الموضوع: تقييـم كيـا بيكـانتــو !!

الف مبروك عليك و تقيم ممتاز

المشاركة الأصلية كتبت بواسطة Abo Yasmin

أحب أحكى لكم عن تجربتى الخاصة فى قيادة أنواع كتير من السيارات بحكم عملى فى التسويق

وهتكلم هنـا عن كيـا بيكـانتو 2012 أتوماتيك

طبعاً مش أول عربية ركبتها بس هتكلم عنها هنـا ! لييييه ؟!

لأنه مكـانها :) ده إنت غريب يا هـانى :)

الحقيقة أنا ركبتها ع الزيرو وده مجرد تقييمى ليها باختصار غير مخل :)


مميزات السيارة :

1- شكلهـا حلو :) هىّ ملمسـة على حريمى كـده :)

2- اقتصادية فى البنزين

3- صغيرة وممكن تركن فيها فى أى حتة :)

4- التكييف ممتـاز الحقيقة

5- التوكيـل بتاعها محترم ( أنا كنت بوديها التوكيل اللى جنب مصنع لورد فى اسكندرية )

نيجى بقى للعيـوب وآآه من العيـوب :

1- العفشة بتاعتها زفت ! زفت واحد مش كفاية مليون زفت !! ناشفة جداً جداً ( على فكرة أنا ركبت السيراتو برضه ناشفة الظاهر ده سلو العربيات دى :) ) بتاخد المطب الصغير وتحس إن العربية هتنخلع ولو أخدت مطب كبير شوف الخضة اللى هتحصلك !!

2- الكنبة الخلفية مش مريحة أبدااااً ! يعنى لو حظك وركبت فى البيكانتو ورا يبقى نقولك ألف سلامة على رجلك بعد ما تنزل :)

3- الشنطة زى قلتها بصراحة !! أنا لو من الصانع ألغيها وخلاص ! لو أخدت شنطتين هاندباج وسط يبقى إنت فيك شىء لله

4- سحبها سىء ومش ثابتة أبداً على الطريق خصوصاً فى السرعات العالية ( أساساً إنت لو ماشى بيها على 120 تحس إنك جبت آخرهـا !! )

5- التنك بتاعها صغير ... بياخد 30 لتر وممكن تحشر معاهم 5 لتر رخـامة كده ! يعنى فى أزمـة البنزين دى تبقى مهموم إنك تمونها كل شوية !

6- العربية غالية جداً بالنسبة لإمكانيتها مش عارف على إيه ! الشركة كانت جايباها موديل السنة بـ 84 ألف جنيه كاش ! اللى يغيظك بقى إنها دلوقتى وصلت لـ 95 ألف كاش بعد موضوع زيادة الدولار !! بصراحة ما تسواش !!

7- الاستبن بتاعها صغير ولا يعتمد عليه ( ومحدش يفهمنى غلط أنا بتكلم ع العربية مش فى السياسة )

باختصـار العربية ممكن تناسب البنات اللى مشاوريها بسيطة ! بس البنات السويقة مش هتعجبهم العربية دى خالص ! وممكن تناسب الرجالة القصيرين :) لأن لو إنت طويل يبقى هتعوز أكيد فتحة فى السقف :)

بجـد هي عربية وحشة جداً من الآخــر وأنصحك إوعى تضيع فلوسك عليها ! طبعاً فيها مميزات وعيوب تانية مذكرتهاش لأنها ثانوية بالنسبة لى ! يعنى مثلاً التابلوه بتاعها كويس ومرايات كهربا وفيها خاصية الإيكو لتوفير البنزين بس ده كله موجود فى عربيات تانية أحسن منها ألف مرة ! وفيها عيوب بسيطة برضه زى إن زرار الإنتظار بعيد عن متناول إيد السائق والبربيز بتاعها صغير بس دى حاجات مقدور عليها ! أنا قلت المميزات والعيوب الرئيسية من وجهة نظـرى طبعاً

وإلى لقـاء آخــر مـع سيارات أخــرى ورمضــــــــان كريم

بالنسبة للعيوب
1- عفشة العربية عادية مش زفت فيها دبدبة سنة بسيطة ممكن يكون بسبب الجنوط بس فى المجمل العفشة كويسة ومتنساش فئة العربية
2- موضوع الثبات عن تجربة للصنى القديمة واللانوس مثلا اعتقد البيكانتو الجديدة افضل ولو هتقرانها بفئتها زى الـ I10 فاهي اثبت ومتنساش انها فى النهاية city car فا متستناش منها كتير
3- موضوع السحب .. 1250 سى سى و dual CVVT على الحجم ده مش عارف ازاى سحبها زفت بصراحة
4- تانك البنزين 35 لتر بالنسبة لحجمها واستهلاكها كويس .. هو مش هيعمل تانك 60 لتر على عربية بالحجم ده ويبقى فى الاخر وزن وحمل على الموتور
5-موضوع السعر تمام هى غالية ومتستاهلش الفلوس دى كلها كرقم ... بس هو ايه اللى يستاهل تمنة فى مصر
6- الاستبن ده space saver tyre وده موجود دلوقتى فى عربيات اضعاف البيكانتو كحجم وسعر( الـ BMW قبل ماينزلوا الـ run flat tyre كانت بتنزل بيه) وهو مش عيب هو بيحطلك حاجة متاخدش مساحة وفى النهاية الاستبن وظيفتة انك تمشى عليه لحد ماتصلح العجلة البايظة مش تركبه وتنسى

كده العربية بتقيم قوي شوية فراي

المشاركة الأصلية كتبت بواسطة ahmedsrs

باشا العربية تعتبر ناجحة جدا والدليل انتشارها الكبير وطبعا كل عربية لها عيوب لان الصانع بيستهدف فئة معينة لكل موديل يعنى مثلا العربية متنفعش اسرة كبيرة

الانتشـار مش دليل أبـداً على النجـاح يا صديقى :)

يعنى مثـلاً الـ 128 منتشرة هل معناه إنها كويسة ؟

والفيرارى مش منتشرة هل معناه إنها وحشـة ؟!

عمومـاً دى مسألة أذواق وحضرتك عندك حق كل عربية فيها عيوب وفيه واحد يستحمل العيوب دى وواحد تانى ما يستحملهاش

شرفتنى يا فنـدم وكل سنة وإنت طيب

المشاركة الأصلية كتبت بواسطة kokowasfy

الف مبروك عليك و تقيم ممتاز

الله يبـارك فيـك

شكـراً يا صاحبى :)

المشاركة الأصلية كتبت بواسطة eng\ahmed

بالنسبة للعيوب
1- عفشة العربية عادية مش زفت فيها دبدبة سنة بسيطة ممكن يكون بسبب الجنوط بس فى المجمل العفشة كويسة ومتنساش فئة العربية
2- موضوع الثبات عن تجربة للصنى القديمة واللانوس مثلا اعتقد البيكانتو الجديدة افضل ولو هتقرانها بفئتها زى الـ i10 فاهي اثبت ومتنساش انها فى النهاية city car فا متستناش منها كتير
3- موضوع السحب .. 1250 سى سى و dual cvvt على الحجم ده مش عارف ازاى سحبها زفت بصراحة
4- تانك البنزين 35 لتر بالنسبة لحجمها واستهلاكها كويس .. هو مش هيعمل تانك 60 لتر على عربية بالحجم ده ويبقى فى الاخر وزن وحمل على الموتور
5-موضوع السعر تمام هى غالية ومتستاهلش الفلوس دى كلها كرقم ... بس هو ايه اللى يستاهل تمنة فى مصر
6- الاستبن ده space saver tyre وده موجود دلوقتى فى عربيات اضعاف البيكانتو كحجم وسعر( الـ bmw قبل ماينزلوا الـ run flat tyre كانت بتنزل بيه) وهو مش عيب هو بيحطلك حاجة متاخدش مساحة وفى النهاية الاستبن وظيفتة انك تمشى عليه لحد ماتصلح العجلة البايظة مش تركبه وتنسى

الأول ألف شكـر لردك يا بشمهندس :)

رمضــــان كــريـم :)

1- عفشـة العربيـة وحشـة جـداً بالنسبة لى ، أنا جربت عربيات كتييير جداً وبهتم أوى بموضوع العفشة بالذات
2- أنا جربت اللانوس طبعاً وهى مش ثابتة على الطريق خالص وبالنسبة لى البيكانتو زيها :)
3- بالنسبة لموضوع السحب سألت مرة المهندس اللى فى التوكيل بتاع سموحة الراجل استغرب وقعد يبحث لقى إن نظام الإيكو شغال وقالى ده نظام بيوفر الوقـود فراح لاغيه بس أنا محستش بفارق كبير ! يعنى مثلاً الشغل عاطينى دلوقتى عربية فيرنا مستعملة ومفحوتة شغل لكن سحبها رااااااااااائع :)
4- بالنسبة لشغلى موضوع التنك ده عيب مش ميزة لأنى ممكن أروح المنيا مثلاً وآجى فى نفس اليوم على اسكندرية أو بروح محافظات بعيدة ومش معقول كل شوية أدخل أبنزن وكنت بتعذب السنة اللى فاتت أيام أزمة البنزين ! هيا ممكن العربية تكون كويسة من ناحية التنك بالنسبة للى مشاويره صغيرة وعلى أده بس بالنسبة للشغل والجرى على السكك لا :)
5- عندك حق :) إيه اللى يستاهل سعره فى مصـر :)
6- برضـه موضوع الاستبن ده مش ينفعنى بسبب شغلى برضه لأن الاستبن الصغير متقدرش تمشى عليه بسرعة أكتر من 80 كم/ساعة وطبعاً كتير جداً ببقى فى المجاهـل على الطريق :)

فى النهاية الحمد لله الشركـة عرفت إن البيكانتو مش بتاعة شغل هاردكور وسحبت كل العربيات من المهندسين وعطتنا هيوندايات وشيفروليهات :) نصيبى جه فى الفيرنـا :)

بشكرك جداً على مناقشتك الثرية

تحيــــاتى لك