اطلع كوبرى القبه البيطلعك من قصر القبه ينزلك ميدان روكسى فى فاصل مكسور فى ملف الكوبرى
لو الكرولا منطتش سعتها يبقا نقول ثابته
لاكن انا من غير مجرب هتنط و لو حتى مش نطه قويه بس لازم هزه
لا انا عايز اثبت ان العربيه مش ثابته و لا يهمنى اصلن
لاكن صاحب الموضوع طلب شهاده حق و انا قولت شهادتى طبقا لمعطياتى
على فكره انا استمتعت فو الكرولا عن الانترا بكتير
تحياتى يا باشا

تسلم علي التعليق، بس انا اتمني حضرتك تجرب النسخة المصرية التي تختلف عن الخليجية للحكم بموضوعية اكتر :

اولا حضرتك بتقول جربتها في مواقف عنيفة ، طبعا هي المواقف دي بتبقي نسبية و انا في رأي المواقف العنيفة بيحصل فيها غالبا تدخل من وحدة و نظام الثبات الالكتروني esp بدون ما حضرتك تشعر نهائيا. :-) وده للاسف مش موجود في النسخة الخليجية ، و بكرر ال esp ده مش بيزود الثبات ده بيتدخل في المواقف العنيفة زي اللي حضرتك بتقول عليها بدون متشعر فهتحس ان في المواقف دي ان العربية ماسكة نفسها و معومتش و ثابتة.

تاني نقطة و هي اختلاف النسخة الخليجية عن المصرية في الفتيس الcvt عن ال ٤ نقلات وحجمه ووزنه و مكانه و بالتالي وضع الموتور و بعض الاجزاء الميكانيكية و الفتيس اللي في النسخة المصرية اتقل من اللي موجود في الخليج برقم محترم. ده بيتهيألي هيفرق في الثبات عن النسخة الخليجية.

تالت نقطة الفيصل في الثبات ليس سيتب العفشة و لو هنتكلم بالمنطق ده فالالنترا عشان سيتب منفصل تبقي عربية محصلتش و ثابتة و ان الكورولا علي دونجل فهي مش ثابتة و ان الكروز علي دونجل فهي مش ثابتة و ان الاسترا علي دونجل معدل فهي مش ثابتة و لا ايه ؟
كل شركة و ليها تصميمها و انا شايف دونجل الكورولا احسن من 100 مالتي لينك علي سبيل المثال في الالنترا , ودونجل الاسترا احسن من دونجل الكورولا و الحق حق و ده دليل عدم التعصب و هو الاعتراف بالمميزات و العيوب حتي لو العيوب في عربيتي

رابع نقطة و هي سيتب العفشة اللي في النسخة المصرية مختلف عن اللي في النسخة الخليجية ! انا عارف ان خبرة حضرتك في العربيات محترمة و هوريك صورتين لسيتب العفشة الخليجية و المصرية و حضرتك اللي هتقول بنفسك و هتقر ان في فرق رهيييييب و بينعكس علي الثبات عشان كدة ثبات المصري هتلاقيه افضل بفرق ملحوظ :
سيتب الخليجي :



سيتب المصري :



اظن حضرتك من غير معلق و اشرح شوفت الفرق بين العربية اللي حضرتك جربتها و بين النسخة المصرية .

خامس نقطة بالنسبة للفواصل فده من اهم الاختبارات اللي بعملها دايما لقياس ثبات العربية ، و عملته للكورولا كتير في مطلع كوبري اكتوبر كورنيش النيل للزمالك علي سرعة ٨٠ و مفيش نط خالص من اللي حضرتك بتقول و كمان في مطلع الدائري من الاوتوستراد و مفيش الكلام ده خالص و تم عمله في كباري كتيير من ضمنها كوبري القبة اللي بعدي عليه بصفة دورية بطبيعة عملي في المنطقة دي.

سادس نقطة برضو ان في السعودية في فئات بتنزل بطاسات مقاس ١٥ و ده مش موجود في مصر و اكيد اكيد ١٥ من ١٦ يفرق السما من الارض.

انا كان تعليقي علي كلام حضرتك انك تملك العربية الغرض منه فقط اني اتأكد ان حضرتك جربتها تجربة فعلية مبنية علي ارض الواقع لوقت كافي و ليست عن طريق سمع من حد ، و طلع ان عندي حق نسبيا في انك بتتكلم علي عربية تانية مختلفة في اجزاء تخص الثبات رأسا و حضرتك برضو عندك حق نسبيا انك كنت فاكر ان العربية الخليجية هيا هيا بالضبط اللي بتنزل مصر و اللي انا بأكده انه كلام مش سليم بنسبة ١٠٠٪ و لكن في تشابه في اجزاء تانية كتير .

فعشان كدة حضرتك قولت رأيك بناء علي تجربتك لافادة صاحب الموضوع و انا عدلت المعتقد اللي مكنش سليم بنسبة ١٠٠٪ عن ان العربيتين مختلفتين فكلام حضرتك ممكن يكون سليم علي النسخة الخليجية السعودية بالتجربة و لكن اللي هيشتري بيشتري في مصر اللي هي عربية تانية و متجربة كويس قوي في الثبات من ملاكها علي فترات و اوقات اكتر اتمني اكون وضحت وجهة نظري بالادلة العينية و تكون منطقية لحضرتك.

و في انتظار حضرتك في اقرب مقابلة للقسم لما تنزل مصر ان شاء الله لتجربة ثبات النسخة المصرية للعربية الفعلي في الفواصل و في كل شئ ليكون الاختبار مبني علي ارض الواقع و سليم ١٠٠٪ و عشان كمان تؤكد صحة كلامي فيما يخص ثبات العربيتين بما انك جربت النسخة الخليجية و اللي اعتقد ان حضرتك هتقول بنفسك ان في فرق واضح :)

تحياتي ليك و رمضان كريم