مقارنه ما بين نيو لوجان 2014 وهيوانداي فيرنا
مقارنه بين نيو رينو لوجان وهيوانداي فيرنا
اولا هتكلم عن الفيرنا لانها كانت معايا 6 سنين وبعتها شهر 12/2013 وكانت عاملة 73000 كيلو
اولا هتكلم عن العيوب كعادتي
1- سيارة تفتقر الي وسائل الامان بمعني الكلمة
2- تقفيلها به عيوب كثيرة
3- ضعف الفرامل تقريبا مفيش فرامل
4- ضعف الصاج مع اقل شئ بتتطبق
5- ضعف الثبات مع اني كنت مجنط 14
6- خامتها الداخليه رديئة من سماعات الي تابلوه الي الكاسيت الي فرش الكراسي
7- ضيقه جدا سواء الشنطه والكنبة ايضا
8- ارتفاعها قليل جدا عن الارض وادائمة الاحتكاك بالمطبات
9- غالبية قطع غيارها في السوق مضروبة وعانيت من الموضوع ده كتير
10- توكيلها اكبر توكيل نصاب في مصر وعملت معاهم مشاكل كتير
11- العزل ضعيف جدا وصوت الماتور عالي ومزعج
12- استهلكها للبنزين مرتفع نظرا لوجود 2 كامه
13- السقف قريب من رؤس الركاب
مميزاتها
1- سيارة عملية جدا للعمل الشاق
2- ماتورها قوي وسحبها ممتاز
3- تكيفها ممتاز بمعني الكلمة ولا يؤثر في السحب
4- قطع غيارها متوفرة ومعظم الصنايعية بيفهموا فيها وانتا وحظك
5- وضوح الرؤية الامامية والخلفية وابعاد السيارة بطريقة سهله
6- تجميعها ممتاز الي سرعة 100 كيلو وبعدها يقل التجميع بطريقة كبيرة
7- الصراحه مشتكتش ابدا طول ال 6 سنين من اي عيوب في السيارة وخاصة الميكانيكيه
8- العشفه جيده وليست ممتازة ـــــــــــــــــــــــــ ـــــــــــــــــــــــــ ـــــــــــــــــــــــــ ـ
ثانياًُ النيو لوجان
عيوبها
طبعا انا تقريري عنها ولا هيبقي ليه اي لازمه لاني يدوبك استخدمتها مسافة 153 كيلو فقط الي الان
بس اللي واضح امامي كالتالي
1- الرؤية الخلفية ضعيفه جدا ولا استطيع حتي الان حساب ابعادها
2- يوجد رعشه بالفتيس ولا اعرف سببها حتي الان
3- توكيلها ضعيف جدا ولا يقوم بواجبه تجاه تعريف العميل بسيارة جديدة بأوبشن جديد ولا يعرف اشياء كثيرة عن السيارة
4- اختلاف لون الحوض والشنطه عن لون السيارة الخارجي
5- اماكن زرائر الزجاج الخلفية والكلاكس لكن اتعودنا عليها الحمدلله
6- استهلكها للبنزين عالي شوية وطبعا مش هعرف احكم غير بعد ما اعملها الصيانة الاولي
7- عدم استيعاب الشاشة لاكثر من تقرير في وقت واحد
8- الكاوتش ردئ جدا وبيلم معايا كل مسمار في الشارع ونوعه باروم
9- عفشتها ناشفه شوية
10- سهل تعرضها للخدش والتجاريح نظرا لابعادها الغير مرئية
11- قطع غيارها غير متوفرة حتي الان وربنا يستر
12- اسعار صيانتها مرتفعه في التوكيل عن الفيرنا
13- سخونه تظهر عند القدمين
نيجي بقا لمميزاتها
1- عوامل الامان جيده جدا 2 ايرباج وفرامل abs
2- تكيفها ممتاز ولا يؤثر علي سحبها
3- خامتها الداخلية جيده جدا
4- الاوبشن اللي فيها الكل عارفه ومش موجود في عربيات تمنها معدي ال 150 الف
5- راحة ممتازة في قيادتها وللركاب في الخلف والامام
6- الشنطه كبيرة جدا وتفي بالغرض علي اكمل وجه
7- ارتفاعها عن الارض ممتاز وارتحت بعد صبر 6 سنين
8- ثباتها ممتاز وتجميعها وسحبها ايضا
9- الكاسيت جميل وصوته نقي وحاسس اني مركب صب ووفر
10- فراملها ممتازة ولا تزحف مثل الفيرنا علي الارض الرملية او المبلله
11- السقف مرتفع وليس قريب من رؤس الركاب
وفي النهاية احب انوه اني اتعلمت ان رقم واحد هو امان اسرتي ولذلك قررت شراء اللوجان لاني شوفت اهوال مع الفيرنا والحمد لله ربنا كان ساترها معايا للاخر وانا تحت امركم في اي استفسار وربنا اللي اعلم انا قولت كل اللي جوايا عن العربيتين بمنتهي الحيادية بدون التحمل علي فئة دون الاخري
