سؤال ضرورى فى الأكسيل

**adelit** · 18-10-2008 03:26 AM

اولا اشكركم على هذا المنتدى الجميل ولى سؤال محيرنى :
عندى سيارة أكسيل مو1997 أتوماتيك 1500والغريب أن الأتوماتيك ساعات بيعلق يعنى يثبت على سرعة واحدة ولا ينقل إلا اذا اوقفت السيارة وبطلتها ودورتها من جديد فيعود طبيعى
فما رأيكم العيب ممكن يكون ايه ؟ وبصراحة لسة شارى العربية ومش فاهم فيها حاجة

**wesam_salom** · 18-10-2008 05:21 PM

اخى العزيز
بالنسبه للاكسيل الاوتوماتيك فى الاكسيل
هو ناعم جدا وجميل جدا
بس نفس المشكله حصلت معايا وهحكى لك الوضع
الاول العربيه كاننت مترضاش تنقل من الاول للتانى
ولو نقلت احس بخبطه جامده
وساعات ترجع من التانى للاول وتعمل فرمله جامده
مشيت ورا الميكانيكى
قاللى سهله هنحل الفتيس وننضف البلوف ونغير الزيت
هتاخد كام يا عم
قالى 50 جنيه قلت اشتغل ومش هنخسر حاجه
فكينا ونضفنا باسبراى وتمام
صرفت حوالى 200 جنيه مصنعيه +زيت فتيس +اسبراى+جوان للمصفاه بتاعت الفتيس
المهم الفتيس راحت منه الحركه دى بس لقيت حاجه تانيه
ساعات بحس صوت العربيه على والسرعه مازادتش
يعنى كان العربيه بتنقل على وضع التموير وبعدين ترجع
قالولى علشان الحساسات
فكينا ونظفنا تانى وصرفت حوالى ال100 جنيه
بقت تمام
بس فضل مشكله صغيره
فيه نتشه بسيطه فى النقل
قالولى ده علشان وحده الكنترول يونت عاوزه تتغير ودى بحوالى 250 جنيه
قلت خليها دى حتى بتحسسنى انى سايق مانيوال ومستنى العربيه تنقل
المهم بعدها باسبوعين تقريبا الفتيس جاتله سكته قلبيه ومات
يعنى ولا كأنك بتنقل
سألت فى الحرفيين على الفتيس لقيتهم بيقولوا 1500 جنيه كامل(ده اول كلام)
المهم كلام التنفيذ 1100 جنيه
عرفت انى صرفت نص تمن الفتيس وبعدين خسرته
بس اتعلمت حاجه بالنسبه للاوتوماتيك
الفتيس بيستهبل
غيره فورا وخلى القديم عندك كقطع غيار
وعلى فكره انا كنت ببيع العربيه واللى كان عاوزها طلبها مانيوال
قلبتها مانيوال وصرفت حوالى 1400 جنيه شامل كل حاجه
اتوكل على الله وغير الفتيس احسن وارخص
غير انه مش غالى مقارنه بأى نوع تانى
وهتلاقيه موجود كتير فى بورسعيد والحرفيين ومش عارفين يبيعوه لان العربيات الاستيراد اغلبها اوتوماتيك والناس عاوزه المانيوال
وابقى طمنى