اخدت بنصيحتكم في السواقه بس واضح اني اتجراءت زياده لدرجه الموت

السﻻم عليكم ورحمه الله وبركاته
زي ماقريتو كدا في العنوان
جبت عربيه وشرحت بفهم ايه في السواقه واعضاء نصحوني اني ابقي جريئه شويه
ﻻن كانت مشكلتي الخوف
وفعﻻ اتجراءت وخرجت علي الطريق وسوقت كويس
بس حصل حاجه غير متوقعه طالعه كوبري وفي اول الكوبري اغم عليا مصحتش غير في المستشفي
عندي كسرين في الحوض وذرعاتي الاثنين اتكسرو اليمين كسر عادي والشمال بشرائح ومسامير شفت الموا والعجز فعﻻ
الحمدلله طبعا دا قدر ونصيب
بس قولت يمكن لو مكنتش طلعت كوبري ومشيت تحت كانت حادثتي تبقي اهون
بس برضو الحمدلله
انا بقالي شهر ونص عامبه الحادثه
فكيت دراعي اليمين الحمدلله علشان كدا بكتبلكم
نزلت كذا مره متابعه مع الدكتور بس حصلتلي حاله خوف اكثر
طبعا مش انا الي سايقه بس بقعد قدام جمب ابن عمي علشان ظهري
خوف بشع من اي حاجه في السواقه مجرد مايقرب من عربيه اصوت ومش بخليه يطلع كباري طبعا خاصه الكوبري الي عملن عليه الحادثه
يعني كنت بخاف دلوقتي بقيت جبانه وبترعب
العربيه طبعا اتعقدت منها واول ما اخرجها من القسم هبعها وخايقه مقدرش اسوق تاني
اعمل ايه انصحوني

اولا حمدلله علي سلامتك
ثانيا المفروض تكوني اتقنتي السواقه ف مكان معزول عن الزحمه زي اي مدينه جديده فاضيه يوم الجمعه الصبح .. وبعد فتره طويله تبدأي تنزلي اماكن هاديه و مفهاش سرعات عاليه ومع التعود هتبقي محترفه
قومي بالسلامه بإذن الله واتعلمي بالطريقه دي من اول وجديد الخوف هيروح منك لما تثقي ف نفسك

الف حمدا لله على سلامتك ،لو عايزه تتخلصى من مخاوفك وجهيها وعمرك ما هتخافى من حاجه بعد كده

الف حمد الله على السلامة بس معلش هوه ايه اللى حصل حضرتك دخلتى فى سور الكوبرى ولا ايه ؟
ونوع العربية ايه ؟
ولازم ترجعى ثقتك بنفسك تانى ياما هتفضل عقدة طول حياتك ومش هتروح

الف سلامه على حضرتك وقدر الله ما شاء فعل ..
بس انا مش فاهم اغم عليكى ليه وايه اللى حصل علشان يغمى عليكى ..

على العموم لو كان الاغماء حصل من خوف يبقى معندكيش ثقه فى نفسك وكده مينفعش تسوقى فى حياتك لو هاتفضلى كده ... الاول بقى لازم تاخدى ثقه فى نفسك .. ازاى بقى .. لازم حد يكون بيسوق كويس يركب معاكى ويمشى معاكى فى الاماكن اللى مش واثقه فى نفسك فيها وتكونى انتى اللى سايقه طبعا واحده واحده وهتلاقى نفسك بتاخدى ثقه كل فتره ومستواكى هايتحسن وتبدأى تنزلى لواحدك ولو فى ثقه وتحسن يبقى الحمد لله .. مفيش خلى حد يركب معاكى تانى لغايه ماتبقى كويسه وصدقينى ده افضل حل وهو ده اللى هايحل مشكلتك وعلى اقل من مهلك وانتى ماشيه ومتستعجليش وكل حاجه بتبقى صعبه فى الاول وتقومى بالسلامه ان شاء الله .

اقتباس:

---

المشاركة الأصلية كتبت بواسطة adnfalcon

اولا حمدلله علي سلامتك
ثانيا المفروض تكوني اتقنتي السواقه ف مكان معزول عن الزحمه زي اي مدينه جديده فاضيه يوم الجمعه الصبح .. وبعد فتره طويله تبدأي تنزلي اماكن هاديه و مفهاش سرعات عاليه ومع التعود هتبقي محترفه
قومي بالسلامه بإذن الله واتعلمي بالطريقه دي من اول وجديد الخوف هيروح منك لما تثقي ف نفسك

---

الله يسلمك بس انا سوقت فعﻻ وكنت بسوق كويس بس كانت مشكلتي الخوف بس وقعدت فتره ركنه العربيه تحت الببت ولما برجع من الشغل بسوق

اقتباس:

---

المشاركة الأصلية كتبت بواسطة mohamed saber

الف حمدا لله على سلامتك ،لو عايزه تتخلصى من مخاوفك وجهيها وعمرك ما هتخافى من حاجه بعد كده

---

الله يسلمك
ما انا بقيت بخاف اكثر هواجهه ازاي انا بقيت اخاف من اي حركه في العربيه

اقتباس:

---

المشاركة الأصلية كتبت بواسطة samoreception

الف حمد الله على السلامة بس معلش هوه ايه اللى حصل حضرتك دخلتى فى سور الكوبرى ولا ايه ؟
ونوع العربية ايه ؟
ولازم ترجعى ثقتك بنفسك تانى ياما هتفضل عقدة طول حياتك ومش هتروح

---

الله يسلمك
انا محستش بحاجه وﻻ حتى شفت العربيه لحد دلوقتي ومش راضيين يوروني صورتها بس عرفت انها مدمره
موعها فيات اونو
مخبتش في الصور انا وقعت من علي الكوبري
اخر حاجه حسيت بيها وانا لسه هطلع الكوبري وبعدها اغم عليا

اقتباس:

---

المشاركة الأصلية كتبت بواسطة j a g u a r

الف سلامه على حضرتك وقدر الله ما شاء فعل ..
بس انا مش فاهم اغم عليكى ليه وايه اللى حصل علشان يغمى عليكى ..

على العموم لو كان الاغماء حصل من خوف يبقى معندكيش ثقه فى نفسك وكده مينفعش تسوقى فى حياتك لو هاتفضلى كده ... الاول بقى لازم تاخدى ثقه فى نفسك .. ازاى بقى .. لازم حد يكون بيسوق كويس يركب معاكى ويمشى معاكى فى الاماكن اللى مش واثقه فى نفسك فيها وتكونى انتى اللى سايقه طبعا واحده واحده وهتلاقى نفسك بتاخدى ثقه كل فتره ومستواكى هايتحسن وتبدأى تنزلى لواحدك ولو فى ثقه وتحسن يبقى الحمد لله .. مفيش خلى حد يركب معاكى تانى لغايه ماتبقى كويسه وصدقينى ده افضل حل وهو ده اللى هايحل مشكلتك وعلى اقل من مهلك وانتى ماشيه ومتستعجليش وكل حاجه بتبقى صعبه فى الاول وتقومى بالسلامه ان شاء الله .

---

الله يسلمك
انت كنت متابع معايه لما كنت بسالكم عن مشكلتي في الحوف
اكيد مش اغم عليا ﻻني خايفه خاصه اني مكنتش خايفه اصﻻ ومشيت طريق اسماعليه الصحراوي وطلعت كوبري ونزلت عادي وقبل ما اطلع الكوبري الثاني اغم عليا
لما انزل من البيت هعمل تحليل سكر ﻻني لحد دلوقتي معرفش سبب الاغماء كل الي كان شاغلنا الكسور الي عندي

لو تفتكر كنت بقولكم سوقت علي طرق وجمب البيت بس كنت خايفه انزل لوحدي واروح الشغل

طيب شوفي السكر والضغط وخير بإذن الله

وعليكم السلام ورحمة الله وبركاته
لا حول و لا قوه الا بالله
قدر الله و ما شاء فعل
الحمد لله على كل شئ و ربنا يخلف عليكى
بس لازم حضرتك ان شاء الله لما تقومى بالسلامه لازم ترجعى تسوقى تانى علشان تكسرى حاجز الخوف و بعد كده قررى عايزه تسوقى تانى ولا لأ

قدر الله وماشاء فعل
وحمد الله على سلامة حضرتك

انا من رأيي بلاش سواقة خالص .. المرة دي جات سليمة الحمد لله
انا مش بهبط حضرتك بس اللي حصل ممكن يتكرر تاني لاقدر الله في ظروف مختلفة

حمدا لله على سلامتك
قدر الله ومشاء فعل

الخوف بعد الحادثة طبيعي بس لازم تتغلبي عليه عن طريق التحصين التدرجي .. بمعنى عشان يتلاشى الخوف وترجع الثقة في النفس تاني
بعد ما حضرتك يا فندم تقومي بالسلامة وتعملي التحاليل اللازمة عشان تعرفي سبب الإغماء المفاجئ ..
و ترجعي تسوقي تاني لمشاوير قريبة وتدريجيا كل حاجة هترجع زي الاول واحسن لانك تعلمتي واكتسبت خبرات جديدة ...
وحمدا لله على سلامتك مرة تانية ..

و عليكم السلام ورحمة الله وبركاته

الحمدلله على سلامتك .

أنا شايف إن ربطك بين الحادثة و الخوف من السواقة غير عادل . :original:
حضرتك ما إرتكبتيش خطأ في السواقة أو العربية عملت معاكي مشكلة هي إللي أدت للحادث .

حالة الإغماء دي كان ممكن تحصل وحضرتك في أي مكان , و الحمدلله إنها حصلت في مكان فيه ناس ممكن تساعدك و توديكي المستشفى في الوقت المناسب .

المهم تعرفي سبب الإغماء و إن شاء الله تخفي من كل الإصابات وترجعي أحسن من الأول كمان .

قدر الله وماشاء فعل
وحمد الله على سلامة حضرتك
وشفاكى الله وعافاكى مما ابتلا به كثير من عباده

قدر الله وماشاء فعل
وحمد الله على سلامة حضرتك
وشفاكى الله وعافاكى شفاء لا يغادر بعده سقما ان شاء الله....وقي الحمد لله

انا سجلت فى المنتدى ده علشان موضوعك بصى انت الحصلك ده طبيعى وطبيعى تفضلى خايفه بعد الحصل ومعرض احسن سواق فى العالم يحصل معاه كده بس امع الوقت هتنسى النسيان ده نعمه من عند ربنا انت وشطارتك بقى هتاخدى وقت اد ايه بس

كان عندي 11 سنة ..وكنت سايق عربية والدي الله يرحمه ..كانت أمي قاعده جنبي ..وكان أخويا الصغير راكب معانا ..كان عندنا حته أرض زراعيه كده صغيره كنا مقيمين فيها إقامة كامله ..عشان كده والدي الله يرحمه كان جايب عربيه نص نقل عشان خاطر الأرض ومتطلباتها من من نقل عمال وخلافه ..وعلمني السواقه قبل ما يموت ..وبعد ما مات بقيت أنا للي أسوق ..وكنت بسوق وبطلع على طرق سريعه وأجري وأبطئ وكله تمام

في مره وأنا ماشي العربيه قطعت بنزين لسبب غير معلوم ..قابلنا واحد جارنا بعربيته ..طلبنا منه إنه يقطرنا لغاية البيت لغاية ما نجيب ميكانيكي يشوف فيها إيه ..ربطت العربيه في عربية جارنا ..وقعد قاطرنا ..وأنا بلف ..الطاره قفلت ..أو سوجرت ..عشان المفتاح مكانش راكب..إنتابتني حالة من الرعب ..وخصوصا إن مع قفلت الطاره وعدم مقدرتي على التحكم في توجيه العربيه ..لقيت العربيه رايحه ناحية الترعه ..وما كان مني إلا إني صرخت ..ونطيت من العربية ..وسيبت أمي وأخويا جوه العربيه ..موقف في منتهى النداله ..بس كنت لسه صغير ..ستر ربنا العربيه جات على حافة الترعه ووقفت..بحذا الترعة بالضبط ..وكأننا في فيلم عربي ..العربية كانت عاوزه لمسه عشان تتقلب وتنزل في الترعة ..الناس جريت ووقفوا من الناحيه اللي فيها أرض وقعدوا شادين العربية ناحيتهم عشان العربيه ما تتقلبش ..لإنها كانت على حذا الترعة ..وطبعا طلعوا أمي وطلعوا أخويا ..وأنا اللي نازل عليا صريخ وبكاء هيستري

قعدت بعد الحادثه دي بسنة تقريبا أقوم بليل وأنا ببكي أو ألاقي دموع في عينيا ..وقررنا بعد الحادثه دي مباشرة العربيه ..وكنت واخد قرار في نفسي إن مستحيل أسوق عربيه تاني في حياتي كلها

القصه دي ليها تقريبا دلوقتي 25 سنة ..دلوقتي ..الحمدلله على نعمة ربنا ..كان عندي عربيه وبعتها وجبت غيرها من باب التغيير للأفضل ..وبسوق عربيات عادي جدا

مفيش داعي نركز في اللي حصل كتير ..ننساه ..ناخد القرار اللي يريحنا ..على الأقل في الوقت الحالي ..بلاش نعاند نفسنا ..نسيب كل حاجه لوقتها ..وللظروف ..

اهم حاجه ان حضرتك تعرفي سبب الاغماء اللي حصل ده و تعالجيه لانه لاقدر الله ممكن يحصل في اي حته و يعملك مشاكل. موضوع الخوف من السواقه ده طبيعي بعد الحادث و مسأله وقت مش اكتر و مهم قوي تبقي مقتنعه ان الاغماء هو السبب مش عدم خبره حضرتك في القياده