عرض للطباعة
انا جا لي عقد في قطر بفضل الله في شركة اسمها ابيلا ( شركة سوفت وير)
بس انا عايز اعرف نظام المرتبات هناك ايه ( متوسط مرتبات المبرمجين)
الشركة حجمها ايه في قطر وسمعتها ايه
السكن
المعيشة
إزاي اعمل استقدام لأسرة
الموصلات
الرخصة الدولي تنفع هناك
جزاكم الله خيرا
ايــــــــــــــه يا جماعة مفيش مصريين في قطر
هو أنا حالياً مش هناك بس العائلة عندى هناك كلها......
و كمان شغال فى مجال ال It :)
أنا فهمت من كلام حضرتك أن متزوج...و أعتقد من خبرتى بقطر أنك متوافقش على أقل من 12 ألف ريال شهرياً على أقل تقدير
ده لو متزوج ومعاك أطفال
متوسط أسعار الشقق فى الدوحة حوالى 5000 ريال فى الشهر ( غرفتين وصالة فى أطراف الدوحة ) وكل لما تدخل الى وسط الدوحة الأيجار يعلى
أسعار المدارس الخاصة غالية مش رخيصة....بس مش متأكد كام ( لو مدرسة معقولة....مش كامبريدج مثلاً.....هتكون فى حدود ال 15 فى السنة لأولى أبتدائى )
المدارس الحكومية هناك ببلاش ومستواها تقريباً زى المدارس الخاصة العادية اللى هنا
أستقدام العائلة بتعمله لما تستقر هناك ومكان شغلك بيساعدك فيه
الرخص الدولية بتمشى بس لو معاك فيزا سياحة أو زيارة.....لو معاك أقامة لأ
المعيشة مش هقدر أفيدك فيها كتير
المواصلات سهلة ومفيش غير تاكسيات....الأتوبيسات موجودة بس مش بيركبها غير الهنود والباكستانيين
متوسط مشوار التاكسى 10 الى 15 ريال
مع العلم أنى أخر مرة كنت هناك فى زيارة كانت فى أكتوبر 2006
انا راجع من هناك بقالي سنة....
فعلا مستوي المعيشة في قطر بقي مرتفع جدااااا.....يعني لو اسرة مصاريفك هاتبقي في حدود من 2000 لـ 3000 ريال شهري غير السكن...
الرخصة الدولي هاتمشي بيها هناك لحد ما تاخد الاقامة علي الباسبور...بعد كدة لازم رخصة قطري....ممكن اول ما توصل..تسوق بالدولي...وتروح المرور تطلع رخصة قيادة قطرية مؤقتة...وطبعا دي ليها امتحان زي العادية....بس ميزتها انك لما بتاخدها ما بتعيدش الامتحان تاني....ولما تاخد الاقامة بتروح تغيرها برخصة عادية...مدتها 5 سنين...
السكن هو اهم شيء هناك....وحاليا علي ما سمعت...ان الامير ثبت الايجارات لمدة سنتين...لان اسعارة بقت وهمية وبقي اغلي من دبي وابوظبي....
في اماكن السكن فيها ارخص..وفي نفس الوقت مش بعيدة عن الدوحة...زي االوكرة مثلا...حوالي 15 دقيقة....
وربنا يوفقك...
جزاك الله خيرا وبارك فيكم
السلام عليكم
انا الان اتحدث من قطر
انا بشتغل برضو في ال IT بس انا اساسا الشركة في مصر و باجي هنا عشان اخلص شغل و ارجع تاني
مش هاقدر افيدك كتير لكن ححاول
مبدئيا لو المرتب اقل من 20000 ريال قطري ماتفكرش
ده اللي انا شايفه و عارفه من الناس هنا
لازم تجيب عربية ماينفعش تعيش على المواصلات
لان متوسط التاكسي دلوقتي 30 - 50 حسب المسافة
ايجار الشقق بالنسبة لعيلة حيكون في حدود 7000 ريال
محتاج تدفع مصاريف مدارس و قسط عربية و معيشة حوالي 5000 في الشهر
و لو عرفت تحوش الباقي في ظل المغريات المهوله هنا تبقى بطل
على العموم شوف الموقع ده حيفيدك كتير http://www.qatarliving.com/
واتمنى اكون قدرت افيدك