عملت كام غلطة سواقة النهاردة ؟ ؟ ؟

**د.أبونضال** · 17-10-2008 12:20 AM

أنا مش سواق قديم قوي ، بسوق من سنتين وشوية بس ، وطبعا باعمل غلطات سواقة ، بعضها ممكن يكون خطير ومش لازم يتعمل ، وبعضها ممكن أكون مش عارف إنه غلطة سواقة أصلا ، وبعضها بتفرضه عليك ظروف الطريق . ففكرت إننا هنا في المنتدي نعمل موضوع عن أخطاء القيادة علشان ما نعملهاش . وحاحكيلكو النهاردة عن أكبر خطأ قيادة ممكن أكون باعمله واتكرر معايا كتير وهو " عدم الانتباه إلى سلوك السائقين المحيطين " وهاحكيلكو حكاية الحادثة اللي عملتها من حوالي سنة لما ما انتبهتش لسلوك سواق أوتوبيس كان ماشي قدامي على الطريق السريع .
كنت ماشي على شمال الطريق قبل فتحة عبور إلى الخلف "يو ترن يعني" وكان فيه أوتوبيس واقف على يمين الطريق قدام الفتحة بالضبط ، وأنا قادم بسرعة 80 كلم كان الأوتوبيس اتحرك بطء وبعدين وقف فجأة ، ما انتبهتش لمعنى وقوفه الفجائي وزودت سرعتي فإذا بعربة كارو تخرج من أمام الأوتوبيس بسرعة تقودها فتاه في الثانية عشرة تقريبا تنظر إلى الي وأنا قادم بينما تحاول إيقاف الحمار بينما أنا أحاول كبح السيارة وأنا اتجه بزاوية بسيطة جدا ناحية اليسار لكي لا أصطدم بالجدار الفاصل ، فاصطدم رفرفي الأيمن بمسمار في طرف الخشبة التي يعلق فيها الحمار فشقه نصفين ثم توقفت في منتصف فتحة اليو ترن ونظر سائق الأوتوبيس بلا مبالاه ثم أكمل طريقه وأتي بعض الفلاحين مسرعين كانت الفتاة والحمار والكارو بخير ، الفتاه كانت مفزوعة بالطبع ، وأخذ الفلاحون يهدئونها ويهدئونني ، ولما وجدت كل شيء على ما يرام ، وأنني لم أتسبب في أذي . وأن كل الخسائر قد تلخصت في الرفرف الأيمن والمرآة غادرت المكان حامدا الله. طبعا الفتاة مخطئة تماما لأنها عبرت دون أن تكشف الطريق ، وسائق الأوتوبيس كان من الممكن أن يشير لها بالتوقف أو يشير إلي بالحذر ، لكن لو كنت أخذت جانب الحذر وتسائلت في نفسي " هو وقف ليه بعد ما مشي ؟؟" بينما أهدئ سرعتي حتى تتضح الأمور لما حدث ما حدث .
نفس الأمر أقوله لنفسي عندما آكل مطبا فبعد أن آكل مطبا ما ، أجد الإجابة على سؤال غامض كنت أتسائله منذ قليل " هي الناس إللي سايقة حولية دي ماشيين بالراحة ليه؟؟؟؟؟ ".
أكبر غلطة سواقة ممكن الواحد يعملها إنه ما ينتبهش لسلوك السائقين المحيطين به .
أدعوكم للمشاركة بأخطائكم لكي نتجنب إرتكابها

**waled369** · 17-10-2008 01:57 AM

حمد الله ع السلامة يا باشا
أهم مبدأ في السواقة
احترس من خطأ الغير
جت سليمة الحمد لله

**Abdo_Eldesokey** · 17-10-2008 04:19 AM

هيا معظم الغلطات بتبقى في لحظات الغضب

طبعا ً بتبقى بسبب واحد ظريف متعلم السواقة في الحمام

بلاقي نفسي اتوماتيك مسقط نقلة وهاتك يا غرز وغباء على الخلق

بس الحمد لله الواحد معدش زي الأول ومش أي حاجة تنرفزه

فعلا ً صدق رسول الله - صلى الله عليه وسلم - عندما قال " ليس الشديد بالصرعة ، ولكن الشديد من يملك نفسه عند الغضب "

**MIS** · 17-10-2008 06:53 PM

توقع الخطا من الجميع

**دموع الثلج** · 17-10-2008 07:52 PM

انا كنت بعمل نفس الغلطه دى لكن فى مره لولا ستر الله كان انقلب حالى

دائما بحب امسك الشمال فى الشوارع اللى بيكثر فيها الميكروبات لانى لو مسكت يمين مش هوصل كل شويه قدامى ميكرو بيحمل

فى مره داخله نفق الهرم من الجيزه المكان ده كله هماجيه من الركاب وسواقين الميكروبات
كنت ماسكه اقصى الشمال وقدامى بشويه فى الحاره اللى فى النص سواق ميكروبات الجمعيه التعاونيه دى
الحاره اليمين دى انساها لانها مرتع للميكروبات بيوقف فى مدخل النفق يركب ناس
وهيصه وهرجله
ماسكه شمال وماشيه بسرعه 50 ببص قدامى على اليمين لقيت ميكروباص الجمعيه واقف توقعت ببساطه انه ممكن يكون واقف فى الحاره اللى فى النص بيركب ناس كعادتهم
ودوست عشان اعدى منه

وااااااااااااااااااااذااا ااااااااااااا بعــــــا ئلـــــــــــــه كامله طالعه من قدام الميكروباص بتجرى قدامى راجل ومراته وفى ايدهم طفلين ورضيع

مفيش مجال اتفادهم يمينى ميكروباص وشمالى سور يعنى هخبطهم لا محال
والله ربنا سترها فى جزء من الثانيه من قوه الفرامل ABSانا حسيت ان خمسين عربيه خبطونى من ورا

لكن الحمد لله العربيه وقفت فى الوقت المناسب ومحدش اصيب بفضل الله

عاوزه اقولك انى فضلت مخضوضه يمكن اسبوع من فرمله العربيه

خطاء الغير ازاى يعدوا الشارع فى منزل نفق ومش مكان عبور يعتبر مدخل سريع والله ماعارفه الناس دى عاوزين يرموا بلاويهم علينا ليه

الدرس اللى اتعلمته انه متخطاش من ناحيه الشمال اى عربيه على يمينى واقفه بشكل مش طبيعى
مع ان فى قواعد المرور
ممنوع تخطى سياره من ناحيه اليمين فى مصر لا يمين ولا شمال

**mohamed ibiza** · 17-10-2008 08:06 PM

مسوقتش النهاردة خالص:d:d

اخر مرة سوقت فيها من كام يوم كده كنت ماشي زي الالف والله بس مكنتش حاطط الحزام:D

**dr.nemo** · 13-11-2008 04:02 AM

:coolgleamA::coolgleamA:انا بسوق بقالي شهرين تقريبا
حصل اني كنت ماشي في احد الشوارع .... لقيت أولاد بتلعب على يمين الطريق
مش عارف ليه مرتحتش لهم!!!
هديت واديت نور وكلاكس
بس مفيش فايدة

فجأه سمعت صوت ارتطام من اليمين ولقيت ولد وقع تحت العربية
فرملت ونزلت لقيت الولد جري وزمايله بيشتموني
والناس متجمعة وبتقولي هو الغلطان ومحترد على عيال
أنا كنت قلقان عالولد وكنت ناوي اعالجه مهما كلف الأمر
لكن لما لقيته جري سكت ومشيت حوالي 500 متر وركنت خمسه كده
علشان اريح اعصابي
وطبعا معرفتش انام من تأنيب الضمير واحتمالات اصابة الولد
بس انا شايف ان اكتر مشاكل السواقة هنا في مصر المشاة يليها سيرات الأجرة

وربنا يسترها معانا كلنا

دعواتكم

**tutankhamoun** · 13-11-2008 08:43 AM

طبعا من أكبر الغلطات في البلد دي
الاخوة اللي بيبقوا سايقين بأقصى سرعة ليهم بغض النظر عن حالة الطريق و هاتك يا غرز و قلة أدب
المهم أن من أهم قواعد القيادة
أنك تبقى ماشي ورا اللي قدامك و اللي قدامك ماشي ورا اللي قدامه لأن اللي قدام هو اللي شايف الطريق و أنت مش كاشفه زي ما هو كاشفه و هكذا

المهم ...... في ج ع ع مفيش الكلام ده من أصله لأن مفيش نظام من أصله
كل واحد بيسوق بمزاجه و حسب نظامه هو

مرة كنت ماشي و طريق مظلم ......
و ببص لقيت حفرة كبيرة قوي ....... تدشدش أجدع عربية
المهم هديت خالص ووقفت تماما علشان أنزل الحفرة و أطلع منها بشويش
ببص في المراية لقيت أخ كريم جي ورايا ........ و من حقه عليا أني أنبه
دوست على الزرار بتاع التنبيه
أخونا طلع مصري أصيل
ملوش دعوة و لا كأني بنبه
نزل في الحفرة و طراخ .........شرار في كل حتة ........ و الخساير تقريبا كانت أكصدام أمامي و الرادياتير علشان المية كانت بتشر
و دي الخسائر المرئية بالعين المجردة

طبعا هو يستاهل كل اللي جراله ......... أنا مش فاهم ,,, هو أنا وقفت عيائة و كمان شغلت التنبيه و لمبات التحذير عيائة
و الله بقيت فرحان فيه ......... مش شماتة .......زز لاءة علشان يتعلم بعد كدا الأدب و يعرف ان الله حق و لازم يسمع كلام اللي مشغل التنبيه و التحذير

حادثة تانية
واحد لذيذ قوي
ماشي بأقصى سرعة ممكن يجيبها بعربيته
المهم الطريق وقف تماما
وهنا في مصر لما الطريق يقف ......... محدش بيبقى عايز يقف ......... تلاقيه عمل كم حركة شقلباظ و دخل في خرم ابرة و السلام
المهم راح حادف يمين بدون ما يشوف مين اللي جاي من اليمين أو أيه اللي موجود في اليمين
( ماهو مش معقول الأخوة اللي وقفه قبله وقفوا عيائة ........ اكيد لأن مفيش خرم ابرة يوديهم في أي حتة ) إن شاء تكون داهية

ما علينا و أسمع فرامل و العربية تزحف على الأرض
ونازل يتخانق مع الأخ اللي كان واقف يمين الطريق ( ناس معندهاش دم و الله )

و ربنا ستر في الموضوع ده و محدش أتعور و دي أهم حاجة ...... أنا بحب ان الأخوة الأغبياء يتعلموا في حاجة تكون في حديد العربية و ربنا يستر على أرواح البشر

و الحواديت كتيرة و القصص أكتر و لو كتبنا كل اللي بنشوفه من رجال الأعمال المصريين المهمين جدا اللي خايفين تفوتهم صفقات الملايين من الجنيهات !!!!!!!!

و فعلا ربنا يستر طريقنا و بوجه نداء لكل من يقرأ هذا الموضوع
بأن من أمامك يعلم ما يحدث أمامه
إذا أردت التخطي ........ يجب التأكد من الطريق الذي ستذهب إليه
بلاش التخطي العمياني ......... أرواحكم غالية و الله ....... و إن مكنتش غالية عليكم
أرواح غيركم أغلى على أهلها و أزواجها و أولادهم اللي منتظرهم للعودة للمنزل

و شكرا أستاذ أحمد قشطة ......... عايزين بقى ربع كيلو قشطة يا مان
و قشطة عليك

أخوكم ........ مواطن ج ع ع ......... المقهور
من ج ع ع ....... أجدع بلد في الدنيا في النصاحة و الفهلوة
و متنسوش ........ إن أحنا اللي دهنا الهوا دوكو ........ و خرمنا التعريقة
و على رأي كريم منير .......... نيههههههههههههههه :k49:

**EslaM_NagY** · 13-11-2008 09:27 AM

مرة ماشى فى يوسف عباس وواخد الشارع الى جنب المنصة عشان اطلع على طريق النصر.

الشارع دا للى ميعرفوش اوله خالص منزل يخلى الى اللادا تمشى على 150 زحلقة.
وفى الاخرررررررررررررر مطب
فانا ماشى وماسك العربية عشان ملبسش المطب وواخد اليمين
لقيت واحدة راكبة لانسر حاجة من شمال وطايررررررة بس كانت لسة ورايا
رحت بكل زوق مطلع ايدة من الشباك وشاورتيلها تهدى
هى فهمت انى بعاكسها وعينك ما تشوف الا النور راحت كبسة بنزين على الاخر
فا وهى بتعدى من جنبنى بتبصلى رحت ضاحك.

بعد المطب بشوية لقيت الانسر راكنة ومفيهاش اكصدام امامى وبتشر مية.
رحت مقرب منها بابتسامة عريضة على وشى ومشيت.

بس المطب دا اتشال دلوقتى الى عايز يجرى الطريق مفتوح.

**MMamdouh** · 13-11-2008 11:37 AM

المشاركة الأصلية كتبت بواسطة ahmadkeshta

أنا مش سواق قديم قوي ، بسوق من سنتين وشوية بس ، وطبعا باعمل غلطات سواقة ، بعضها ممكن يكون خطير ومش لازم يتعمل ، وبعضها ممكن أكون مش عارف إنه غلطة سواقة أصلا ، وبعضها بتفرضه عليك ظروف الطريق . ففكرت إننا هنا في المنتدي نعمل موضوع عن أخطاء القيادة علشان ما نعملهاش . وحاحكيلكو النهاردة عن أكبر خطأ قيادة ممكن أكون باعمله واتكرر معايا كتير وهو " عدم الانتباه إلى سلوك السائقين المحيطين " وهاحكيلكو حكاية الحادثة اللي عملتها من حوالي سنة لما ما انتبهتش لسلوك سواق أوتوبيس كان ماشي قدامي على الطريق السريع .
كنت ماشي على شمال الطريق قبل فتحة عبور إلى الخلف "يو ترن يعني" وكان فيه أوتوبيس واقف على يمين الطريق قدام الفتحة بالضبط ، وأنا قادم بسرعة 80 كلم كان الأوتوبيس اتحرك بطء وبعدين وقف فجأة ، ما انتبهتش لمعنى وقوفه الفجائي وزودت سرعتي فإذا بعربة كارو تخرج من أمام الأوتوبيس بسرعة تقودها فتاه في الثانية عشرة تقريبا تنظر إلى الي وأنا قادم بينما تحاول إيقاف الحمار بينما أنا أحاول كبح السيارة وأنا اتجه بزاوية بسيطة جدا ناحية اليسار لكي لا أصطدم بالجدار الفاصل ، فاصطدم رفرفي الأيمن بمسمار في طرف الخشبة التي يعلق فيها الحمار فشقه نصفين ثم توقفت في منتصف فتحة اليو ترن ونظر سائق الأوتوبيس بلا مبالاه ثم أكمل طريقه وأتي بعض الفلاحين مسرعين كانت الفتاة والحمار والكارو بخير ، الفتاه كانت مفزوعة بالطبع ، وأخذ الفلاحون يهدئونها ويهدئونني ، ولما وجدت كل شيء على ما يرام ، وأنني لم أتسبب في أذي . وأن كل الخسائر قد تلخصت في الرفرف الأيمن والمرآة غادرت المكان حامدا الله. طبعا الفتاة مخطئة تماما لأنها عبرت دون أن تكشف الطريق ، وسائق الأوتوبيس كان من الممكن أن يشير لها بالتوقف أو يشير إلي بالحذر ، لكن لو كنت أخذت جانب الحذر وتسائلت في نفسي " هو وقف ليه بعد ما مشي ؟؟" بينما أهدئ سرعتي حتى تتضح الأمور لما حدث ما حدث .
نفس الأمر أقوله لنفسي عندما آكل مطبا فبعد أن آكل مطبا ما ، أجد الإجابة على سؤال غامض كنت أتسائله منذ قليل " هي الناس إللي سايقة حولية دي ماشيين بالراحة ليه؟؟؟؟؟ ".
أكبر غلطة سواقة ممكن الواحد يعملها إنه ما ينتبهش لسلوك السائقين المحيطين به .
أدعوكم للمشاركة بأخطائكم لكي نتجنب إرتكابها

حصل معايا موقف مشابة... بس العربية اللى جنبى مكانتش واقفة و بالتالى متوقعتش اى حاجة تطلع من امامها... و اللى طلع قدامى بنى ادم مش عربية كارو... و الخساير كان وفاة الراجل اللى حاول يعدى

دايما حاول تكون حذر قدر الامكان جنب المركبات الكبيرة اللى بتحجب رؤيتك... متسبقش اوتوبيس فى طلعة اشارة لان ممكن واحد يكسر الاشارة و يغدى من قدام الاوتوبيس و انت تدخل فيه... و لو بتتخطى اوتوبير او عربية نقل حاول تسيب مسافة بينك و بين الاوتوبيس او النقل عشان تفتح زاوية رؤية و تشوف اللى قدام النقل او الاتوبيس لان فيه بهايم كتير بتعدى من قدام الحاجات دى من غير ما تشوف جنب منها ايه و فجاءة تلاقيهم تحولوا الى بوستر على كبوت عربيتك

MMamdouh