الموضوع: تقرير افطار المنتدي السابع بنادى المقاولون العرب 2014

السلام عليكم ورحمه الله كل سنة وانتم بالف خير وصحة
زي ما عودناكم كل سنة وربنا ما يقطع لينا عادة بفطار رمضاني اسري جميل نتجمع فيه كلنا
والسنادي حبينا نعمل حاجة مختلفة شوية باننا نشوف مكان يسمحلنا بدخول اكل معانا
وقدرت اتوصل لمطعم صغير جوة نادي المقاولين نعمل فيه الافطار
الافطار كان يوم الجمعه الماضي ومكنت متخيل ان عدد الحضور هايكون كبير جدا بالشكل ده
كان فيه ناس طالبة وجبات من المطعم والحمد لله الاكل كان زي الفل
العدد كان كبير جدا ما شاء الله اكتر من 80 فرد غير الاطفال يعني قفلنا ال 100 مستريح
المكان كان كبير وجنبنا مراجيح اطفال ومصلية فالكل اتبسط
اللمه كانت حلوة
علي هامش الافطار حبينا نقول لصديقنا محمد قاسم كل سنة وانت طيب اللي صادف حضوره اليوم ده عيد ميلادة فكانت حاجة بسيطة من اسرة نايل موتورز لمحمد
وشكرا جزيلا لاستاذة سما وزوجها اللي جابو التورتة مخصوص معاهم من اليكس وكمان حلويات تانية كتير وتعبو نفسهم وشالوها لحد القاهرة في الحر ده
شريف وهبة تسلم ايدك علي طبق الحلويات الجميل :-)
الشيخ خالد نورتنا انت واسرتك وخاصة خاصة الحاجة ربنا يديها الصحة وبركة العمر وجزاك الله كل خير علي امامتك في المغرب والعشا
محمد شنوري كنت واحشنا بقالك مرتين واقع مننا مينفعش كدة يا منسق :-) والحاجة كانت منورة القعدة سلملي عليها كتير
وسلامي لكل كبار السن اللي تعبو نفسهم وجم مقابلتنا الجميلة يعملولها روح حلوة
حضر عدد كبير من الاعضاء لاول مرة وحضر ناس بقالنا كتير مشوفناهمش
فالقعدة كانت حلوة جدا بفضل الله
وناس تانية كتير جت بعد الافطار والحمد لله متكلمناش في السياسة زي ما بلغتهم قبل الحضور :-)
دايما متجمعين علي خير كل سنة والمنتدي واسرته الجميل بيكتر ويزيد بكل ود
خالص تحياتي
كريم