الموضوع: أسعار ومواصفات كيا سيراتو 2015 وكيل ( فئات وكماليات جديدة )

توكيل كيا غير في فئات السيراتو 2015

ومقارنة بالفئات اللى قبل كدا في ميزه وعيب

الميزه ان ال ABS وال AirBag بقى اساسى في كل الفئات ماعدا أول فئه

العيب ان الأسعار مقارنة بالكماليات تعتبر عليت أوى

نبتدى بسم الله نشوف الفئات ونقارن بالقديم لو فيها تغيير


أول فئه أوتوماتيك LX السعر 147 الف ( مفيش جديد في الفئه دى )

إيموبليزر - تكييف - باور - مفتاح عادى بدون ريموت - ازاز ومرايات كهربا - فوج لايت - سى دى و USB و AUX - تعديل الطاره تيليسكوبيك - طاسات 15


تانى فئه LX ABS AirBag السعر 154 الف ( فئه جديده )

نفس الفئه السابق بالإضافه لفرامل ABS وإيرباج للسائق

لو قارننا الفئه دى من حيث السعر بفئة EX اللى كانت موجوده قبل كدا بنفس السعر 154 , هانلاقيها ناقصه كماليات زى جنوط 16 وطاره ملتى ونور قراءه وجراب نضاره وتعديل كرسى السائق , لكن فيها ABS ودا مكنش موجود في فئة ال EX قبل كدا


تالت فئه EX السعر 164 الف ( فئه جديده )

نفس كماليات تانى فئه بالإضافه إلى

2 إيرباج بدل 1 - جنوط 16 - طاره ملتى - نور قراءه وجراب نضاره - تعديل كرسى السائق - مفتاح ريموت

لو قارنناها بكماليات فئة EX القديمه اللى كانت موجوده قبل كدا هانلاقى إنها نفس الكماليات بس زودوا فيها ABS و 2 إيرباج بدل 1 ومفتاح ريموت بدل عادى , وسعرها زاد 10 الاف

اما لو قارنناها من حيث السعر بفئه EX فل أوبشنز اللى كانت بنفس السعر 164 الف , هانلاقيها ناقصه كماليات زى مرايات ضم وفتحة تكييف خلفى ومثبت سرعه ومسند يد خلفى بحامل أكواب


رابع فئه EX SunRoof السعر 170 الف ( فئه جديده )

نفس كماليات تالت فئه بالإضافه لفتحة السقف


خامس فئه EX كامله السعر 176 الف ( فئه جديده )

جميع الكماليات السابقه بالإضافه إلى

جنوط 17 - مرايات ضم بإشارات - مقابض كروم - إضاءه نهاريه LED - تبريد درج التابلوه - فتحة تكييف خلفيه - مسند يد امامى متحرك - مسند يد خلفى وحامل أكواب - بلوتوث - مثبت سرعه

بالمقارنه بفئة SX اللى كانت ب 171 هانلاقيها ناقصه كماليات زى الباركنج سنسور الأمامى والخلفى وجلد الطاره والابواب وال Flex Steering Mode وشيفتات الطاره وفوانيس LED خلفى وحساس النور , لكن فيها زيادة فتحة السقف وسعرها أكتر ب 5 الاف

لو قارنناها بفئة SX SunRoof اللى كانت ب 181 ناقصه جميع ماسبق بالإضافه للسمارت كى وإضاءة المرايات والمقابض وسعرها أقل ب 5 الاف


سادس فئه SX السعر 184 الف ( فئه جديده )

نفس كماليات EX الكامله بالإضافه إلى

جلد في الطاره والأبواب - Flex Steering Mode - شيفتات في الطاره - حساس نور - فوانيس خلفيه LED - باركنج سنسور امامى وخلفى - سمارت كى - إضاءه في المرايات والمقابض

تعتبر نفس فئة SX SunRoof اللى كانت ب 181 بس سعرها زاد 3 الاف


أخيرا HighLine السعر 194 الف

تزيد سى دى تاتش مع كاميرا خلفيه وفرش جلد

نفس السعر القديم بس شالوا منها الكراسى الكهربا ب 2 ميمورى