خبر يفرح لكل مستخدمى السيارات

**فادى** · 17-10-2008 11:26 PM

هو دى المرة الكام اللى يتفتح فيها موضوع عن السيارة اللى بتمشى بالمياه!!
أنا أعرف أن فكرة السيارة التى تعمل بالمياه فكرة رومانسية جدا , و لكن للأسف الحياة عادة ليست بهذه الرقة و السهولة, الفكرة رومانسية نعم, و لكنها ليست عملية و لا ناجحة بل هى شوية نصب, و حتى الأن لا يوجد بديل فعلى للبترول كلها, و ان وجد, فانه ليس المياه بالتأكيد.

**engoss1990** · 18-10-2008 10:37 AM

هو ده بقى الفكر المتشائم علشان العربية
1- مبتمشيش بالمية هى بتمشى بالهيدروجين اللى بيتحرق 300% البنزين
2- السحب اعلى و التسارع اعلى بمراحل من محرك البنزين
3- ارخص صناعياً على اى مصنع من تصنيع محرك بنزين تقليدى
لكن استخدام البنزين و المواد البترولية و عدم استخدام الماء علشان دى سيساسة عليا
و ملحوظة صغيرة : لما اخترعو محرك الاحتراق الداخلى كل الناس كانو بيركبو الكارته
ويقولو نفس الكلام اللى انت بتقولو بس على العربيات عموماً

**ibrahimsaad** · 18-10-2008 11:08 AM

ربنا يدينا طوله العمر

يبقى الاحفاد بقى يركبوها على ماتنزل مصر
بس ياخساره نسيت اقول ان الحروب القادمه ستكون على الماء مش الطاقه

!!!!!!!!!!!!!!!!!!

**MedaSam** · 18-10-2008 11:53 AM

يا ترى بتستخدم مياه قد ايه؟ ....... ما هو المياه مصدر ايضا للاستخدام الأدمي اللي عمالين يزيدوا خصوصا في بلدنا المحروسه

و يا ترى تأثير المياه العذبه زي المياه الملحه علي الموتور و أجزاءه؟!!!

**kefafy** · 18-10-2008 12:16 PM

جميل قوى الخير ده
بس ربنا يستر لما تنزل العربية ميغلوش سعر المية كمان

**فادى** · 18-10-2008 04:26 PM

المشاركة الأصلية كتبت بواسطة engoss1990

هو ده بقى الفكر المتشائم علشان العربية
1- مبتمشيش بالمية هى بتمشى بالهيدروجين اللى بيتحرق 300% البنزين
2- السحب اعلى و التسارع اعلى بمراحل من محرك البنزين
3- ارخص صناعياً على اى مصنع من تصنيع محرك بنزين تقليدى
لكن استخدام البنزين و المواد البترولية و عدم استخدام الماء علشان دى سيساسة عليا
و ملحوظة صغيرة : لما اخترعو محرك الاحتراق الداخلى كل الناس كانو بيركبو الكارته
ويقولو نفس الكلام اللى انت بتقولو بس على العربيات عموماً

سياسة عليا ايه بس,
هو اللى نعيده نزيده, الموضوع مش تشاؤم و لا حاجة, الموضوع اتفتح قبل كده كذا مرة, و قام الأستاذ سبعاوى مشكورا بتوضيح نقاط الضعف فيه, و أنا قمت بتأييده تماما, لاستحالة استخراج طاقة من المياه, و أنا سوف أعيد شرح الموضوع لتعميم الفائدة,
الفكرة كلها تتلخص فى الأتى : مصدر كهربائى بالسيارة(بطارية) يقوم بتحليل المياه الى هيدروجين و اوكسجين, ثم يقوم الهيدروجين بتشغيل محرك احتراق داخلى و يحترق و يتحول الى ماء مرة أخرى.
طب الطاقة جت منين؟؟! من المصدر الكهربائى, المياه ما هى الا وسيلة توصيل للطاقة, و لأن الطاقة لا تفنى و لا تستحدث, فان الطاقة التى استخدمناها لتحيلي الهيدروجين هى نفسها الطاقة التى سوف يعطيها الهيدروجين عند احتراقه و التحامه بالأوكسجين اضافة الى الفواقد و هى كبيرة فى هذه العملية.
طيب ماحنا ناخد الكهربا من البطارية مباشرة الى محرك كهربائى و يبقى بالطريقة دى استفدنا بكفاءة محرك الكهرباء (حوالى 90%) الأعلى من محرك الاحتراق الداخلى الذى لا تتعدى كفاءته ال30% (بالنسبة للديزل و هو بالمناسبة له كفاءة أعلى من جميع محركات الاحتراق الداخلى حتى الهيدروجين).
لكن بكده يبقى أنا جمعت كل مساوىء السيارة الكهربائية و سيارة الاحتراق الداخلى فى سيارة واحدة.
مساوىء الاحتراق الداخلى :
- قلة الكفاءة, و الطاقة الضائعة فى شكل حرارة.
- العمر القصير نسبيا للمحرك, و صعوبة الصيانة.
مساوىء السيارة الكهربائية :
- احتياج البطارية الى وقت كبير للشحن.
- ثقل وزن البطارية و قدراتها الضعيفة على تخزين الطاقة.

فأخدت فى النهاية سيارة هى عبارة عن مسخ تجمع كل المساوىء, كل ده عشان أحقق الفكرة الرومانسية القائلة انو السيارة بتتحرك بالمياه!!
كما قلنا سلفا الموضوع ده نصب فى نصب, لأن المياه لا تحتوى على طاقة, الهيدروجين يحتوى على طاقة لذا فانه لا يوجد بشكل منفصل فى الطبيعة, فنضطر الى فصله بواسطة مصدر طاقة خارجى.

**sab3aawy** · 18-10-2008 04:45 PM

فعلا دى المرة ال15 مليون اللى الموضوع يتفتح على المنتدى ، وطبعا الموضوع بيجد انصار كتير جدا من الحالمين بنوع من انواع الطاقة المجانية، وانا تعبت من كتر الشرح والرد، بس انا اللى اقدر اعمله انى هاكتب فى وصيتى اننى ساهب مقبرتى مجانا لاول واحد يمتلك عربية تمشى بالماء فقط بدون اى مصدر طاقة آخر(كهرباء او بترول او طاقة شمسية او نووية...الخ) لكى يجعل منها جراج يركن سيارته فيه فوق رأسى يوميا حتى يكون ذلك عقابا لى على افكارى المتخلفة التى ترفض تصديق ان سيارة ما يمكن ان تمشى بدون مصدر طاقة خارجى

بس تعرف يا فادى، هى المشكلة ان قوانين الديناميكا الحرارية تدرس فى كلية الهندسة وليس فى الاعدادى او الثانوى، ولذلك من الصعب جدا انك تجعل غر المتخصص يستوعب فكرة بقاء الطاقة (ألقانون الاول) وعدم امكان استغلال نفس الطاقة فى الحركة اكثر من مرة بسبب وجود ما يسمى بمعامل التشتت entropy (القانون التانى)، لذلك انا بقترح على كل من يصدق تلك الفكرة الرومانسية انه يقرأ القليل عن قوانين الديناميكا الحرارية، وسيجد الكثير للقراءة على الويكيبيديا قبل ان يصدق ان تلك الفكرة الرومانسية تحمل اى قدر من القابلية للتنفيذ

دى روابط للقراءة عن كل قوانين الديناميكا الحرارية والتى تصف كل سلوكيات الطاقة

http://en.wikipedia.org/wiki/Zeroth_...thermodynamics

http://en.wikipedia.org/wiki/First_l...thermodynamics

http://en.wikipedia.org/wiki/Second_...thermodynamics

http://en.wikipedia.org/wiki/Third_l...thermodynamics

وده رابط عن ستانلى ماير واختراعه المزعوم الخاص بخلية الوقود التى لا تستهلك وقود، واللى هيقر الرابط هيشوف ازاى النصاب ده عرقل الكشف عن اختراعه من اجل براءة الاختراع
http://en.wikipedia.org/wiki/Stanley_Meyer

وبالمناسبة ، فبرغم الآلاف ممن اخترعوا الخلية المزعومة، لاتوجد براءة اختراع واحدة فى العالم لمثل هذة الخلية، وحتى لو افترضنا ان شركات البترول بتحارب الاختراع ده، مش كان المنطقى انه تتسجل له براءة اختراع فى اى دولة متقدمة تكنولوجيا معندهاش بترول زى اليابان او المانيا ؟

اما بالنسبة للناس اللى وصل بيها تصديق الخرافة دى انها تسفه رأى رصين مثل رأى اخونا فادى وتقول ان الناس كانت زمان بتركب الكارته وتقول نفس كلامه فانا بس هقترح عليهم يستخدموا محرك بحث جوجل للبحث عن مفاتيح water car hoax ويشوفوا اذا كان الموضوع فعلا فكر متطور يعارضه متحجرى العقول امثالنا وللا مجرد hoax (هجصة) اخترعها بعض هواه الشهرة لتحقيق احلامهم فى الشهرة والظهور عن طريق اقناع غير المتخصصين،لأن اللى اجه اخترع العربية ايام الكارته اخترعها عن طريق انه استغل حقائق فيزيائيه يعرفها كل راكبو الكارتة وطبقها عمليا، لكن مجاش قال ان 1+1=3 وكدة نقدر نخترع عربية