السلام علبكم
عندى حائط طوب عاوز اشيله حد جرب يعمل ده بالصاروخ ؟
عرض للطباعة
السلام علبكم
عندى حائط طوب عاوز اشيله حد جرب يعمل ده بالصاروخ ؟
جرب بس اعمل حسابك ف كمامه ونضاره لان كميه التراب هتبقا كتير جدااا واعتقد مش هتنجح
الافضل تهدها بشنيور دقاق وبيتأجر عند الموانين
هات الكراون الكوبايه
ينفع بس حيهدر معاك طارات بالهبل لو الحائط كبير .
معرفش إيه الشكل عندك بس شوف :
1-لو الحائط بالكامل من العمود للعمود للكمرة يبقى تجيبلك عامل هدد باليومية و تقاوله مع التنزيل
2- لو حتفتح مكان ديكور أو شباك (مساحة صغيرة ) الأفضل تحدد الفتحة على الحائط و بعد كدة تحددها بالصاروخ بعمق مناسب تعدى بيه البياض (المحارة ) و دى تعرفها من لون الرايش إتغير من رمادى إلى لون الطوب أبيض أو أحمر على حسب و ده علشان متشرخش و بعد كدة مرزبة و أزميل
طيب سؤال
لو انا عندي كمره ساقطه
عايز اقص منها عشان اعرف احط دولاب
ممكن
وهل يأثر علي البيت ككل
تحياتي
والدي مرة عمل الموضوع دة كان سور على السطح طوب احمر ومتمحر من الناحيتين حبينا نفتح فى السور دة باب علشان السور كان قاسم السطح نصين ولازم تلف علشان تعدي فقلنا نقطع حتة من السور بالصاروخ ارتفاع السور كان 1.80 متر وعرض الحتة اللى قطعناها 1.5 متر الصاروخ اخد وقت تقريبا فى حدود الساعه الاربع وتمت العملية بنجاح بس ابتدي تقطع بالصاروخ الارضية الاول وبعدين الجناب , المشكلة اننا بعد ما خلصنا لقينا ان عندنا دلوقتى جزء صخري كبير مش عارفين هننقلة ازاي ولا ازاي نحركة فاطرينا نزقه نوقعه علشان يوقع على الارض يا يتكسر يا نبتدي نكسرة ومش عايز اقولك لما وقع الصوت اللى حصل والهزة اللى عملها فى البيت كانت عاملة ازاي تقريبا لو الحيطة دى اكبر شوية كانت وقعتها ضرت المبنى طبعا غير الغبار الكثيف اللى نتج عن استعمال الصارخ .
رايي الخاص ولك مطلق الحرية فى اتخاذ هذا القرار الصعب انك تكسرها بالهلتي او اجنة وشاكوش وربنا يقويك ويعينك :) .
يا رجل إتقى الله
فاكر زمان حادثة مشهورة إسمها عمارة لوران فى الأسكندرية (صاحب معرض حب يوسع المعرض شال عمود وقعت العمارة باللى فيها )
اللى إنت حتعمله حاجة زى كدة بس مش بخطورة إنهيار عقار لكن لو كانت كمرة حاملة بطول كبير نسبيا يعنى 2 متر فأكثر و ده الأغلب فإنت كدة بتقطع الحديد السفلى يعنى بتلغى الكمرة من الأساس و النتيجة المتوقعة إن بلاطة السقف اللى فوقك تبدأ تشرخ و مع الوقت القصير تنهار و تلاقى لامؤاخذه جيرانك اللى فوقك معاك فى الغرفة و ربنا يسلمكوا جميعا .
إوعى تفكر تعمل حاجة فى عمود أو كمرة رئيسية .
حاول تفكر برة الصندوق . أنا عندى الحالة دى بالضبط فى غرفة الأولاد عبارة عن جيب غبى فى الغرفة بعمق 30 سم و من فوقه كمرة أغبى بتخلينى لو حطيت دولاب لازم يبقى من أمام الكمرة و يخلى الغرفة ضيقة جدا . جبت النجار يحول الجيب ده لدولاب و عمل وش للدولاب بارز 30 سم بحيث إن الدولاب كله 60سم نص جوة و نص برة الكمرة .
شكرا جزيلا للجميع افادكم الله
كده يبقى هاستعمل هيلتى كوباية ومرزبة واجنة
كل سنة والجميع بخير
انا برضه عندي سؤال بخصوص الموضوع ده
عندي كامرا ارتفاعها 50 سم في الرسيبشن وعاوز اعمل فيها فتحة صغيرة علشان اعدي منها خراطيم تكييف سبيليت، يعني تكون يادوب تكون على قد خراطيم التكييف فهل ده فيه ضرر؟ وفتحة زي دي ايه الاداة الافضل الي استخدمها هل الهيلتي الدقاق ولا في حاجة تانية افضل تفوت في الخرسانة والمسلح؟