الموضوع: حصريا لنايل موتورز : تغيير ثرموستات الكوعه للسيراتو خطوة بخطوة

المشاركة الأصلية كتبت بواسطة khaledazizeg

انا كان معايا عربية قبل كده بريليانس كنت لما بضور الصبح مثلا كانت بتاخد وقت عشان درجه الحرارة تعلا بس مؤشر الحراره كان بيتغير مع حرارة الجو والضغط وكده بس انا هنا فى الكيا بعد دقيقتين او 3 بلاحظ ان الحرارة بتعلا بسرعه بس بتثبت تحت النص ومش بتتحرك بعدها هل دا كويس والا مش كويس وبالنسبه للمروحه مش بتابعها بصراحه بس العربية عندى حراقه بنزين يعنى بعمل ال 280 كيلو ب 34 لتر فمش عارف هل دا طبيعي والا لا

أما بالنسبة لاستهلاك البنزين... ففي عوامل كتير بتفرق فيه


أولا.. الزحمة...
لإنك بتبقى معشق الأول أو التاني بالكتير..

ثانيا.. طريقة السواقة...
الضغط بشدة على دواسة البنزين علشان تاخد تسارع عالي بيزود استهلاك البنزين بجنون

ثالثا... استخدام الفرامل...
طبعا غريبة إن الفرامل تزود الاستهلاك... إنما استخدام الفرامل معناه إنك مضطر تدوس بنزين تاني علشان تزود سرعتك.. وده بيزود الاستهلاك

رابعا.. الأوزان الزيادة...
أي أوزان مالهاش لازمة في العربية بتزودلك الاستهلاك بدون داعي

خامسا... المعوقات الميكانيكية...
والمقصود بيها أي شيء بيسبب مقاومة على أداء الموتور .. زي الفرامل القافشة... اسطوانة الدبرياج المفوتة.. مساعد أو مقص معووج... باختصار لازم العربية تكون حالتها الميكانيكية زي الفل.

سادسا: المعوقات الكهربية...
زي مشاكل في الحساسات أو برمجة الكمبيوتر أو أسلاك البوجيهات وأي شيء له علاقة بدايرة الإشعال.

سابعا... نوع الوقود..
يعني ما ينفعش تحط بنزين 80 في عربية عايزة بنزين 90.. وأبسط نتيجة هتكون زيادة الاستهلاك لإن أداء العربية مع البنزين الـ80 أقل وبالتالي حتضطر تدوس بنزين أكتر علشان تاخد أداء مرضي من العربية... ده غير الآثار السلبية على الموتور


ثامنا... مشاكل دورة الوقود ...
زي انسداد في فلتر البنزين أو فلتر الهوا.. أو مشاكل في طلمبة البنزين... كل ده بيزود الاستهلاك

تاسعا... مشاكل في دورة الاحتراق..
يعني لازم تتأكد إن البنزين بيتحرق كويس ويخرج من العادم مستريح... فلازم تتأكد من فلتر الهوا... وإن علبة البيئة في الشكمان مش مسدودة



دول الحاجات اللي فاكرها دلوقتي



...