اذا كان ده ملوش حل التاني و كان هيتطبق لا محاله في اي عهد
فلابد من مراقبة الاسواق انا أسف احنا شعب جشع بنغلي و ننتهز و ناكل في بعض دي حقيقه
الفقير اتهرس
عرض للطباعة
اذا كان ده ملوش حل التاني و كان هيتطبق لا محاله في اي عهد
فلابد من مراقبة الاسواق انا أسف احنا شعب جشع بنغلي و ننتهز و ناكل في بعض دي حقيقه
الفقير اتهرس
مش عارف أقول إيه : مش حأقدر أشتم و أسب لعنات على الحكومة و السيسى و محلب . لإن ده شر لابد منه و مش حتيجى غير كدة . مبارك و مرسى و طنطاوى كانوا بيهربوا من القرار ده ( أول واحد إتكلم فيه كان عاطف صدقى سنة 1986 و قبله على لطفى 1982 على إستحياء) لإنهم كانوا خايفين تكرار إنتفاضة الخبز 1977 .و النتيجة 2 تريليون جنية دين إجمالى غير مليارات الدولارات دين خارجى .
لكن تعليقى الوحيد هو أنه من حق الحكومة أن ترفع الدعم عن الوقود ( ليه يدفع للى مش محتاج ) لكن من حق المواطن مالك السيارة أن يسير فى شوارع آدمية و سيولة مرورية و من حق المواطن الذى لا يمتلك سيارة أن يجد وسيلة نقل جماعى حكومية محترمة تبعد عنه إستغلال العربجية (سائقى الميكروباصات و التاكسيات فى هذا الزمن) .
مسؤول: قرار زيادة أسعار الوقود لا يشمل الغاز الطبيعي الموجه للمصانع | المصري اليوم
ده بمناسبة ان الموضوع مهم عشان الاقتصاد و عشان برضو الناس تلحق تلاقي تبرير
انا قاعد برة مصر من 4 شهور وكنت راجع على العيد وفرحان ونازل اشتري عربية
دلوقتي والله انا مش عارف افكر ازاي
الناس اللي بتبرر القرار بكلام عقلاني في الظاهر و خاطىء موضوعا تماما
ما ينفعش تقولي قرار صحيح وكان لازم يتنفذ من زمان وفي اوروبا والدول المتقدمة بتعمل كده
وانت متوسط دخل الفرد في مصر اقل من الدول اللي شايلة الدعم بمراحل، بل ما يتقارنش اصلا
والجمارك والضرايب اضعاف اضعاف اي بلد تانية (انا عايش هنا في بلد مفهاش ضرايب على الدخل ومفيش جمارك على السيارات بمختلف انواعها، و مع ذلك سعر البنزين ازيد من مصر (الاسعار القديمة) بما يعادل جنيه فقط على اللتر ايا كان نوعه... معادلة معقولة)
نهب الثروات وموارد الدولة والسوق السودة والمرتبات الخرافية للمستشارين والمناصب اياها و تصدير الغاز باقل من اسعاره واستثمار الكبار لثرواتهم في بنوك سويسرا كلها مشاكل حقيقية هي اللي فعليا بتضيع فلوس البلد وممكن تحل كل الأزمات لو اتمنعت... ليه ما بنحلش المشاكل دي و بنستسهل دبح الشعب نفسه في قوته دايما؟؟ (بيفكروني بالمليونيرات اللي طالعين يحثوا الشعب في الاعلانات للتبرع لمستشفى سرطان الاطفال ولو بجنيه!!)
لقيت أخ بيقول دي حاجة كويسة علشان مش كل من هب ودب مش يجيب عربية.... وانا بسأل حضرتك من وجهة نظرك، الشعب المصري منقسم لنوعين، النوع الأول فيه معاليك وليه الحق يجيب عربية ويدخل هنا على قسم المقارنات يسأل اجيب العربية ام 300 الف ولا العربية ام 500 الف انجدوني انا محتار؟ أما النوع التاني فهو "من هب ودب" وملوش الحق في امتلاك عربية لانه مش بني آدم ولا ينتمي لطبقة البشوات ولازم يعيش على اده...
يا خي حتى لو دي وجهة نظرك حاسب على كلامك قدام الناس، ده من اكتر التعليقات العنصرية اللي شفتها في حياتي... العيشة الكريمة وامتلاك ادوات الحياة الاساسية زي العربية دي مش حكر على حد. هرجع واقول علشان اللي بيقارنوا بينا وبين الخارج في المساوىء بس... انا هنا عايش في بلد حتى العامل البسيط بيقدر يشتري عربية...والدنيا زي الفل ومتنظمة وشبكة الطرق تتسع لأضعاف العربيات الموجودة و الدولة عاملة دورها و اللي عليها وزيادة قبل ما تفكر تزود قرش على الناس..
نعمل ايه طيب لما نفكر نرجع بلدنا ونسيب كل ده علشان في الآخر حاسين بغربة؟ نلاقي قرار زي ده في وشنا، و ناس بتبرره وبتزكيه ولسة بتتكلم عن الفروق والطبقات؟
من الاخر
اي حد معترض علي القرار ده سياسيا احب اقوله بلاش نفاق
و اكلت يو اكل الثور الابيض
من سنه و اكتر لما اتشال الدعم عن البنزين ال 95 اللي بستخدمه و كنت بشتكي و بحسبن زيك بالظبط كنت انت مش فارقه معاك و بتبرر و تسبب زي ما انت شايف البعض بيعمل دلوقتي
الدعم كان هيتشال هيتشال
و اللي فكر و جاب سيره و نفذ جزء منه كان النظام السابق فبلاش تستعمي الناس
الفكره كلها بقي في توقيت و منظومه الرفع
مينفعش تعمل كده و الناس علي اخرها و لسه ما فاقتش من صدمه رمضان في المصاريف
لا و من غير منظومه محكمه للتحكم في اسعار باقي السلع و استغلال التجار و الفساد اللي ناخر عظم البلد
هو كده بيهرج و بيدوس علي الناس و ده مش صالحه
عموما ربنا يهدي الجميع الي الصواب
و اتمني من كل قلبي القرار ده يكون في مصلحه البلد فعلا حتي لو حساب مصلحتي
انت كده اللي بتوجه الموضوع لتحيز سياسي مش للبعد الأقتصادي
بس طالما الموضوع جه على الحتة دي يبقى لازم نقول الحق و نشغل العقل اللي ربنا اداهولنا
في فرق كبير اوي بين شيل الدعم عن اللي معاه فلوس (95) - و غير كده اسعار السلع الاساسية والمواصلات مش هتزيد على حسه وبالتالي المواطن المطحون مش هيتطحن اكتر والدعم هيوصل للي يستاهله
وبين شيل الدعم عن اللي معهوش (80, 92, والغاء 90) والدنيا كلها هتولع على كل السلع والخدمات و كل الطبقات والمطحون يطحن اكتر ويتحول لحرامي، اللي مكانش بيسرق هيسرق واللي مكانش بيرتشي هيرتشي دلوقتي
فرق كبير بين الاتنين
دي مش محتاجة لف ودوران في الكلام كتير
وهو ده الفرق بين اللي بيصلح بلد واللي بيخربها
يعني انا كده اللي قلبت الموضوع سياسه في رايك و كل الردود اللي فاتت دي عادي
و يا باشا صدقني
مش كل اللي بيمون ال 95 رجل اعمال فاسد او بيلاقي الفلوس في الارض
في ناس بتمون 95 بعرقها و شقاها و تعبها و غربتها و هيتاثر بارتفاع الاسعار زيك بالظبط
و لعنه الله علي اللي فهم و اقنع الناس ان ال 95 ده للاغنيا اصلا
يا جدعان قلنا كتير قبل كده العربيات اللي بتمون 95 دي انظف و اقل استهلاكا من غيرها
و احنا في منتدي عربيات يعني ناس فاهمه و متابعه المواتير التيربو و خلافه
و ارجع لكلامي و هتعرف اني برضه زيك بالظبط معترض علي القرار بس من وجهة نظر اقتصاديه و مراعاة لظروف الناس برضه
لايفيد البكاء على اللبن المسكوب اسعار المحروقات ارتفعت وخلاص عشان يتم توفير 41 % من مزانية الطاقه
يا ترى هنشعر احنا كمواطنين باى تحسن فى الخدمات ؟
:8954[1]:
على فكرة انا معاك ان 95 مش للاغنياء بس خالص، متوسطي الدخل كانوا بيستخدموه حفاظا على العربية
اقسم بالله احيانا انا كنت بحطه في عربية لانوس لانه كان بيفرق جدا في سحب العربية
ولما غلي ربنا يعلم انا اضايقت اد ايه وما استخدمتوش بالسعر الجديد الا مرة واحدة وماعملتهاش تاني من ساعتها
بس انا لما بطلع برة مشاكلي الشخصية وابص بصة اشمل شوية واحسب ان في ناس تانية عايشة غيري ممكن افهم طبيعة القرار (بالنسبة لل 95 بس)
انا ممكن استغني عنه وارجع لل 92 من غير تأثير كبير في حياتي او حياة غيري
انما علشان اغلي كل منتجات البترول من غير اوجد حلول، المشكلة هتبقى اكبر من اني اخسر الاداء الاعلى لموتور العربية
و كده كل حاجة هتغلى في السلع التانية وصباح الاستغلال اللي معلهوش كونترول
الواحد كان بيعرف يقاوح مع سواق التاكسي اللي ضارب العداد
دلوقتي هيحط صوابعه جوه عنيك وهو بيقولك مش هشغل العداد اصلا!!
من الاخر اللى معاه ومستريح مش فارق معاه الكلام دا مش هتفرق بنزين 200 او 300 ج زيادة شهرية عن قبل كدا وطبعا هو مؤيد للقرار الا من رحم ربى
للأسف الجميع ينظر تحت قدميه فقط
يا أيها المفكرون ، تكلفة الوقود جزء أساسي من تكاليف جميع السلع والخدمات
يعني باختصار ومن الآخر ، جميع السلع هتزيد بنسبة 100% على الاقل
واللي لسه مش فاهم ممكن أختصر الموضوع في جملتين:
الاولى : الحكومة سرقت نصف مدخراتك النقدية فعلا ان كان لديك مدخرات نقدية
الثانية: الحكومة سرقت نصف مرتبك ،
فمن يحصل على مرتب 1000 جنيه لن يستطيع أن يشتري بها إلا نصف ما كان يشتريه سابقا
كده يرجع الكل خطوة للوراء
ومن نختاره سوف نقدمه خطوة للأمام ، وهم الجيش والشرطة والقضاء
طيب حط نفسك مكاني ..
انا طالب في تالتة السن وعايش في طنطا وبسافر 3 ايام اسبوعيا القاهرة بحكم دراستي فلوس سفري ومصروفي علي بعض 550 جنية انا باخد من فلوسي وازود علي مواصلاتي عشان اروح بعربيتي بدل البهدلة والقرف و الفرق بسيط ..
دلوقتي لما يبقي بنزيني بس في الشهر 560 جنية وانا كل الفلوس الي بتجيلي 550 جنية شاملة مصاريفي الشخصية دلوقتي انا هخرج ازاي مش هخرج هقعد في بيتي هسافر ازاي ومتقليش اركب مواصلات عشان المواصلات عندنا غليت هية كمان بعد ما كانت ب 12 جنية للقاهرة عدت ال 15 جنية يعني فرضا 30 جنية رايح جاي و 10 جنية مواصلات داخلية يعني 40 جنية مواصلات وهحضر بقي كل محاضراتي مش هسقط محاضرات يعني هروح 4 ايام اسبوعيا يعني برضو 640 جنية شهريا للمواصلات ..
مين يرضي بالكلام دة ؟؟ ولما اخلص جامعتي هشتغل فين اساسا معا قرار الحكومة بتقليص عدد الموظفين و المعاش المبكر علي 55 سنة ومفيش تعيينات جديدة و السياحة انضربت !!
عاوز تصلح البلد مش تزود الضرائب علي الناس لا اعمل مشاريع ومصانع للشباب هينتجو ويسدو عجز الدولة ويعملو فائض في الميزانية انما ضرائب غلط ولية يغلو البنزين 80 و 92 بس بتاع الشعب و ال 95 بتاع الاغنياء ارتفع بنسبة 7% فقط اة صحيح نسيت دة راجل شقيان طول النهار وبيتعب اوي علي ما يركب المرسيدس او الاودي بتاعتة مينفعش نغلي علية انما الناس الي بتركب عربيات متوسطة اة دول استغلاليين ولما متر الغاز يوصل ل 110 قرش برضو عشان احنا شعب وحش استغلالي انما لما يروح ب 10 قروش اسرائيل دة عشان هما شعب لطيف ومحترم وبيحافظ علي الاقتصاد المصري ..
دة غير ان معا ارتفاع اسعار الوقود كل السلع هتزيد و الغلابة هما الي هييجي علي دماغهم يعني الفقير هوة الي هيشيل الليلة و الاغنياء ولا هيحسو بحاجة المفروض يحصل كان تطبيق الكروت الزكية بعدد محدد للبنزين مدعم لو تعديت العدد دة يزيد الفلوس زي شرائح الكهرباء كدة الي زادت برضو معا ارتفاع الوقود
الخلاصة الحكومة دي فااااااااااااااشلة بمعني الكلمة
كده الواحد هيفكر كويس
قبل ما يتاخد اي قرار خاص بالعربية