هتوكل علي الله واجيب الجين 2 زيرو ارجو المساعدة

**abdalaha** · 16-07-2014 05:29 PM

معايا لانوس 2001 عربية شغالة ومقضيه الغرض بس انا عايز تكيف اقوي وعايز لما اشغل التكيف العربية متقلبش بطة بلدي وعايز محسش بتقل في العربية وعايز مقعدش اسمع في اصوات تزييق ورجرجة ودبدبة في المطبات وعايز استمتع بالسواقة وانا قافل الازاز ومشغل التكيف لاني ركبت 128 ونزلت للانوس بصراحة لسة مخستش بمتعة سواقة او رفاهية والبروتون سعرها وقسطها انسب حاجة في السوق المصري حاليا اوتوماتيك كاملة فهل هلاقي الحاجات الي محتاجها فيها وهل تكيفها وسواقتها وقعدتها هتبقي احلي من لانوس ... في انتظار خبرتاكم وآرائكم

**eng.m7md.ali** · 16-07-2014 05:41 PM

احسن بكتييييييييييييير ... جرب العربية في التوكيل هتلاقي نفسك بتعمل الاجراءات بتاعتها تلقائي

**م.محمد مختار** · 16-07-2014 05:42 PM

ربنا يوفقك للخير..
بالنسبة للجين فهي مش عربية "رفاهية" بمعنى الكلمة.. يعني هي أصلاً عربية رياضية يعني مش متصممة للرفاهية (مش كرولا مثلاً) :)
لكن لو هتقارنها باللانوس.. تبقى بتظلمها وبتظلم اللانوس :)
هي بالتأكيد أفضل من حيث الموتور والعفشة والتكييف والراحة.. وارتفاعها عن الأرض..
جرب تركبها الأول ولو حتى تقعد فيها في أي معرض علشان تحس بأبعادها (خلي بالك هي عربية صغيرة أساساً.. مش متصممة انها تبقى صالون واسع وكده) لكن اللي عجبني جداً فيها انها مضبوطة بالشعرة.. لا هي واسعة تضايقك في الحركة والمناورة والركنة.. ولا هي ضيقة تضايقك في الاستعمال..
لازلت مقتنع انها أفضل سيارة بالسعر ده. (مش أفضل سيارة في المطلق طبعاً)

**abdalaha** · 16-07-2014 05:47 PM

كلام زي الفل يا جماعة وعارف اني بظلمها لما اقارنها بلانوس بس اني هدفع اقسط واتسحل فيه فمش عايز حاحة تعكنن عليا او تخليني اندم او الاقي ان مفيش فرق بينها وبين لانوس انا ومراتي ومعندناش اولاد وقليل لما حد بيركب معانا واصخابي اخري 4 في العربية ... هدفي من تغيير العربية راحة واحساس ان العربية نعمة مش نقمة

**abdalaha** · 16-07-2014 05:52 PM

يعني لو قرصت علي نفسي اجيب الريو سيدان احسن منها ولا الاكسنت ولا اوبترا ولا البروتون هتديني الي عايزو وتوفر لي فلوس

**Omar Mahmoud** · 16-07-2014 06:00 PM

إن شاء الله مش هتندم
هتلاقي فرق كبييييير بين اللانوس و الجين2 لصالح الجين 2 طبعا
العربية مش ديقة تماما لان الكنبة اللي ورا سعات بيعد فيها 4 افراد 2كبار و بنتين صغيرين يعني تقريبا 12 سنة و قاعدين مرتاحين
بس الاول شوفها
العربية مش ناشفة اوي و لا ناعمة قوي يعني الباور بتاعها تقيل بس تقدر تلفه بإيد واحدة و العفشة بتاعتها ناشفة بس مش اوي يعني لو عديت علي حفرة بسرعة مش هتحس بحاجة تقطم ضهر اللي راكبين و لا كانك معديتش علي حاجة يعني هي متوسطة بين انها ناعمة و بين انها ناشفة
بالنسبة للعربيات اللي هي الريو او الاكسنت او الاوبترا انا لو مكانك هجيب البروتون بس اهم حاجة تجربها

**mahmoud_ali** · 16-07-2014 06:17 PM

توكل على الله ومش هتندم

**OmarAdel98** · 16-07-2014 06:20 PM

بروتون جين 2 افضل سيارة في فئتها بلا منازع

**abdalaha** · 16-07-2014 06:32 PM

شاكر جدا لكل واحد رد وربنا يكرمكم جميعا ... واضح ان في إجماع على ان جين 2 عربية حلوة فربنا يرزقنا الخير حيث كان ثم يرضنا به .... تكييف الجين 2 تلج ولا نص نص لاني كائن عاشق للبرودة وكاره للحر جدا ربناينجيني واياكم من حر جهنم

**draboeyad** · 16-07-2014 07:29 PM

التكييف محترم جدا محدش اشتكي منه خالص......بس نصيحه ابعد عن اللون الاسود علشان بيجمع حراره والعربيه بتاخد وقت على مالتكييف تحس بيه ...... اللون الابيض والاحمر ماشاء الله لاقوه الا بالله تحفه على العربيه والرصاصى عملى اكتر ..............

الموضوع: هتوكل علي الله واجيب الجين 2 زيرو ارجو المساعدة

LinkBack

أدوات الموضوع

عرض

-

-

-

-

المواضيع المتشابهه

اشتري الجين ٢ ٢٠١٣ ولا لا ....ارجو المساعدة ؟؟

عريبتي الجين تو اتقلبت بيا ... ارجو المساعدة ضروري بالله عليكم موقف لا احسد عليه

لمبة ال check engine نورت فى الجين ....ارجو المساعدة

ارجو المساعدة فى معارض لسيارات زيرو قديمة؟؟

هتوكل على الله و هشد على عبد اوبل

الكلمات الدلالية لهذا الموضوع

المفضلات

المفضلات

ضوابط المشاركة