اخيرا وبعد معاناة تم تغيير الكاوتش الباروم ليوكهاما وتغيير تيل فرامل فاليو .
الحمدلله وبعد عناء استمر 4 سنين غيرت الفرد الباروم السيئة للغاية ( كان معدي علي تاريخ انتاجها 4 سنين وخمس شهور ) لفرد يوكهاما C-Drive 185/65 R15
تم التغيير عند عبده امين للاطارات فرع المعادي انا كنت كلمتهم من اسبوع وسألت علي الفرد قالي الفردة ب 500 جنيه شاملة التركيب المهم روحت النهاردة بعد الفطار وبصراحة كنت خايف الاقيها غليت علشان موضوع البنزين انما الحمدلله روحت قابلت استاذ عمرو الي هناك راجل في قمة الاحترام قالي الفرد زي ماهيا ب500 وفرح جدا لما عرف ان انا من اعضاء نايل موتورز الي مشرفنا دايما :Copy of new: المهم الفرد صناعة ياباني ومكتوب علي الفردة نفسها انتاج شهر 2 /2014 الفردة بالتركيب والترصيص والنيتروجين والبلوف ب 500 جنيه وده افضل سعر شفته لليوكهاما الصراحة ( انا سالت عند علي صبرة قالي 550 والجمل الي في مصطفي النحاس قالي 580 !!!! ) الناس عند عبده امين محترمين جدا وشغلهم نضيف وتعاملهم اكتر من رائع .
بالنسبة للتيل انا تالت مرة اغير تيل للوجان اول مرة ركبت ريمسا معجبنيش خالص كملي علي الطنابير وغيرتها بعد كده ولما كان بيسخن مبيمسكش كويس خالص بعد 4 الاف كيلو شيلته .
روحت اشتريت تيل من توكيل العبور كان ب 310 اعتقد بس الكلام ده من سنة اعتقد . كان كويس بس خلص بعد 10 الاف كيلو بس ؟ .
المرة دي بقي عرفت ان التيل عامل في التوكيل 500 جنيه تقريبا ,واحد صاحبي مهندس من التوكيل نصحه بالفاليو وقاله علي محل في المهندسين بيبيع الاصلي علشان يجيب منه جابه وجربه وقالي انه احسن من تيل التوكيل كمان ,انا بصراحة مصدقتوش المهم خليته جابلي الفاليو من عند نفس الراجل لاني دوخت عليه كل المحلات الي كلمتها قالي خلصان ومفيش غير الريمسا , والتركي ناس هنا في المنتدي خوفتني منه .
اتوكلت علي الله وركبته اول ما تحركت بالعربية كنت مستني انه مش هيبقي كويس علشان لسه مطبعش فوجئت انه بيمسك كويس جدا الميكانيكي كمان كان معجب بيه اوي وقالي خامته نضيفة الخلاصة مش عايز ابقي ببالغ لو قلتلكو انه لحد دلوقتي افضل من تيل التوكيل مش عارف ازاي والموضوع ده مخليني مستغرب بصراحة وانا ركبته قبل ما اركب الكاوتش ب تلات ايام علشان محدش يفكر ان التحسن من الكاوتش بس .
انا جبت التيل الفاليو ده صناعة اسباني ب 190 جنيه وكمان العلبة عليها كود بتخش علي موقع فاليو تدخله يقولك اذا كان قطعة الغيار دي اصلي ولا لا .
الخلاصة طبعا الفرامل اختلفت تماما بعد التيل والكاوتش الزحف قل جدا العربية بتمسك في الارض صوت الفرد علي الارض وفي النقر اهدي كتير بصراحة فرق السما والارض بين الباروم واليوكهاما سي درايف
اسف علي الاطالة بس انا حبيت انقل تجربتي للاخوة في المنتدي علشان كلنا نستفيد وشكرا .
