تحذير من محطه وطنيه مسجد السلام (بتوع ضبط الزوايا)

**Ahmed Saad** · 12-07-2014 12:58 AM

السلام عليكم ورحمة الله وبركاته ياعضاء االمنتدى الكرام طبعا العنوان موضح اللي هقوله انا بحذر أي واحد من سكان مدينة نصر وماحولها من التعامل مع بتوع ضبط الزوايا اللي في محطه وطنيه اللي جنب مسجد السلام قبل سوق السيارات في اتنين صنيعيه بتوع أكبر اشتغالات في مصر الحكايه اني كنت لسه مغير كبالن لعربيتي الباسات موديل 2000 فقولت اروح اشيك على الزوايا بالمره فلقيت البيه بيقوللي العربيه فيها شغل زراجين 4 زراجين قومت اتحولت عليه وقولتله ايه ياعم هوا دخلك ب 128 لسه مطاهرها دي لو شاسيها فتح تبقى من حادثه لاقدر الله المهم عرفت ان مفيش عربيه بتخش عنده إلا لما يعملهازراجين وطبعا الزرجينه ب 50ج فبيعمل شغل عالي على الناس ويقلبهم فقولت احذر الناس من التعامل معاهم لأنهم من الاخر نصابين وبيقنعوا اللي قدامهم أن عربيته مش مظبوطه وهتبوظ لو معملتش زراجين وكده ويارب ماكنوش طولت عليكم

**kantofanto** · 12-07-2014 01:21 AM

و الله ياباشا فعلا تشكر و كويس ان حضرتك نبهتنا لده ، النصابين كتيروا اووى و قلة الضمير بقت عند ناس كتير اووى و ربنا مش بيسيب حق حد ، ربنا ينتقم منهم يارب

**ahmedfouad** · 12-07-2014 01:39 AM

شكراً على الاهتمام والتنبيه ؟
يا ريت تكون بلغت مدير المحطة

**HishamShafai** · 12-07-2014 01:48 AM

شكرا للتنبيه و فرصة لى أن أحذر من بتوع الكاوتش إللى ينفخوا العجلة جامد و يحطوا عليها صابون و يوريك 100 خرم , لو حد عمل معاك كده إرميله 5ج وخليه يرجعلك عجلتك مكانها و إجرى بعيد عنه , حدث معى ذلك عند واحد إسمه الأستاذ بأول جسر السويس عند إشارة روكسى, و علشان كشفته و بعد ما مشيت إكتشفت إنه نافخ الفردة على 45 علشان يضيعنى , قلة ضمير و إجرام.