انا مليش دعوة بالكلام اللي اتقال في النص
كطبيب امراض معدية واخصائي مكافحة عدوى وحميات
طبعا من الافضل ان حضرتك تدي ابنك كل التطعيمات المتوفرة
مصر بتدي التطعيمات الاجبارية عشان دي مدعمة واسعارها رخيصة, تطعيمات تانية اسعارها عالية زي حقنة ال Prevenar بتاع الانفلوانزا البكترية مثلا حوالي 300 جنيه في حين ان شلل الاطفال الVial كلها ب 20 جنيه وبتكفي اكتر من 10 اطفال
التطيعمات الاختيارية بتكون امراضها رخمة
1. الانفلوانزا البكتيرية بتعمل التهاب سحائي والتهاب في الجهاز التنفسي وممكن تقلب بالتهاب رئوي واذن وسطى
2. الحمى الشوكية ودي يعني الالتهاب السحائي من اسمها بتعمل التهاب سحائي اللي هو التهاب الاغشة المبطنة للمخ, نختصر ونقول التهاب المخ
3. الجديري المائي بكل قرفه وهرشه وحرارته والاثر اللي بيسيبه وخصوصا في البنات
4. التهاب الكبدي أ وكفاية اسبوعين ثلاثة صفرا وترجيع وبول لون الشاي وبراز لون الطحينة
5. روتا وده اسهال شديد ومن انواع الاسهال القليلة اللي مش بتفرق بين غني وفقير (وللعلم هما 2 او 3 تطعيمات لازم يخلصوا قبل الشهر الثامن لو بعد كده مش حينفع التطعيم بتاع الروتا اصلا )
6. في كتير من الاحيان وزارة الصحة في الشهر التاسع بتدي تطعيم الحصبة Measles وتسيب تطعيم الحصبة الالماني + التهاب الغدة النكفية MMR وده سبب يخليني اروح فاكسيرا بدل وزارة الصحة
الحاجة الوحيدة اللي فيها اختلاف بين دكاترة الامراض المعدية وبين فاكسيرا هو اخر تطعيم BCG اللي هو تطعيم السل اللي في الدراع الشمال لان فيه تقارير بتقول ان كفاية اول جرعة في اول شهر لما الطفل بيتولد وان التطعيم ثاني عند سن 4 سنوات مش مستحب خالص
بالمناسبة بالمرة, على الرغم من كوني طبيبا ولكن كل مرة كنت باخد عيالي وبروح فاكسيرا واديهم التطعيمات هناك عشان اضمن التخزين و ال Cold chain المهمة لحفظ التطعيمات
وإن كنت لا ارفض وجود التطعيمات في اي عيادة زيها زي الانسولين في الصيدليات
بس كده
المفضلات