الموضوع: النصائح ال40 لأستلام كورولا 2015 -دليل المشترين الجدد-

بسم الله الرحمن الرحيم

زملائي الاعزاء بنايل موتورز كل عام و انتم بخير ,,,,,,

النصائح ال 40 لأستلام كورولا 2015

1. شيل البلاستيك الابيض من علي العربية عشان تتأكد ان مفيش اي خبطات او خدوش.
2. افتح الابواب كلها واتأكد انهم بيفتحو و يقفلو كويس
3. استلم كل اوراق العربية زي الافراج الجمركي و المبايعة اللي بأسمك و خطاب المرور
4. استلم الكتالوج و كتيب الصيانة
5. شيك علي الكوريك السمبوسة و شنطة عدة خفيفة في جراب جلد اسود
6. اتأكد ان الاستبن جنط سبور نفس المقاس
7. في 4 علامات تويوتا حديد اتأكد انهم راكبين في الجنط
8. تاكد من وجود طفاية سجايربلاستيك دائرية.
9. تأكد من وجود ولاعة سجاير.
10. تأكد من وجود جزء بلاستك فاصل مبين مكان الكوبايتين جنب الهاند بريك.
11. هتستلم 3 مفاتيح 2 ريموت وواحد عادي و بلاستكة عليها كوود المفتاح .
12. ضغط الكاوتش هيكون عالي قوي ظبته علي 32.
13. لمبة البنزين هتبقي منورة حط بنزين اول متخرج.
14. شوف العداد ماشي قد ايه تحت 50 كم معقول.
15. اتاكد من انوار العربية الامامية و نور الفوج لايت و الليد و الستوب و الاضاءة الداخلية في الصالون و متخافش الفوج لايت الخلفي لمبة واحدة بس شمال .
16. مفيش اريال عشان هو مدمج في الزجاج متخافش.
17. شيل اي ورقة ملزوقة في زجاج العربية عشان بيبقي فيها معلومات عن العربية و رقم الشاسيه .
18. اتاكد من سلامة الفرش الداخلي و التابلوه .
19.جرب الكاسيت و السماعات و البلوتوث .
20. اتأكد ان الاوتو بارك متفعل و لو مكنش متفعل اطلب تفعيله .
21. اتأكد ان المساحات و الكلاكس شغالين .
22. اتأكد ان التكييف شغال
23. اتأكد ان الكراسي بتتحرك قدام وورا و الضهر بيتحرك بسهولة معاك .
24. شغل التكييف عادي من اول متستلم .
25. متمشيش علي سرعة ثابتة مدة طويلة .
26. متضربش فرامل بقوة .
27. متحرقش علي الغيارات و متعليش الار بي ام عن 3 بقدر الامكان .
28. متقطرش او تجر اي عربية .
29. النقاط من 25 ال 28 دول في اول 1000 كم .
30. مش هتستلم اي حاجة مع العربية ولا حتي ميدالية و لا دواسة .
31. هتستلم هووك حديد عشان لو عاوز تقطر العربية.
32. اطلب منهم غسيل العربية ووضع دواسات ورق كارتون .
33. هتلاقي صدادة بلاستيك في باب السواق للحماية من التجريح لو ملقتهاش عادي ساعات بيطمعو فيها خصوصا لو من معرض.
34. متتخضش من صوت الكلاكس عادي عشان هو فردة واحدة و لو عاوز تعليه سهلة جدا .
http://www.nilemotors.net/Nile/401728-2014.html
35. في الاول ممكن تسمع صوت خشن او صفارة مع الفرامل ده بيبقي نتيجة الركنة و الرطوبة هيروح لوحده ولو انت مستعجل انفخه بهوا في البنزينة هيروح .
36. انوار الليد مش بتطفي طول مانت مدور العربية و نزلت الهاند بريك .
37. اقفل الباركينج سنسور لو صوته مزعج في الزحمة .
38. حاول تقفل الشنطة من النص بالضبط عشان تقفل معاك بسهولة .
39. تانك البنزين شمال نحيتك عشان هتتلخبط و انت داخل البنزينة و الزرار بتاعه تحت رجلك الشمال جنب المجري بتاعة الكرسي .
40. قبل متشغل اغاني و حركات شغل شوية قران و ربنا يباركلك .

الف مبروك و استمتع بالعربية و قولنا انطباعك عنها عشان تفيد كل الناس اللي بيفكرو في العربية.