رحلة صيانة الـ5000ـــ كيلو الأولى للسيارة القرطبه فى التوكيل !!
اقتباس:
المشاركة الأصلية كتبت بواسطة mohamed ibiza
شكرا للتفاعل يا بوب قريت تقييمك ربنا يباركلك فيها:):)
عايزك تقول اول ما روحت التوكيل انطباعك ايه عن المعاملة هناك مع المهندسين الصيانة خدت وقت اد ايه اايه اللي اتغير في الصيانة مدي اهتمامهم بالعربيات عموما تمن الصيانة كام و هل ملتزمين بمواعيد نسليم العربية ولا لا و في النهاية كانت رحلة موفقة و سعيدة و السلام عليكم و رحمة الله و بركاته :D:D:D:D
:funny34d:
السلام عليكم ورحمة الله وبركاته ..
أنا الصراحه مكنتش هكتب الموضوع لانى مش لاقى ماده دسمه تتقال بس الأخ محمد شجعنى انى أكتبه وأخدت اقتباس من مشاركه ليه أخليها دليل لكتابة موضوعى.
أنا هكتب الموضوع على شكل نقاط عشان يبقى مرتب وسهل.
- طلعت الصبح من بيتى فى الشيخ زايد يوم الجمعه حوالى الساعه 8:45 صباحا وصلت التوكيل فى أرض اللواء الساعه 9:05 بالضبط .
- التوكيل مش زحمة خالص مع أن يوم الجمعه أجازه والمفروض يكون زحمه.
- المكان مرتب جداً السيارات البورش ليها مكان لوحده كده شكله تحفه, والسيات ليها مكان تانى مع المابل والموسو.
- أول ما دخلت فى واحد أستقبلنى وخلانى أركن فى المكان المخصص .
- ( فى عيب: أول ماتدخل بالعربيه أول شيئ تشوفه عينك سيارات الحوادث ربنا يلطف بينا المفروض تكون بعيد عن عين اللى داخل فى وشه كده أول حاجه).
- يدوب طلعت من العربيه كان واحد كيس كرسى السائق ووضع كرتونه فوق الدواسه.
- ثوانى وجالى واحد تانى قالى ممكن تفتح الشنطه وشاف الأستبن والكوريك وكده يعنى وثبتهم عنده وقالى شكرا.
- ثوانى كمان وجالى مهندس لابس أزرق قالى تحت أمرك قلتله صيانة ال 5000 يا باشمهندس, قالى حاضر ودخل العربيه وكتب قراية العداد وقالى ليك أى ملاحظات فى العربيه قلتلة ايوه ( هقولكم انا قولتله ايه بعدين) , طلب الضمان وكتب فيه الصيانه وكده يعنى وقالى الصيانه الجايه عند ال 10000 , وادانى الضمان تانى وقالى أستريح حضرتك العربيه هتدخل الورشه حالا.
- دخلت الاستراحه المكان جميل ورايق وهادى ومكيف وفى شاشات تليفزيون وكافيتريا ممكن تطلب شاى وكده يعنى .
- الصراحه أنا من الناس اللى مش بتعرف تستريح قعدت أطلع ابص على العربيه وادخل تانى الميزه هناك أنك ممكن تشوف عربيتك وهى فى الورشه بس من بره.
- كنت شايف العربيه وهى مرفوعه والعمال شغالين فيها عادى يعنى.
- بعد حوالى 45 دقيقه العربيه خرجت من الورشه بس الصراحه العربيه يدوب قعدت فى الورشه 30 دقيقه بالضبط .
- المهندس كان شايفنى أدامه فقالى العربيه جاهزه قلتله طيب ممكن نشوف حل فى السنتر قالى طيب تعالى نشوف ملاحظاتك دى فى السنتر بتاع الليون قلتله ماشى زى الفل.
( انا بقى قلتله وقت الأستقبال ان السنتر أما بقفله من جوه المفروض الاربع ابواب يتقفلوا هم فعلا بيقفلوا بس بيتفتح الباب بعد تانى محاولة للفتح من جوه طبعا مش من بره ).
جربناها فى العربيه الليون طلعت نفس الموضوع فقالى هو ده نظام السنتر ده, قلتله ماشى يمكن ليهم حكمه فى كده قالى عشان لقدر الله لو حصل حادثه الركاب يعرفوا يخرجوا لكن لو مفتحش محدش هيعرف يخرج من العربيه , وقالى ولو معاك اطفال وخايف يفتحوا الباب ابقى أقفل الحمايه بتاعة الابواب الخلفيه , الصراحه قلتله كلام مقنع .
- قلتله طيب ممكن اعرف ايه اللى تم فى العربيه قالى عملنا كذا وكذا وكذا ... تحت فى الخلاصه هقول.
- شكرا يا باشمهندس قالى تحت امرك سلام أتفضل تصريح الخروج شكرا ياباشمهندس سلام .
خلاصة صيانة الـ5000ـــ كيلو الأولى للسيارة القرطبه فى التوكيل
- مدة الانتظار : 45 دقيقه
- مدة الصيانه : 30 دقيقه
- الشغل اللى تم فى العربيه :
-- تغيير زيت موبيل وان وفلتر.
-- تربيط عفشه.
-- تنظيف فلتر الهواء.
-- تزويد مياة التبريد.
التكلفه صفر جنيه مصرى :D !!!؟؟؟
أصلى لما أشتريت العربيه من التوكيل أدونى هديه كانت الهديه دى جواب صيانه مجانيه أول 5000 كيلو شامل تغيير الزيوت والمصنعيات وكله .
مش عارف الجواب ده بيسلموه لكل اللى بيشتروا ولا ايه ... بس أن سئلت المهندس طيب هى التكلفه المفروض تكون كام فقالى حوالى 350 جنيه مش اكتر يعنى .
تقييم صيانة الـ5000ـــ كيلو الأولى للسيارة القرطبه فى التوكيل : 9.5 /10
أتمنى أنى أكون قد وفقت فى سرد رحلة الصيانه كما حدثت بالتفصيل.
وأسف على الأطاله :D .
