الموضوع: لو عملت خناقة في ادارة الكهرباء هاخد حقي ؟

من خبرتى و تعبى فى الموضوع ده مع شركة الكهرباء( الهرم) هتلاقى حاجه من اثنين

1- المحصل اساسا بيكون من النوع الكسول او عنده عيب فى الجهاز الى معاه يقوم ضارب اى قرايات للعداد علشان يثبت انه نزل شغل, و الجهاز ده على فكره ما بيقراش العداد ولا حاجه ده بس عباره عن وحدة تخزين للقراءات الى المحصل بيدخلهاله بايده
2-لما بيكون المنزل مغلق اما انه بيضرب اي قراءه, او بيكتب مغلق و بعد كام شهر تلاقى عليك مبلغ كبير لانه بيكون لستهلاك كذا شهر و هتعرفها من المكتوب فى عدد اشهر المحاسبه بس عيب الموضوع ده انه بيدخلك على شريحه كبيره و تتحاسب غالى, و حتى لو هيخدموك هيقسطولك ثمن الفاتوره بس انته برضه هتدفع فلوس فى حاجه انته ماستخدمتهاش كل ده علشان واحد مش شايف شغله
و لو المحصل محترم و كان المنزل مغلق بيرجع للوصولات القديمه و يشوف معدل استهلاكك الشهرى و يحطهولك على انه قراءة عداد

هتروح و هتكلم المدير بكل ثقه و ادب و احترام و تركز على ان قراءة العداد الفعليه اقل من المكتوب فى الوصل, و هيطلع معاك واحد ياخد القراءه و لو العداد اقل من الوصل هيوقفوا حسابك لغاية ما يزيد عن المكتوب فى الوصل

لو بعد كده الموضوع اتكرر معاك تشتكى فى حماية المستهلك

بالنسبه لمشكلتى كان المحصل بييجى وقت الشغل و طبيعى محدش هيفتحله علشان الكل فى شغله (بيت عائله مغلق من بابه) فيضرب قراءات عاليه و المشكله انهم فتحوله فى مره و حاسبوه و كانت النتيجه انهم وقفوا حساب 3 عدادات لمده اكثر من شهرين بسبب علو القراءات المضروبه(قراءة الوصولات اعلى بكثير من العدادات)

و وصلت معاهم لحل المشكله ان اى حد يوديلهم القراءات الشركه فى خلال اول 10 ايام فى الشهر, باوديلهم قراءتين و بيبعتوا واحد معايا ياخد قراءة الشهر الثالث لانهم من حقهم يبصوا على العداد و يتاكدوا من القراءات

انا سمعت عن موضوع سكانر ده بس ماعمريش شفته
ماتنساش انى قلت ان انا ساكن فى بيت عيله و بابه مقفول من تحت يعنى الراجل الى بياخد القراءات مش هيعرف يعمل حاجه الا اذا حد فتحله باب البيت من تحت
و غالبا بيكون الحد ده انا
و كل مره بشوفه يبص على العداد ببطاريه صغيرة و يدخل القراءات مانيوال (لسه موصلهمش تبترونك تيكنولوجى)
المهم ان الى فى الوصل يكون مطابق لقراءة العداد
و لو العداد زى الوصل و انت شاكك ان الاستهلاك عالى اعمل طلب معاينه يمكن حد سارق كهربا منك
و ممكن تقلب العداد تخليه برة الشقه عشان ياخد القراءه لو مفيش حد فى البيت
النوع الجديد من العدادات الى سمعت انهم عاوزين يعمموه على مستوى مصر العداد الى بيشتغل ب كارت شحن زى الى شغالين بيه فى راس البر و بعض القرى السياحية
و ننسى خالص حكاية قراءة العداد او المحصل

المشاركة الأصلية كتبت بواسطة مصراوي جدا

الف شكر للجميع لابداء الرأي ومحاولة المساعدة

شكرا يا استاذ l0new0lf بس لي بعض الملاحظات

اعتقد الجهاز اللي مع المحصل بيقرا العداد بالفعل (سكانر) لأن القراية صحيحة وهي مش اكبر من القراية المسجلة في العداد عندي بالداخل

- المفروض فيه واحد بييجي ياخد القراية وواحد بيجي للتحصيل
- بتاع القرايات بييجي من غير ما نعرف لأنه مش عايزنا نفتح الباب ولا حاجه
- المحصل بييجي في اوقات مش بنكون فيها في البيت طيب المفروض معاه وصل شهر يوليو مثلا لما ميندفعش الظاهر يروح يعمل وصل اغسطس بالقيمتين مرة واحدة ولما ييجي ميلاقيش حد يروح يعمل وصل لسبتمبر مرة واحدة باجمالي القيمة وبالطبع بيعيد الحساب من جديد ويعتبره استهلاك شهر واحد ويحسب على الشريحة الكبيرة وهنا النصب واضح

- وصل اكتوبر مكتوب فيه
تاريخ الاصدار 10 - 2008
عدد اشهر المحاسبة 1
قراءة حالية 21901 سابقة 20066 يعني فيه شقة بتعمل في شهر واحد 1900 كيلو باكتر من 500 جنيه (ربما يكون فيه بالفعل بس مش انا اكيد)

عموما انا هاروح اشتكي وربنا يسهل

يا باشا بما اننا طوارق زى بعض احب اطمنك ان وصل شهر سبتمبر انا عامل 2700 كيلووات و شهر اكتوبر 3000 كيلووات و القراءات صحيحه :k20:

انا كان حصل معايا موقف برضو مشابه .. المحصل ما بيقراش خالص العداد الا كل 3 شهور مره وبيحسب متوسط الاستهلاك وفجأة قالنا عندكم اكتر من 3000 كيلو متراكم فقمنا دافعينهم مره واحده وبناخد خصم عليهم ( بتروح شركة الكهربا بتقولهم عايز اعمل تصفير للعداد ) وبعد كدا بتتحاسب على قرايتك

في شقة الهرم اتقفلت حوالي 3 شهور والمحصل ما بيجيش اساسا فجأة لقيت واحد بيخبط وداخل وبيقولي كهربا فقلتله تفضل قام مديني الوصل ببص في العداد لقيت الوصل اكتر من العداد بكتير قلتله الرقم في الوصل اكبر قالي معلش هاخده اغيرهولك واجيبلك واحد جديد وقام ماشي ماشوفتوش تاني :D

بس برضو لازم تعمل شكوى في المحصل علشان ينتظم معاك ويقرا صح ولو شايف ان في استهلاك كبير والارقام في العداد مطابقه للوصل بتكتب طلب فحص العداد علشان ممكن يكون العداد بيهيس او ممكن تغيره خالص لو حاسس انه بعد الفحص مش مظبوط بس هيكلفك في حدود 500 جنيه تقريبا للعداد الجديد وتتابع بئى كل شهر بين الوصل وبين العداد

وربنا يرحمنا يا مهندس طارق من المحصلين الي ماعندهمش ضمير دول :s

يا ترى ايه الاخبار؟